كۇنى كەشە عانا ەلورداداعى Mega Silk way ورتالىعىندا ءادىلحان ەرجانوۆتىڭ «دالا قاسقىرى» ءفيلمىنىڭ جابىق كورسەتىلىمى ءوتتى. كينوجوبا مادەنيەت جانە اقپارات مينيسترلىگى, ۇلتتىق كينونى قولداۋ مەملەكەتتىك ورتالىعى جانە «Golden Man Media» كومپانياسىنىڭ قولداۋىمەن تۇسىرىلگەن. 15 تامىزدان باستاپ ەل كينوتەاترلارىنا جول تارتپاق.
«دالا قاسقىرى» – تريللەر مەن دراما ەلەمەنتتەرى استاسقان تۋىندى. شىعارماشىلىق توپ ستسەناريگە التى جىل بۇرىن كىرىسىپ, ءتۇسىرىلىم جۇمىستارى 2021 جىلى باستالعان.
فيلم ءتۇسىرىلىمى ەلىمىزدە, اتاپ ايتقاندا, الماتى جانە جەتىسۋ وبلىستارىنىڭ اۋماعىندا وتكەن. وعان 100-دەن استام مامان جۇمىلعان. قاۋىپتى تريۋكتەردى ەلىمىزدىڭ كاسكادەرلەرى ورىندادى, بۇعان قوسا بەلورۋسسيادان ارنايى ماماندار دا شاقىرىلعان. فيلمدە جوعالعان ۇلىن ىزدەگەن تامارا ەسىمدى ايەلدىڭ وقيعاسى باياندالادى. ول كومەككە جۇگىنىپ, دەتەكتيۆ جالدايدى جانە بۇل شەشىمى كۇتپەگەن سالدارعا اكەلەدى.
«دالا قاسقىرى» – زورلىق-زومبىلىق, كەك قانشالىقتى ءوزىن اقتايتىنى, كۇشتى ايەل تۋرالى فيلم. كەيىپكەر ءبىر قاراعاندا ءالسىز كورىنەدى, بىراق ءىس جۇزىندە ونىڭ مىنەزى مەن رۋحى مىقتى. فيلم حالىقارالىق اۋديتوريانىڭ نازارىن اۋداردى. حالىقارالىق فەستيۆالدە جۇلدەلى ورىندارعا يە بولىپ, تابىسقا جەتىپ جاتىر», دەيدى ءفيلمنىڭ پروديۋسەرى ءاليا مەڭدىعوجينا.
«دالا قاسقىرى» جاقىندا كاناداداعى «Fantasia Film Festival» فەستيۆالىندە توپ جاردى. ءدۇبىرلى دودادا فيلم اكتەرلەرى بەرىك ايتجانوۆ پەن اننا ستارچەنكو «ۇزدىك اكتەر» اتانعان ەدى. سونىمەن قاتار فيلم وپەراتورى ەركىنبەك پتىراليەۆ وسكار اكادەمياسىنىڭ مۇشەسى بولدى.
«دالا قاسقىرى» – جانرلىق كينو. بالاسىن جانۇشىرا ىزدەگەن انانىڭ ەشنارسەدەن تايسالماي, كەدەرگىلەرگە قاراماي, ءتىپتى قاۋىپپەن بەتپە-بەت كەلە العا ۇمتىلاتىنىن باياندايدى. تۋىندىنىڭ باسقا سيۋجەتتىك جەلىسى جوق, ول ورىن العان وقيعانىڭ اينالاسىن عانا ايشىقتاپ, كورەرمەنگە تاپ-تۇيناقتاي ەتىپ جەتكىزەدى», دەيدى رەجيسسەر ءادىلحان ەرجانوۆ.
ەسكە سالساق, اتالعان تۋىندى وتكەن جىلى روتتەردام كينوفەستيۆالىندە جوعارى باعالاندى. سونداي-اق بەلگيادا وتكەن حالىقارالىق كينوفەستيۆالدە باس جۇلدە يەلەندى. ReimsPolar 2024 كينوفەستيۆالىندە دە ماراپاتتالعان بولاتىن.