ەلىمىزدە ۇلتتىق جاستار ونكۇندىگى قورىتىندىلاندى. مەرەكەلىك باعدارلاما ءار وڭىردە اشىق اسپان استىنداعى «جاستارمەن بىرگە» كونتسەرتىمەن تۇيىندەلدى. رەسپۋبليكا بويىنشا 3-12 تامىز ارالىعىندا بارلىعى 5 مىڭنان استام ءىس-شارا وتكىزىلدى.
بۇگىندە 14 پەن 35 ارالىعىنداعى ەل جاستارى 5,7 ملن-دى قۇرايدى. جىل باسىنان بەرى 20 مىڭنان استام ازامات كاسىبي باعدار بەرۋ جۇمىستارىمەن قامتىلدى. 130 مىڭنان استام جاس بۋىن قولداۋعا باعىتتالعان مەملەكەتتىك باعدارلامالار مەن باستامالاردىڭ باعىتتارى بويىنشا كونسۋلتاتسيالىق كومەك الدى.
مەملەكەت باسشىسى قاسىم-جومارت توقاەۆتىڭ تاپسىرماسىمەن 2023-2029 جىلدارعا ارنالعان مەملەكەتتىك جاستار ساياساتىنىڭ تۇجىرىمداماسىنا ءتيىستى وزگەرىستەر مەن تولىقتىرۋلار ەنگىزۋ بويىنشا جۇمىستار جۇرگىزىلىپ جاتىر.
جاستاردىڭ باس اۋرۋىنا اينالعان باسپانا ماسەلەسى دە بىرتىندەپ شەشىلىپ كەلەدى. بيىل ناۋرىز ايىندا «9-20-25 وتاۋ» جاڭا يپوتەكالىق باعدارلاما ىسكە قوسىلدى. بۇگىندە باعدارلاما يگىلىگىمەن 16 747 جاس وتباسى ءۇيلى بولۋعا نيەتتەنگەن. سونداي-اق 18 جاستان 35 جاسقا دەيىنگى جۇمىس ىستەيتىن وتانداستارىمىز ءۇشىن ەلىمىزدىڭ 16 وڭىرىندە جىلدىق كرەديت بويىنشا پايىزدىق مولشەرلەمەسى – 5%, باستاپقى جارناسى – 10% جانە مەرزىمى 25 جىلعا دەيىنگى جەڭىلدەتىلگەن تۇرعىن ءۇي باعدارلامالارى ىسكە اسىرىلدى.
ودان قالدى «جۇمىس ىستەپ جۇرگەن جاستارعا ساتىپ الۋ قۇقىعىنسىز جالعا بەرىلەتىن تۇرعىنجاي بەرۋ قاعيدالارىن بەكىتۋ تۋرالى» بۇيرىققا وزگەرىس ەنگىزىلدى. قاعيدادا جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي الۋ ءۇشىن جىل سايىنعى جيناقتاۋ شەگىن ەنگىزۋ كوزدەلدى.
شىعارماشىلىق جانە بەلسەندى جاستاردى قولداۋعا قاتىستى «دارىن» مەملەكەتتىك سىيلىعىنىڭ قاعيدالارىنا تولىقتىرۋلار ەنگىزىلدى. بىرىنشىدەن, سىيلىقاقى مولشەرى 600 مىڭ تەڭگەدەن 1 ميلليون تەڭگەگە دەيىن ۇلعايتىلدى. ەكىنشىدەن, «قوعامدىق قىزمەت» جاڭا اتالىمى قوسىلدى.
جاستار ساياساتىنىڭ نەگىزگى باعىتتارى – جۇمىسسىزدىق, تۇرعىن ءۇي ماسەلەلەرىن شەشۋ, بيزنەس-باستامالاردى قولداۋ, سونداي-اق ءبىلىم مەن مادەنيەت دەڭگەيىن كوتەرۋ دە جۇيەلى جۇزەگە اسىرىلىپ كەلەدى.
«Zhas project» جوباسى اياسىندا بيىل اۋىل جاستارى اراسىندا 280 گرانت ءبولىنىپ, بيزنەس-جوبالارىن ىسكە اسىرۋ ءۇشىن NEET ساناتىنا قولداۋ كورسەتىلدى.
بۇعان قوسا «تاۋەلسىزدىك ۇرپاقتارى» جوباسى بيىل دا جالعاستى. جەڭىمپازدارعا 3 ملن تەڭگە كولەمىندە 30 گرانت ءبولۋ كوزدەلگەن. باستىسى ۆولونتەرلىك سالانى قولداۋ ماقساتىندا «ۆولونتەرلىك» باعىت قوسىلدى.