جەتىسۋ وبلىسىنىڭ 333,5 مىڭ تۇرعىنى گازبەن قامتىلعان. وبلىس اكىمدىگى جىل سوڭىنا دەيىن تاعى 55 مىڭنان استام تۇرعىنى بار 27 ەلدى مەكەنگە گاز جەتكىزۋدى جوسپارلاپ وتىر, دەپ جازادى Egemen.kz.
27 ەلدى مەكەن قاتارىندا تەكەلى قالاسى, كوكسۋ, ەسكەلدى, قاراتال اۋداندارىنداعى بىرقاتار اۋىلدار جانە تالدىقورعان قالاسى ماڭىنداعى تۇرعىن اۋداندار بار.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنە سايكەس, ەسكەلدى اۋدانىنىڭ ەلدى مەكەندەرى مەن تەكەلى قالاسىن گازداندىرۋ ءۇشىن 2018 جىلى ۇزىندىعى 31,3 كم «تالدىقورعان-تەكەلى» جوعارى قىسىمدى گاز قۇبىرى سالىندى, ال 2022 جىلى رەسپۋبليكالىق بيۋدجەت قاراجاتىنا تەكەلى قالاسىندا جالپى ۇزىندىعى 195 كم ىشكى گاز تاراتۋ جەلىلەرىن سالۋ جۇمىستارى باستالعان. بۇگىنگى تاڭدا سونىڭ 147,5 كم نەمەسە 76% تارتىلدى. سول سياقتى قولدانىستاعى 190 كوپ قاباتتى ءۇيدىڭ 176-سى گاز جەلىسىنە بايلانىستىرىلدى. ءتيىستى جۇمىستار قازان ايىندا اياقتالادى دەپ كۇتىلۋدە. سوندا تەكەلى قالاسىنىڭ 30 مىڭنان استام تۇرعىنى كوگىلدىر وتىنعا قول جەتكىزە الادى.
ەسكەلدى اۋدانىندا 21 ەلدى مەكەننىڭ 8-ءى گازعا قول جەتكىزدى, ولار - الدابەرگەنوۆ, قارابۇلاق, ورقۋساق, ەكپىندى, ماتاي بايىسوۆ, ەلتاي, سىرىمبەت, باقتىباي اۋىلدارى. سوڭعى اتالعان ەكى اۋىلدىڭ جەكەلەگەن شاعىن اۋداندارىندا گازداندىرۋ جۇمىسى جالعاسىپ جاتىر. قازىرگى كەزدە قاراتال, كوكجازىق, تەرەكتى, ەشكىولمەس, اباي, شىمىر, جەتىسۋ, جاڭالىق, جاستار جانە وتەناي اۋىلدارىندا گاز تاراتۋ جەلىلەرىن سالۋ جۇمىستارى باستالعان. سونىمەن قاتار اقتاستى اۋىلىنداعى قۇرىلىس-مونتاج جۇمىستارىنا كونكۋرس اياقتالدى. ەسكەلدى اۋدانىن تولىق گازداندىرۋ ءۇشىن قالعان ەكى ەلدى مەكەن بويىنشا جوبالىق جۇمىستار قولعا الىنعان. قۇرىلىس-مونتاج جۇمىستارى 2025 جىلى اياقتالادى دەپ جوسپارلانعان. وسى جوبالاردى ىسكە اسىرۋ ناتيجەسىندە اتالعان اۋدان تولىعىمەن گازداندىرىلاتىن بولادى.
«جەتىسۋ وبلىسىنىڭ ەلدى مەكەندەرىن گازداندىرۋ ماسەلەسى – ستراتەگيالىق ماڭىزدى مىندەتتىڭ ءبىرى. وڭىردە بۇل باعىتتاعى جۇمىستار قارقىندى ءجۇرىپ جاتىر. ماسەلەن, جىل سوڭىنا دەيىن ەسكەلدى اۋدانىندا 9 اۋىلدىڭ – تەرەكتى, قاراتال, اباي, ەشكىولمەس, جەتىسۋ, جاستار, جاڭالىق, وتەناي, شىمىر اۋىلدارى جانە تەكەلى قالاسى تۇرعىندارىنىڭ ۇيلەرىنە گاز تارتۋعا مۇمكىندىك جاسالادى. قازان ايىنىڭ سوڭىنا دەيىن تەكەلىلىكتەر كوگىلدىر وتىنعا قوسىلا الادى, ال اتالعان 9 اۋىلدىڭ تۇرعىندارى گازعا تامىز ايىنىڭ سوڭىنان باستاپ جىل اياعىنا دەيىن كەزەڭ-كەزەڭىمەن قوسىلادى», دەدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ گازداندىرۋ ءبولىمىنىڭ باسشىسى ازامات كەمەلوۆ.
بۇگىندە جەتىسۋ وبلىسىندا گازداندىرۋ دەڭگەيى 47,6 پايىزعا جەتكەن, ال جىل سوڭىنا دەيىن بۇل كورسەتكىش 50%-دان اسادى دەپ بولجانىپ وتىر.
ەسكە سالساق, 2025 جىلدىڭ سوڭىنا دەيىن ءوڭىردىڭ 506,6 مىڭ تۇرعىنى بار 126 ەلدى مەكەنىن گازداندىرۋ جوسپارلانعان, ال گازداندىرۋدىڭ ەكىنشى كەزەڭىندە اقسۋ, الاكول جانە سارقان اۋداندارىنىڭ ەلدى مەكەندەرى كوگىلدىر وتىنمەن قامتىلادى. قازىرگى كەزدە «تالدىقورعان-ءۇشارال» ماگيسترالدى گاز قۇبىرى قۇرىلىسىنىڭ جوبالاۋ-سمەتالىق قۇجاتتاماسى ازىرلەندى. ماڭىزى زور اۋقىمدى جوبا وسى جىلدىڭ تامىز ايىنىڭ سوڭىندا ىسكە اسىرىلا باستايدى دەپ جوسپارلانعان. ونى اياقتاۋدىڭ الدىن الا بەلگىلەنگەن مەرزىمى - 2026 جىلدىڭ سوڭى. وسى جوبالار جۇزەگە اسىرىلعاندا جەتىسۋ وبلىسىندا گازداندىرۋ دەڭگەيى 100%-عا جەتكىزىلەتىن بولادى.