ءماجىلىس دەپۋتاتتارىنىڭ وڭىرلەردەگى جۇمىسى جالعاسىپ كەلەدى. بۇگىن «AMANAT» پارتياسى فراكتسياسىنىڭ مۇشەسى بولات كەرىمبەك تالدىقورعانداعى ورتالىق ستاديوننىڭ رەكونسترۋكتسيا بارىسىمەن تانىسىپ, وبلىستىڭ سپورت قوعامداستىعىمەن كەزدەستى, دەپ حابارلايدى Egemen.kz.
تالدىقورعان ورتالىق ستاديونى قايتا جاڭارتىلعاننان كەيىن 1500 كورەرمەندى قابىلداي الادى, بۇل بۇرىنعىدان 500 ورىنعا ارتىق. جاڭارتىلعان الاڭدا «جەتىسۋ» فۋتبول كلۋبىنىڭ 400-دەن استام تاربيەلەنۋشىسى جاتتىعۋلارىن جالعاستىرا الادى. ال العاشقى فۋتبول ماتچى 18 تامىزدا وتەدى.– جۇرتشىلىق ارقاشان سپورتقا ەرەكشە كوڭىل بولەدى. وعان اسىرەسە جاقىندا وتكەن وليمپيادا ويىندارى دا سەپ بولدى. بولاشاقتا ەلىمىزدى ۇلكەن سپورتتا جارقىن جەڭىستەر كۇتىپ تۇرعانىنا سەنىمدىمىن. مەملەكەت پەن «AMANAT» پارتياسى بارلىق قالا مەن اۋىلدا دەنە شىنىقتىرۋ جانە سپورتپەن شۇعىلدانۋ ءۇشىن جاعداي جاساۋعا كۇش سالىپ جاتىر. قازىر «جەتىسۋ» فۋتبول كلۋبىندا جاتتىعىپ جۇرگەن بالالاردىڭ ىشىنەن بولاشاقتا الەمدىك دەڭگەيدەگى جۇلدىزدار ءوسىپ شىعۋى ابدەن مۇمكىن, – دەدى بولات كەرىمبەك.
سپورتشىلارمەن كەزدەسۋدە دەپۋتات پارتيانىڭ كاسىبي جانە بۇقارالىق سپورتتى دامىتۋ, سونداي-اق سالاۋاتتى ءومىر سالتىن ناسيحاتتاۋ جونىندەگى باسىمدىقتارى تۋرالى ايتتى. قازىرگى ۋاقىتتا ءماجىلىستىڭ الەۋمەتتىك-مادەني دامۋ كوميتەتىندە دەنە شىنىقتىرۋ جانە سپورت ماسەلەلەرى تۋرالى زاڭ جوباسى قارالىپ جاتىر. ەگەر قازىر قازاقستاندا 180 سپورت ءتۇرى دامىعان بولسا, ەندى وليمپيادا, پاراليمپيادا, سۋردليمپيادا, ازيا جانە پاراازيالىق ويىندار باعدارلاماسىنا ەنگىزىلگەن سپورت تۇرلەرىنە باسىمدىق بەرىلەدى. سونىمەن قاتار زاڭ جوباسى سپورت رەزەرۆىن دايىنداۋدى جەتىلدىرۋگە باعىتتالعان, ول ءۇشىن ۇلتتىق سپورتتىق دايارلىق ستاندارتتارى ازىرلەنىپ, بەكىتىلەدى.
مەملەكەت پەن پارتيا وڭىرلەردە بۇقارالىق سپورتتى دامىتۋعا ەرەكشە نازار اۋدارادى. ماسەلەن, وتكەن جىلى «AMANAT» پارتياسىنىڭ جەتىسۋ وبلىسى بويىنشا سايلاۋالدى باعدارلاماسى اياسىندا باسشي جانە شانحاناي اۋىلدارىندا كۇرەس زالدارى, كەربۇلاق اۋدانى سارىوزەك اۋىلىنداعى ورتالىق ستاديون, الاكول اۋدانىنىڭ بەسكول اۋىلىندا, پانفيلوۆ اۋدانىنىڭ پەنجىم جانە ۇلكەن شىعان اۋىلدارىندا, قاراتال اۋدانىنىڭ كالپە جانە ەسكەلدى اۋدانىنىڭ كوكجازىق اۋىلدارىندا سپورت كەشەندەرى پايدالانۋعا بەرىلدى. سارقان قالاسىندا جابىق فۋتبول مانەجى سالىنىپ, ورتالىق ستاديون جاڭارتىلدى.