فرانتسيا استاناسىن دۇبىرگە بولەگەن ءحححىىى جازعى وليمپيا ويىندارى مارەسىنە تاياپ قالدى. ون ءۇشىنشى سايىس كۇنىندە ەل قورجىنىنا مەدال تۇسكەن جوق. ساڭلاقتارىمىزدىڭ دەنى ىرىكتەۋ سايىسىندا ءسۇرىنىپ, الاماندى اياقتادى.
ەلجانادان ەل ءۇمىتتى
كوركەم گيمناستيكادان سىنعا تۇسكەن ەلجانا تانيەۆا ىرىكتەۋ كەزەڭىندە 7-ورىنعا تۇراقتاپ, فينالدىق سايىسقا جولداما الدى. ەندى جوعارى ۇپاي جيناعان 10 گيمناسپەن مەدالعا تالاسادى. ۇرشىقپەن ونەر كورسەتۋدە ەلجانانىڭ شەبەرلىگىن تورەشىلەر 32.300 ۇپايمەن باعالادى. ءۇش سناريادتان كەيىن 95,150 ۇپاي جينادى.
ۇلتتىق وليمپيادالىق كوميتەتكە بەرگەن سۇحباتىندا كوركەم گيمناستيكادان كوماندانىڭ باس باپكەرى ءاليا يۋسۋپوۆا شاكىرتىنىڭ الامانعا العاش رەت قوسىلعانىنا قاراماستان جاتتىعۋدى جوعارى شەبەرلىكپەن ورىنداعانىن جەتكىزدى.
«ەلجانا وتە ەڭبەكقور گيمناست, ءوزى العاش قاتىسقان وليمپيا ويىندارىنان كەرەمەت اسەر الىپ وتىر. ناتيجەسى دە جاقسى دەپ سانايمىن, دەگەنمەن دە تورەشىلەر ۇرشىق جاتتىعۋىندا تومەن ۇپاي جازعانى تۇسىنىكسىز. ال دوپپەن جاتتىعۋ جاساۋدا قولىنان ءتۇسىرىپ الىپ, قاتەلىككە بوي الدىردى. ۇرشىق جاتتىعۋىن ءمىنسىز ورىنداسا دا ۇپايى از بولدى. باس باپكەر رەتىندە تورەشىلەرگە شاعىم ءتۇسىرىپ ەدىم, وكىنىشكە قاراي, قاناعاتتاندىرمادى», دەدى ءا.يۋسۋپوۆا.
باس باپكەر تەك ەلجانا عانا ەمەس, الەم چەمپيوندارى, وليمپيادا جۇلدەگەرلەرىنىڭ ءوزى دە جاتتىعۋدى ورىنداۋ مەزەتىندە قاتەلىككە ۇرىنىپ جاتقانىن ايتتى. 18 جاستاعى شاكىرتىنىڭ كەلەشەكتە جوعارى جەتىستىككە قول جەتكىزىپ, جانكۇيەرلەرىن قۋانتاتىنىن اتاپ ءوتتى.
سۋ سپورتىنان دا كورسەتكىش كوڭىل كونشىتپەي تۇر. ماريا بروۆكوۆا كانوەمەن ەسۋدە جەكەلەي سىندا سايىستى شيرەك فينالدان اياقتادى. ءار توپتان ۇزدىك ناتيجە كورسەتكەن ەكى سپورتشى عانا جارتىلاي فينالعا جولداما الاتىندىقتان بروۆكوۆا ءوز توبىندا 4-ورىندى مىسە تۇتىپ, جۇلدەگە تالاسۋ مۇمكىندىگىنەن قول ءۇزدى.
بايداركا مەن كانوەدە ەسۋدەن تيمۋر حايداروۆ پەن سەرگەي ەمەليانوۆ ۆ توبىندا سايىسقا تۇسكەن. 500 مەترگە جۇزۋدەن ءوز توبىندا ءۇشىنشى جەتكەنىمەن, جالپى ەسەپتە 11-ساتىعا تۇراقتادى.
ساڭلاق ءسۇرىندى
سپورتتىق قۇزعا ورمەلەۋدەن ءامىر مايمۇراتوۆ تا جازعى وليمپيا ويىندارىنا تۇڭعىش رەت قاتىسقان. ىرىكتەۋ سىنىندا ول ءتىپتى وليمپيادا رەكوردىن دا جاڭارتقان. بىراق شيرەك فينالدىق تارتىستا يراندىق رەزا اليپۋرمەن سىنعا ءتۇسىپ, 6,14 سەكۋند قالىپ قويدى. وعان سەبەپ – اياعىنىڭ تايىپ كەتۋى. قاتەلىككە بوي الدىرعان جەرلەسىمىز قايتا ۇمتىلعانىمەن ۋاقىتتى ۇزاتىپ الدى. ءامىر پاريج جازعى وليمپيا ويىندارىنىڭ جولداماسىن ماۋسىم ايىندا ماجارستاننىڭ بۋداپەشت قالاسىندا وتكەن ليتسەنزيالىق تۋرنيردە ولجالاعان ەدى. سول دودانىڭ فينالدىق تارتىسىندا جەرلەسىمىزدەن باسىم تۇسكەن قىتايلىق ۋ پەنگ پاريج جازعى وليمپيا ويىندارىنىڭ كۇمىس مەدالىن يەلەندى. بۇيىرماي تۇر ەكەن, ەگەر ءامىر يراندىق قارسىلاسىمەن سايىستا قاتەلىككە ۇرىنباعاندا مەدال ءۇشىن دە تارتىسقا تۇسەر ەدى.
