كلۋب دەگەندە ساحناسىندا ارتىستەردىڭ كونتسەرتى مەن اكىمدەردىڭ جينالىسى وتەتىن اۋىلداعى كادىمگى كلۋب ەكەن دەپ قالماڭىز. بۇل جولعى ساۋداعا فۋتبول كلۋبى ءتۇسىپ جاتىر. ياعني, جامبىل وبلىسىنداعى سپورت سالاسىنىڭ باسشىلارى تەڭبىل دوپقا تەڭگە جۇمسايتىن قالتاسى قالىڭ ازاماتتاردى ىزدەۋدە. ناقتىراق ايتقاندا, ەلىمىزدىڭ ءبىرىنشى ليگاسىندا ونەر كورسەتەتىن «لاشىن» كومانداسى 520 مىڭ تەڭگەگە ساتىلعالى جاتىر. بۇل ساۋداعا قىزىققان كەز كەلگەن ۇمىتكەر كلۋبتىڭ قوجايىنى بولا الادى.
وبلىستىق دەنەشىنىقتىرۋ جانە سپورت باسقارماسىنىڭ باسشىسى گاملەت قايناربەكوۆتىڭ ايتۋىنا قاراعاندا, كلۋبتى ساتىپ الۋ وڭاي, بىراق, ونى كەرەك-جاراقپەن قامتاماسىز ەتۋ, ءتۇرلى دەڭگەيدەگى جارىستارعا شىعارىپ, ويىنشىلار مەن جاتتىقتىرۋشىلاردىڭ جالاقىسىن تولەۋ ۇلكەن ماشاقات. ازىرگە بۇل شىعىندارعا وبلىستىق بيۋدجەتتەن جىل سايىن 100-120 ملن. تەڭگە كولەمىندە قارجى ءبولىنىپ كەلەدى. ايتا كەتۋ كەرەك, «لاشىن» كلۋبى وسىدان بەس جىل بۇرىن تاراز قالاسىندا قۇرىلعان بولاتىن. الايدا, ءبىر جىلدان كەيىن قاراتاۋ قالاسىنا كوشىرىلدى. كوماندا جىلدا ءبىرىنشى ليگاداعى ويىندارعا تۇراقتى تۇردە قاتىسىپ كەلەدى. بىلتىرعى ماۋسىمدا 27 ۇپاي جيناپ, 15 كوماندانىڭ ىشىندە 11-ءشى ورىن العان بولاتىن.
ءسويتىپ, مەملەكەتتىك كاسىپورىنداردى باسەكەلىك ورتاعا شىعارۋ ءتارتىبى بويىنشا «لاشىن» فۋتبول كلۋبىنا كونكۋرس ءوتىپتى. بىراق ەشكىم قىزىعۋشىلىق تانىتپاعان...
ورالحان ءداۋىت,
«ەگەمەن قازاقستان».
جامبىل وبلىسى.