اباي وبلىسىندا «جايلى مەكتەپ» قاناتقاقتى ۇلتتىق جوباسى اياسىندا 5700 وقۋشىعا ارنالعان 11 مەكتەپ سالۋ جوسپارلانعان. وسى جوبا شەڭبەرىندە بىلتىر 5 مەكتەپتىڭ قۇرىلىسى باستالسا, بيىل 6 ءبىلىم ورداسىنىڭ قابىرعاسى قالانىپ جاتىر.
سالىنۋعا جوسپارلانعان 11 مەكتەپ بويىنشا جەر ۋچاسكەلەرى انىقتالىپ «Samruk-Kazyna Construction» اق-عا راسىمدەلدى. قازىرگى تاڭدا 4 مەكتەپ بويىنشا مەردىگەر ۇيىم انىقتالىپ, قۇرىلىس جۇمىستارى قارقىن الدى.
سونداي-اق سەمەي قالاسىنداعى قاراعايلى تۇرعىن اۋدانىنداعى 1200 ورىندىق ورتا مەكتەپ قۇرىلىسىنىڭ اياقتالۋ مەرزىمى بيىلعى قىركۇيەك-جەلتوقسان ايى دەپ بەلگىلەنگەن. وبلىستىق ءبىلىم باسقارماسى ۇسىنعان دەرەككە سەنسەك, قازىرگى كۇنى قۇرىلىس جۇمىستارىنىڭ 56% عانا ويداعىداي اتقارىلعان. بىراق قۇرىلىس جۇمىسى بەرىلۋ مەرزىمى كەستەسىنەن ارتتا قالىپ كەلە جاتقانى بايقالادى.
وبلىس ورتالىعىنداعى ۆودنىي كەنتىندە تاعى ءبىر وسىنداي مەكتەپ بوي كوتەرىپ جاتىر. بۇل وقۋ ورداسى 600 ورىنعا جوبالانعان. مۇنداعى قۇرىلىس جۇمىستارىنىڭ اياقتالۋ مەرزىمى دە الداعى قىركۇيەك-جەلتوقسان ايى دەپ كورسەتىلگەن. بىراق قۇرىلىس جۇمىستارى دا كەستەدەن كەشىگىپ كەلەدى. بۇگىنگە دەيىن نىسان قۇرىلىسىنىڭ 49%-عا جۋىعى اياقتالعان. الايدا ءبىلىم سالاسىنىڭ ماماندارى ەكى مەكتەپتى بيىلعى جەلتوقسان ايىندا پايدالانۋعا بەرەمىز دەپ سەندىرىپ وتىر.
بۇعان قوسا اتالعان «جايلى مەكتەپ» قاناتقاقتى جوباسى اياسىندا اياگوز قالاسىندا 600 ورىندىق, بەسقاراعاي جانە اقسۋات اۋىلدارىندا 300 ورىندىق مەكتەپ سالۋ جوسپارلانعان. مەردىگەر ۇيىم اتالعان مەكتەپتەردىڭ قۇرىلىسىن كەلەسى جىلى اياقتاپ, اتالعان ەلدى مەكەندەردەگى وقۋشىلار 2025 جىلدان جاڭا مەكتەپتە وقيدى.
اباي وبلىسى