سپورتتىق قۇزعا ورمەلەۋدەن پاريج جازعى وليمپيا ويىندارىنىڭ التىنىن يندونەزيا سپورتشىسى ولجالاسا, كۇمىس مەدال قىتاي, قولا اقش سپورتشىسىنا بۇيىردى.
قازىرگى بەسسايىستان دا كورسەتكىش كوڭىل كونشىتپەيدى. ايەلدەر اراسىندا سىنعا تۇسكەن ەلەنا پوتاپەنكو العاشقى سىن – سەمسەرلەسۋدە 200 ۇپايمەن 27-ساتىنى مىسە تۇتتى. جارتىلاي فينالدىق تارتىستى ا توبىندا وتكىزىپ, 200 مەترگە سۋدا جۇزۋدە ەركىن ادىسپەن سىنعا تۇسەدى. ودان كەيىن كونكۋردان شەبەرلىگىن بايقاپ, جۇگىرۋ بارىسىندا لازەرلى تاپانشامەن نىسانا كوزدەۋدەن باعىن سىنايدى. قازىرگى بەسسايىستان پاريج جازعى وليمپيا ويىندارىنا 72 سپورتشى قاتىسىپ, مەدالعا تالاسادى.
وزبەك وعلانى – ەكى دۇركىن وليمپيادا چەمپيونى
تاەكۆوندودان باتىرحان تولەۋعالي پاريج جازعى وليمپيا ويىندارىن ءساتتى باستاعان. 80 سالماق دارەجەسىندە سىنعا تۇسكەن جەرلەسىمىز العاشقى اينالىمدا مالي ەلىنىڭ ءۇمىتى يسماەل كۋليباليدەن باسىم ءتۇستى. شيرەك فينالدا ەكى دۇركىن الەم چەمپيونى, وسى سالماقتىڭ كوشباسشىسى يتاليالىق سيمونە الەسسيوعا قارسى ايقاستى. 18 جاسىندا جازعى وليمپيا ويىندارىنا قوسىلعان جەرلەسىمىزدىڭ تاجىريبەسى كەمشىن سوققانى بايقالدى. باتىرحان – جاستار اراسىندا الەم چەمپيوناتىنىڭ كۇمىس جۇلدەسىن ولجالاعان سپورتشى. تاەكۆوندودان ۇلتتىق قۇرامانىڭ اعا باپكەرى نۇرسۇلتان ماماەۆ سپورتشىلاردىڭ وليمپيادا دوداسىنداعى ايقاسىنا پىكىر ءبىلدىردى.
«58 كگ سالماق دارەجەسىندە ساميرحون اباباكيروۆ ءۇشىن پاريج جازعى وليمپيا جارقىرايتىن شاعى ەدى. بىراق العاشقى اينالىمدا توكيو جازعى وليمپياداسىنىڭ چەمپيونى, الەم چەمپيوناتىنىڭ جەڭىمپازى, ەۋروپا بىرىنشىلىگىندە توپ جارعان يتاليالىق ۆيتو دەل اكيلاعا ەسە جىبەردى. ساميرحون دا جازعى وليمپيا ويىندارىنا تۇڭعىش رەت قاتىسىپ, داڭقتى قارسىلاسىنان قايمىقپاي ايقاستى. ءتىپتى ءبىرىنشى كەزەڭدە الدا تۇرعان, ودان كەيىنگى كەزەڭدە جەڭىستى ۋىسىنان سۋسىتىپ الدى. باتىرحان تولەۋعالي – ەلىمىزدەن بارعان سپورتشىلاردىڭ ىشىندەگى ەڭ جاس ساڭلاق. مۇنداي ءىرى دودانىڭ مىسى بولادى, بۇعان دەيىن قاتىسىپ كورمەگەندىكتەن دە قوبالجىعان شىعار. بىراق قارسىلاسىنان تايسالعان جوق. كەلەشەكتە سپورتشىلارىمىز ەل ءۇمىتىن اقتايدى», دەدى ن.ماماەۆ.
ءبىز تاەكۆوندوشىلارىمىزدىڭ كەلەشەگىنەن ءۇمىت كۇتەمىز, ارينە. بىراق ءبىز ەرتەڭگە سەنىممەن قاراۋدى مىسە تۇتقاندا وزبەكستاننىڭ سپورتشىسى ۇلىقبەك راشيتوۆ ەكى دۇركىن وليمپيادا چەمپيونى اتانىپ ۇلگەردى. 2021 جىلى توكيودا وتكەن جازعى وليمپيا ويىندارىنىڭ چەمپيونى اتانعاندا ۇلىقبەكتىڭ جاسى 18-دە ەدى. ارادا وتكەن ءۇش جىل ىشىندە ول ءوزىنىڭ ەكپىنىنە ەكپىن قوسىپ, كۇش-قايراتىن تولىقتىردى. پاريج تورىندە دە جەڭىستى ساپارىن جالعاپ, 68 كگ سالماقتىڭ ۇزدىگى اتاندى. وزبەكستان سپورتىنىڭ تاريحىندا جازعى وليمپيا ويىندارىنىڭ ەكى دۇركىن چەمپيونى دەگەن اتاق تا وسى ۇلىقبەكتىڭ ەنشىسىنە جازىلىپ وتىر.
ازىرگە سپورتشىلارىمىز 1 التىن, 3 كۇمىس, 3 قولا مەدال كورسەتكىشىمەن 29-ساتىدا تۇر.