قوستانايدا پوليتسيا قىزمەتكەرلەرى تۇيەنىڭ يەسىن انىقتاپ, جاۋاپقا تارتتى, دەپ حابارلايدى Egemen.kz.
انىقتالعانداي, وقيعا 12 تامىز تۇندە قوستاناي – قارابۇتاق اۆتوجولىنىڭ 59-شاقىرىمىندا بولعان. GEELY اۆتوكولىگىنىڭ جۇرگىزۋشىسى قاراۋسىز جايىلىپ جۇرگەن ەكى تۇيەنى قاعىپ كەتكەن. سالدارىنان تۇيەلەر ءولىپ, جۇرگىزۋشىگە ماتەريالدىق شىعىن كەلتىرىلگەن.
پوليتسەيلەر تۇيە يەسىنىڭ ب.مايلين اۋدانىنىڭ يۋبيلەينوە اۋىلىنىڭ 50 جاستاعى تۇرعىنى ەكەنىن انىقتاعان. بۇعان دەيىن ەر ادام اۋىل شارۋاشىلىعى جانۋارلارىن جايۋ ەرەجەلەرىن بۇزعانى ءۇشىن بىرنەشە رەت جاۋاپقا تارتىلعانى بەلگىلى بولدى.
بۇل جولى قۇقىق بۇزۋشىلار اكىمشىلىك كودەكستىڭ ەكى بابى بويىنشا جول ەرەجەلەرىن جانە جوعارىدا اتالعان ەرەجەلەردى بۇزعانى ءۇشىن جاۋاپقا تارتىلدى. وعان شامامەن 45 مىڭ تەڭگە ايىپپۇل سالىندى. سونىمەن قاتار ول كەلتىرىلگەن زالالدى وتەۋگە مىندەتتەلەدى.