كەشە جەرگىلىكتى ۋاقىتپەن 13 ساعات 12 مينۋتتا اتىراۋ قالاسىنا تاياۋ ورنالاسقان جۇمىسكەر ەلدى مەكەنىندەگى يساتاي تايمانوۆ اتىنداعى مەكتەپتە وقيتىن وقۋشىلاردىڭ ءبىر توبى, دالىرەك ايتقاندا, 21 شاكىرت وزدەرىن ناشار سەزىنگەندىكتەرىنە شاعىم بىلدىرگەن. كەيىن انىقتالعانداي ولاردىڭ بارلىعى بەلگىسىز زاتتان ۋلانعان.
شۇعىل حابار الىسىمەن اتالعان مەكتەپكە «جەدەل جاردەم» قىزمەتىنىڭ 3 بريگاداسى دەرەۋ اتتانىپ, ۋلانعان وقۋشىلاردىڭ بارلىعىن وبلىستىق بالالار اۋرۋحاناسىنا جەتكىزدى. مۇنداعى دارىگەرلەر ازىرگە انىقتالا قويماعان, بەلگىسىز زاتتان ۋلانعان 21 وقۋشىنىڭ بارلىعىن اۋرۋحانادا قالدىرۋ جونىندە شەشىم قابىلدادى. ولاردىڭ بارلىعىنا مەديتسينالىق كومەك كورسەتىلىپ, ساقتاندىرۋ شارالارى قولعا الىندى. جانساقتاۋ بولىمىنە ەشكىم جاتقىزىلعان جوق.
وسى وقيعاعا وراي اۋرۋحاناعا وبلىس اكىمى باقتىقوجا ءىزمۇحامبەتوۆ ارنايى بارىپ, جاعدايمەن قانىقتى. قۇزىرلى ورگاندارعا وقيعا سەبەبىن انىقتاۋدى تاپسىرىپ, سىرقاتتارعا تولىق ەم جاساۋدى مىندەتتەدى دەپ حابارلادى وبلىس اكىمىنىڭ ءباسپاسوز قىزمەتى. قازىرگى كەزدە ۋلانعان وقۋشىلاردىڭ بارلىعى دارىگەرلەردىڭ ءجىتى باقىلاۋىندا.
جولداسبەك شوپەعۇل,
«ەگەمەن قازاقستان».
اتىراۋ وبلىسى.