«قازاقستان» تەلەراديوكورپوراتسياسى سايىن مۇراتبەكوۆتىڭ «جابايى الما» پوۆەسىنىڭ جەلىسىمەن التى ءبولىمدى سەريال دايىنداپ جاتىر. ەكىجىلدىق جوبانىڭ بيىل ستسەناريى جازىلىپ, جازدىق سيۋجەتتەرى تۇسىرىلەدى. ءتۇسىرىلىمنىڭ باسىم جۇمىستارى قىستا بولادى. تەلەحيكايا كەلەسى جىلدىڭ مامىر ايىندا ەفيرگە جوسپارلانىپ وتىر.
سايىننىڭ «جابايى الماسى» كوپ وقىرمانعا تانىس. شىعارمادا سۇراپىل سوعىس جىلدارىنداعى تىلداعى اۋىر تىرشىلىك قاز-قالپىندا سۋرەتتەلەدى. كەيىپكەرلەر قانداي قيىنشىلىقتارعا, تاعدىردىڭ تالقىسىنا تۇسسە دە, ادامدىق بەينەنى, ادامگەرشىلىك قاسيەتتى جوعالتپاۋعا, ومىرگە دەگەن ۇمىتتەن تۇڭىلمەۋگە, تاعدىر تاۋقىمەتىنە مويىماۋعا, ادالدىق پەن ادىلدىكتى بايان ەتىپ, ادال جانىن, تازا نيەتىن ساقتاۋعا تىرىسادى.
جاڭا جوبانىڭ پروديۋسەرى – نازگۇل قارابالينا, قويۋشى-رەجيسسەرى – ايدىن ساحامان, ستسەناري اۆتورى – قانات رامازان. اكتەرلىك قۇرامعا كەلسەك, قاناتتى – زاڭعار ميات ۇلى, نازيرانى – جانەل اتامبەكوۆا, باعيلانى – نازگۇل قارابالينا, زيباش – مادينا كەلگەنباي, نۇرسۇلۋدى – مادينا قۇلسەيىتوۆا, ءبۇبىنايدى – زاۋرە كوپجاساروۆا, بايدالىنى ومار قيقىم وينايدى.
«ۇلكەن شىعارمانى التى سەرياعا سىيدىرۋ مۇمكىن ەمەس. سوندىقتان كەي سيۋجەتتەردى ستسەناريدە قامتي المادىق. ياعني 70-80 پايىزى كىتاپتان الىنسا, 20-30 پايىزى – ستسەناري اۆتورىنىڭ ەڭبەگى. سوعىس كەزىندە بولعاندىقتان وقيعا ۋاقىتىن اۋىستىرۋعا تۋرا كەلدى. شىعارمادا كوپ سيۋجەت جازدا بولسا, سەريالدا قىستا سۋرەتتەلەدى. اكتەرلىك قۇرام تەاترلاردان جيناقتالدى. ءبارى – ەلگە بەلگىلى, تانىلعان ونەر ادامدارى. سول كەزدەگى قازاق دالاسىن ءتۇسىرۋ, شىنايىلىقتان الىستاماۋ وڭاي ەمەس. الماتى ماڭىنداعى اقوزەك دەگەن اۋىل تاڭداپ الىندى. سۋرەتشىلەر سول زامانعا ساي ەتىپ, دەكوراتسيالارىن جاسادى, رەكۆيزيتتەر ىزدەپ, كوستيۋمدەردى لايىقتاپ تىگۋ ءبىراز ۋاقىت پەن كۇش-قۋاتتى قاجەت ەتەدى. قازىر جازعى ءتۇسىرىلىم جۇمىستارىن اياقتادىق. ەڭ نەگىزگى قىستا بولاتىن تۇسىرىلىمگە دايىندالىپ جاتىرمىز», دەيدى رەجيسسەر ايدىن ساحامان.