ۇلتتىق وليمپيادالىق كوميتەت پاريج وليمپياداسىنىڭ جۇلدەسىنە قول سوزىم قالعاندا ويىننان شىعىپ قالعان ەل سپورتشىلارىنىڭ وندىعىن ۇسىندى, دەپ جازادى Egemen.kz.
دزيۋدودان ايەلدەر اراسىنداعى باسەكەدە ابيبا ابۋجاقىنوۆا قولا مەدال ءۇشىن وتكەن سىندا شۆەتسيالىق تارا بابۋلفاتتان جەڭىلىپ, جارىستى بەسىنشى ورىنمەن اياقتادى.
گيمناست ميلاد كاريمي دە بەسىنشى ورىننان كورىندى. ول ەركىن جاتتىعۋدان وليمپيادانىڭ فينالىندا باق سىناپ جاتتىعۋى ءۇشىن 14.500 ۇپايمەن العاشقى بەستىككە ەندى.
سپورتتىق قۇزعا ورمەلەۋ شەبەرى ءامىر مايمۇراتوۆ جىلدامدىق بويىنشا سىنعا تۇسكەن ول وليمپيادانىڭ شيرەك فينالىنا جەتىپ, جازعى ويىنداردان بەسىنشى ورىن الدى.
نىسانا كوزدەۋ شەبەرى الەكساندرا لە العاشقى وندىققا كىردى. ول پنەۆماتيكالىق ۆينتوۆكامەن 10 مەترگە نىسانا كوزدەۋدەن فينالعا شىعىپ, جالپى ەسەپتە التىنشى ورىننان كورىندى. ايتا كەتەلىك, الەكساندرانىڭ ەنشىسىندە ارالاس كوماندالىق سىنداعى قولا مەدال بار.
وليمپياداعا العاش رەت قاتىسقان دانيل مۇساباەۆ باتۋتتاعى گيمناستيكادان فينالعا ءبىر قادام قالعاندا توقتادى. ول ءبىرىنشى ىرىكتەۋدەن سوڭ 8-ورىننان كورىنگەن. الايدا ەكىنشى ىرىكتەۋدە توعىزىنشى ورىنعا ءتۇسىپ قالدى. فينالعا العاشقى سەگىزدىك جولداما الدى.
3000 مەترگە كەدەرگىلەر ارقىلى جۇگىرۋدەن قازاقستان نامىسىن نورا دجەرۋتو قورعادى. ول جارىستا 9-ورىن يەلەندى. قازاقستانعا الەم چەمپيوناتىنىڭ التىنىن سىيلاعان سپورتشى جاقىندا عانا دەكرەتتىك دەمالىستان ورالعان.
شپاگامەن سەمسەرلەسۋدەن قازاقستان كومانداسى وليمپيادادا العاشقى التىلىققا ەندى.
سونىمەن قاتار شپاگامەن سەمسەرلەسۋدەن جەكەلەي سىندا رۋسلان كۋربانوۆ التىنشى ورىن الدى.
ساداق اتۋدان كوماندالىق جارىستا يلفات ابدۋللين, الەكساندر ەرەمەنكو جانە داۋلەتكەلدى جاڭبىرباي 1/8 اينالىمعا جەتىپ, يتاليادان ءبىر ۇپاي ايىرماسىمەن جەڭىلدى. جالپى ەسەپتە 9-ورىنعا تابان تىرەدى.
برەيكينگتەن امير زاكيروۆ سەگىزىنشى ورىن الدى. ول توپتىق سىنداعى ەكى باتتلدا جەڭىسكە جەتىپ, شيرەك فينالعا جولداما العان. الايدا امەريكالىق VICTOR-دان ۇتىلىپ, جارتىلاي فينالعا وتە المادى.
كيريلل گەراسيمەنكو ۇستەل تەننيسىننە 1/8 فينالعا جەتتى. ءۇش وليمپياداعا قاتىسقان سپورتشىمىز بۇل جولى تاريحي ناتيجە تىركەدى.
بوكستان قازاقستان كومانداسىنىڭ مۇشەلەرى دە العاشقى وندىققا كىردى. نۇربەك ورالباي كۇمىس مەدال السا, ساكەن بيبوسىنوۆ (51 كەلى), مۇحاممەدسابىر بازارباي ۇلى (63,5 كەلى) جانە ايبەك ورالباي (92 كەلى) بەسىنشى ورىن يەلەندى. ماحمۇد سابىرحان (57 كەلى) مەن قامشىبەك قوڭقاباەۆ (92 كەلى) توعىزىنشى ورىندا.
گرەك-ريم كۇرەسىنىڭ شەبەرلەرى نۇرسۇلتان تۇرسىنوۆ (87 كەلى) پەن ءالىمحان سىزدىقوۆ (130 كەلى) تيىسىنشە جەتىنشى جانە سەگىزىنشى ورىن الدى. ەركىن كۇرەس شەبەرى الىشەر ەرعالي (97 كەلى) دا جەتىنشى ورىندا.