ەلورداداعى ۇلتتىق اكادەميالىق كىتاپحانادا فيلولوگيا عىلىمدارىنىڭ دوكتورى, پروفەسسور, مەملەكەت جانە قوعام قايراتكەرى مىرزاتاي جولداسبەكوۆتىڭ جەكە كىتاپحاناسى اشىلدى.
سالتاناتتى اشىلۋ راسىمىندە پرەمەر-ءمينيستردىڭ ورىنباسارى بەردىبەك ساپارباەۆ عالىمنىڭ ەلورداداعى ەڭ ۇلكەن كىتاپحاناعا كىتاپتارىن وتكىزۋىن وزگەلەرگە ونەگە بولار ۇلكەن وقيعا رەتىندە باعالادى. «كىتاپ – ءبىلىم, مادەنيەت, بولاشاق. سوندىقتان ونىڭ قادىرىن ءبىلۋىمىز كەرەك. مەملەكەت باسشىسى ۇلگى كورسەتىپ, ارنايى كىتاپحانا اشقان بولاتىن. مىنە, كەزىندە بىرگە قىزمەت اتقارعان ارىپتەسى, ەل اعاسى, قوعام قايراتكەرى مىرزەكەڭ دە كىتاپحاناعا ءوز كىتاپتارىن وتكىزىپ وتىر. مۇنداي ماڭىزداعى ءىس-شارا بۇدان كەيىن دە جالعاسىن تاۋىپ جاتسا نۇر ۇستىنە نۇر بولماق» – دەدى ول.
شارا بارىسىندا كومپوزيتور, ونەر زەرتتەۋشىسى ءىليا جاقانوۆ تۇركىتانۋشى عالىمنىڭ شىعارماشىلىعى تۋرالى زەرتتەۋگە كىرىسكەنىن بايانداي كەلىپ, جىلدار بويى جيناعان رۋحاني بايلىعىنان وزگەلەردىڭ دە سۋسىنداۋىن ءجون دەپ تاپقان زامانداسىنا العىسىن ايتتى. سونداي-اق, بۇل كەشتە ءماجىلىس دەپۋتاتى قۋانىش سۇلتانوۆ وقيعانى ەلدىڭ رۋحاني ساناسىنىڭ وسۋىنە سەپتىگىن تيگىزەتىن ءارى زيالى قاۋىمنىڭ ساپاسىن كورسەتەتىن جاعداي دەپ اتاپ ءوتتى.
«مەنىڭ زامانداستارىم دۇنيە ەمەس, كىتاپ جينادى. مەن دە بۇلاردى جىلدار بويى تىرنەكتەپ جيىپ ەدىم. بۇلاردىڭ ىشىندە سىرلاسىم دا, مۇڭداسىم دا كوپ. بىرگە ۇيىقتاپ, بىرگە وياناتىن, جاتا-جاستانا وقيتىن كىتاپتارىم دا بولدى. ەندى مىنە, ءبارىن كىتاپحاناعا وتكىزىپ وتىرمىن...» – دەگەن بەلگىلى عالىم كىتاپتارىن ءوتكىزۋگە سەبەپشى بولعان ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆا ەكەنىن دە ايتتى. سونداي-اق, وزىندەگى قازىنا تەك كىتاپتارمەن شەكتەلمەيتىنىن, بولاشاقتا قازاقتىڭ اتاقتى دومبىرا شەبەرلەرىنىڭ جاساعان اسپاپتارىن وتكىزۋدى دە ويلاستىرىپ جۇرگەنىن دە مالىمدەدى.
ۇلتتىق اكادەميالىق كىتاپحانانىڭ ەكىنشى قاباتىندا ورنالاسقان عالىم مىرزاتاي جولداسبەكوۆتىڭ جەكە كىتاپحاناسى اقپاراتتىق, مادەني جانە ءبىلىم بەرۋ مىندەتتەرىن ورىندايتىن بولادى. ياعني, بۇل زالدا عالىمدار مەن ماگيسترانتتارعا, باسقا دا پايدالانۋشىلارعا اقپاراتتىق-بيبليوگرافيالىق قىزمەت ۇسىنىلىپ, سونداي-اق ارا-تۇرا مادەني-كوپشىلىك شارالار دا وتكىزىلىپ تۇرماق. قازىرگى كەزدە جەكە كىتاپحانانىڭ قورىندا توعىز جارىم مىڭعا جۋىق كىتاپ پەن كادەسىيلار, پورترەتتەر, مەدالدار مەن مونەتالار بار. كىتاپحاناعا جينالعان جۇرتشىلىق ەلباسىنىڭ ونەگەسىن جالعاستىرعان ەل اعاسىنا ريزاشىلىعىن ءبىلدىرىپ, «مىرزەكەڭ مىرزا ەكەن» دەپ تاراستى.
ايگۇل سەيىلوۆا,
«ەگەمەن قازاقستان».