جىل سوڭىنا دەيىن ەلىمىزدەگى حيميا ونەركاسىبى سالاسىندا جوبالىق قۇنى 12,9 ملرد تەڭگەنى قۇرايتىن 8 كاسىپورىن پايدالانۋعا بەرىلەدى دەپ جوسپارلانعان. بۇل شامامەن 350 جاڭا جۇمىس ورنىن قۇرۋعا مۇمكىندىك بەرەدى, دەپ حابارلايدى Egemen.kz.
«QazIndustry» اق جوبالاردى ىسكە اسىرۋعا مونيتورينگ جۇرگىزۋ جانە تالداۋ ديرەكتسياسىنىڭ حابارلاۋىنشا, جوبالاردىڭ ىشىندە سۇيىق ازوت, ناتري ءپيروسۋلفيتى, حيميالىق رەاگەنتتەر وندىرىستەرى بار. شىعارىلادى دەپ جوسپارلانعان ونىمدەردىڭ شامامەن 70 % - ى ەلىمىزدىڭ ىشكى قاجەتتىلىكتەرىنە باعىتتالادى.
ايتا كەتەيىك, بيىلعى جىلى وسى سالادا قازاقستاندا 2 حيميالىق كاسىپورىن ىسكە قوسىلعان. اتاپ ايتساق, ماڭعىستاۋ وبلىسىندا امموني سۋلفاتىن ءوندىرۋ جانە الماتىدا تۇرمىستىق حيميا جانە جەكە گيگيەنا قۇرالدارىن شىعارۋ كاسىپورىندارى. اتالعان جوبالارعا 4,1 ملرد تەڭگە ينۆەستيتسيا تارتىلىپ, 36 جاڭا جۇمىس ورىندارى قۇرىلعان.
«جۇزەگە اسىرۋ ساتىسىندا قۇنى 790 ملرد تەڭگەنى قۇرايتىن تاعى 22 جوبا بار. ولاردىڭ ىشىندە جاسىل سۋتەگى, ۋران توتىعى, ليتي كاربوناتى, پوليۆينيلحلوريد, امموني پاراۆولفراماتى جانە باسقا دا حيميالىق ونىمدەر ءوندىرىسى بار. بۇل نىسانداردىڭ اشىلۋى 4700 جۇمىس ورنىن قۇرۋعا مۇمكىندىك بەرەدى. جاڭا كاسىپورىندار ءونىمىنىڭ 45% - دان استامىن جاقىن جانە الىس شەتەلدەرگە ەكسپورتتاۋ جوسپارلاندى. الداعى ۋاقىتتا سالادا قۇنى 13,4 ترلن تەڭگە بولاتىن 26 مىڭنان استام جۇمىس ورنىن قۇرۋمەن 62 جوبا پىسىقتالىپ جاتىر. وتاندىق جانە شەتەلدىك ينۆەستورلارمەن بىرلەسىپ پوليەتيلەن, كالي تىڭايتقىشتارى, اممياك سەليتراسى, ناتري ءتسيانيدى جانە حيميا ونەركاسىبىنىڭ باسقا دا ونىمدەرىن ءوندىرۋدى ىسكە قوسۋ جوسپارلاندى», دەپ حابارلادى ونەركاسىپ جانە قۇرىلىس مينيسترلىگىنىڭ ءباسپاسوز قىزمەتى.
جالپى حيميا ونەركاسىبى پورتفەلىندە بارلىعى 94 جوبا بار. ولاردىڭ قۇنى 14,2 ترلن تەڭگەدەن اسادى. اتالعان جوبالاردى تولىق ىسكە اسىرۋ كەزىندە 31,5 مىڭعا جۋىق جاڭا جۇمىس ورنى قۇرىلادى.