كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ بىرىككەن ۇلتتار ۇيىمى ايتۆ/جيتس جونىندەگى بىرىككەن باعدارلاماسىنىڭ (يۋنەيدس) شىعىس ەۋروپا جانە ورتالىق ازياداعى وڭىرلىك ديرەكتورى ۆينەي سالدانانى قابىلدادى, دەپ حابارلادى سەناتتىڭ ءباسپاسوز قىزمەتى.
مەيمانمەن جۇزدەسۋدە ق.توقاەۆ ۆ.سالدانانىڭ تاياۋدا وسى جاۋاپتى لاۋازىمعا تاعايىندالۋى يۋنەيدس-ءتىڭ ايماقتاعى جۇمىسىن ۇدەتۋگە ىقپال ەتەتىنىنە سەنىم ءبىلدىردى. سەنات توراعاسىنىڭ پىكىرىنشە, بۇۇ-نىڭ 11 ۇيىمىنىڭ قىزمەتىن ۇيلەستىرەتىن يۋنەيدس جيتس جۇقپالى اۋرۋىنا دياگنوستيكا جاساۋ, الدىن الۋ, ەمدەۋ جانە اقىرىندا جويۋدى باعدار ەتكەن الەمنىڭ ءتۇرلى ايماقتارىنداعى قىزمەتىندە ەلەۋلى ناتيجەلەرگە قول جەتكىزدى.
ۆ.سالدانا جيتس-پەن كۇرەس جونىندەگى قازاقستان جۇرگىزىپ كەلە جاتقان جۇمىستاردى جوعارى باعالادى جانە وسى كوكەيكەستى ماسەلەنى شەشۋدە پارلامەنت پەن ۇكىمەتتىڭ ءوزارا ءىس-قيمىلىنىڭ ماڭىزدىلىعىن اتاپ ءوتتى. «جيتس-پەن كۇرەستە قازاقستان 2020 جىلى ورتالىق ازيا جانە تمد-داعى الدىڭعى ساپتاعى ەل بولادى دەپ كۇتەمىز», – دەدى يۋنەيدس-ءتىڭ ءوڭىرلىك ديرەكتورى. ۇيىم ەلدەگى الماتى كەڭسەسىن ايتۆ جۇقپالى اۋرۋىنا دياگنوستيكا جاساۋ, الدىن الۋ, ەمدەۋ جانە مونيتورينگ جۇرگىزۋ جونىندەگى شارالاردى ۇيلەستىرۋ ماقساتىندا ورتالىق ازياداعى رەسۋرستىق ورتالىق دەڭگەيىنە دەيىن نىعايتۋدى جوسپارلاپ وتىر.
سەنات توراعاسى جۇزدەسۋشىنى ەلدەگى الەۋمەتتىك-ەكونوميكالىق احۋالمەن, ورتالىق ازياداعى جاعدايمەن جانە پارلامەنتتىڭ زاڭ شىعارۋ قىزمەتىمەن تانىستىردى.
ۆ.سالدانا پرەزيدەنت ن.نازارباەۆتىڭ ۋكراين شيەلەنىسىن رەتتەۋ تۋرالى باستاماسى مەن ونىڭ استانادا «نورماند ءتورتتىگىنىڭ» كەزدەسۋىن وتكىزۋ تۋرالى ۇسىنىسى الەمدىك قوعامداستىق تاراپىنان ريزاشىلىقپەن قابىل الىنعانىن جانە ول بۇۇ تاراپىنان قولداۋ تاپقانىن اتاپ ءوتتى.