بۇگىن, 10 تامىز – اباي كۇنى. 2020 جىلدىڭ 5 تامىزىندا ۇكىمەت قاۋلىسىنىڭ نەگىزىندە 10 تامىز «اباي كۇنى» دەپ اتالاتىن مەرەكەلىك داتا بولىپ بەكىتىلگەن ەدى, دەپ حابارلايدى Egemen.kz.
اباي كۇنى رەتىندە 10 تامىزدىڭ بەلگىلەنۋى بەكەر ەمەس. عىلىمي ورتادا ويشىلدىڭ تۋعان كۇنى تۋرالى ەكى ءتۇرلى نۇسقا بولعانىمەن, جىلدار بويى 10 تامىز رەسمي تۇردە اباي قۇنانباي ۇلىنىڭ تۋعان كۇنى رەتىندە تاڭبالانىپ كەلدى. ابايدىڭ 175 جىلدىق مەرەيتويى قارساڭىندا وسى داتا كۇنتىزبەگە اباي كۇنى رەتىندە رەسمي بەكىتىلگەن ەدى.
179 جىل بۇرىن (1845-1904) – قازاقتىڭ ۇلى اقىنى, فيلوسوف, اعارتۋشى, كومپوزيتور اباي قۇنانباي ۇلى دۇنيەگە كەلدى.
اباي قۇنانباەۆ - قازاقتىڭ ۇلى اقىنى, اعارتۋشىسى, كومپوزيتورى, قازاق جازبا ادەبيەتىنىڭ نەگىزىن قالاۋشى. قازاقستاندىقتار ونىڭ پوەمالارى, ولەڭدەرى مەن اۋدارمالارىمەن بالا كەزىنەن تانىس. اباي ءوزىنىڭ ماعىناسى تەرەڭ جانە ءتىلى باي شىعارمالارىندا ادامداردى ەڭبەككە, بىلىمگە, رۋحاني دامۋعا شاقىردى. ابايدىڭ پروگرەسسيۆتى كوزقاراستارى بۇگىندە ەرەكشە وزەكتىلىككە يە, ويتكەنى ونىڭ يدەيالارىنا گۋمانيستىك جانە اعارتۋشىلىق سيپاتتار ءتان.
اباي 170-كە جۋىق ولەڭ, پوەما مەن "قارا سوزدەرىن" جازىپ, 56 اۋدارما جاسادى. ونىڭ اۋدارمالارىنىڭ ارقاسىندا الەمدىك ادەبيەت كلاسسيكتەرىنىڭ شىعارمالارىن قازاق تىلىندە وقۋعا مۇمكىندىك تۋدى.