حالىقارالىق جاستار كۇنى اياسىندا ەسىل وزەنىنىڭ جاعاسىندا «جاستارمەن بىرگە» Open air مۋزىكالىق فەستيۆالى ءوتتى. مادەني كەشتە «جاستارمەن بىرگە» ۇلتتىق ونكۇندىگى قورىتىندىلانىپ, بەلگىلى انشىلەر ونەر كورسەتتى. ءىس-شارا بارىسىندا ءسوز العان استانا قالاسى جاستار ساياساتى ماسەلەلەرى باسقارماسىنىڭ باسشىسى سامات يبراەۆ وسى ونكۇندىكتىڭ جانە قورىتىندى كەشتىڭ ماڭىزىنا توقتالدى.
«جاستار كۇنىن مەرەكەلەۋ قۇرمەتىنە وراي «جاستارمەن بىرگە» ۇلتتىق ونكۇندىگى بەكىتىلدى, ول 3-12 تامىز ارالىعىندا جالعاستى. ونكۇندىك اياسىندا ەكولوگيالىق مادەنيەتتى دامىتۋ, سالاماتتى ءومىر سالتىن ناسيحاتتاۋ, ەڭبەكقورلىقتى ىلگەرىلەتۋ, باسقا دا باعىتتار بويىنشا بىرقاتار ءىس-شارا ۇيىمداستىرىلدى. بۇگىن جاڭا ستۋدەنتتىك ءۇيدىڭ اشىلۋى بولدى, «بوس ورىندار» جارمەڭكەسى ءوتتى. ءبىز حالىقارالىق جاستار كۇنىن اشىق اسپان استىنداعى كونتسەرتپەن اياقتاعىمىز كەلەدى. جاستارعا مەرەكەلىك كوڭىل كۇي سىيلاي الدىق دەپ سەنەمىز», دەدى س.يبراەۆ.
ونكۇندىك اياسىندا اباي شىعارمالارىن وقۋ بويىنشا بايقاۋ وتكەن بولاتىن. ونىڭ ەرەجەسىنە ساي, ۇمىتكەرلەر اباي ولەڭدەرىن مانەرلەپ وقىپ, الەۋمەتتىك جەلىگە جۇكتەۋ كەرەك ەدى. اتالعان مۋزىكالىق كەشتە وسى بايقاۋدا وزا شاپقان ارىپتەسىمىز – «Egemen Qazaqstan» گازەتىنىڭ ءتىلشىسى بەكزات قۇلشار ماراپاتتالدى.
كەش قوناقتارىنا انشىلەر داستان ورازبەكوۆ, ءىزباسار كەڭەسوۆ, جەڭىس عاريفوللا, نۋريك بارماقوۆ ونەر كورسەتىپ, زور قوشەمەتكە يە بولدى. سونداي-اق ۆيكتورينالىق سۇراقتار قويىلىپ, 50-گە جۋىق ادامعا power bank, قۇلاققاپ, مۋزىكالىق ديناميك سياقتى بىرقاتار سىيلىق بەرىلدى.
حالىقارالىق جاستار كۇنىنە وراي وتكىزىلگەن مۋزىكالىق كەشتە ەسىل وزەنى جاعاسىنداعى اتىراۋ كوپىرى جانىندا Darkhan Juzz-گە ارنالعان ارت-نىسان اشىلدى. وعان جوبا باستاماشىسى, پروديۋسەر ازات ابىكەن جانە ءانشىنىڭ جانكۇيەرلەرى قاتىستى. ورىندىقتىڭ ديزاينىن تانىمال كوشە سۋرەتشىلەرى عالىمجان بالسارى مەن باتىرجان سادۋاقاسوۆ ازىرلەگەن. ورىندىقتا مۋزىكانتتىڭ ءومىرى مەن شىعارماشىلىعى تۋرالى اقپارات الۋعا بولاتىن QR كودى بار تاقتا قويىلعان.