ماقسات – ورتاق مەديا-پلاتفورما قۇرۋ

ءىس-شاراعا قازاقستان رەسپۋب­ليكاسىنىڭ مادەنيەت جانە اقپارات ۆيتسە-ءمينيسترى قانات ىسقاقوۆ, تاجىكستان رەسپۋبليكاسىنىڭ تەلەۆيزيا جانە راديوحابار تاراتى­لىمى جونىندەگى مەملەكەتتىك كومي­تەتىنىڭ توراعاسى نۋريددين سايد, وزبەكستان رەسپۋبليكاسى اقپارات جانە بۇقارالىق كوممۋنيكاتسيالار اگەنتتىگى ديرەكتورىنىڭ ءبىرىنشى ورىنباسارى ديلشود سايدجانوۆ, تۇرىكمەنستان رەسپۋبليكاسىنىڭ تەلەۆيزيا, راديو جانە كينەماتوگرافيا جونىندەگى مەملەكەتتىك كوميتەتى توراعاسىنىڭ ورىنباسارى انناساحەت كاكاەۆ, قىرعىز رەسپۋبليكاسى مادەنيەت, اقپارات, سپورت جانە جاستار ساياساتى مي­نيسترلىگىنىڭ حالىقارالىق بايلانىستار جانە ينۆەستيتسيالاردى تارتۋ باسقارماسىنىڭ باسشىسى نۋسۋبالى جاكىپبەكوۆ قاتىستى.

كەزدەسۋ بارىسىندا ەلدەر وكىلدەرى مەديا ساۋاتتىلىقتى ارت­تىرۋ جانە جالعان اقپاراتتىڭ تارالۋىنا قارسى كۇرەس شارالارىن تالقىلادى. مەديا سالاداعى جاھاندىق سىن-قاتەرلەرگە قارسى تۇرۋ ءۇشىن بىرلەسكەن كۇش-جىگەردىڭ ماڭىزدىلىعىن اتاپ ءوتتى.

– اقپارات كەڭىستىگىندەگى قاۋىپ­سىزدىك ماسەلەسى تەك قازاقستانمەن شەكتەلىپ قانا قويمايدى. وعان ورتالىق ازيا ەلدەرى تەڭدەي ۇلەس قوسۋى كەرەك. بۇل – بارىمىزگە ورتاق ءىس. بىرىڭعاي جۇيە قۇرساق تا ارتىق ەتپەس. وسىعان وراي سىزدەرمەن تاجىريبە الماسىپ, قويان-قولتىق جۇمىس ىستەۋگە ءازىرمىز. ءبىزدىڭ ورتاق مۇددەمىز – ماسس-مەديا سالاسىندا ۇندەستىك تاپقاندا عانا سىن-قا­تەرلەرگە توتەپ بەرە الامىز, – دەدى ما­دەنيەت جانە اقپارات ۆيتسە-ءمي­نيسترى قانات ىسقاقوۆ.

تالقىلاۋ بارىسىندا تاراپتار ورتالىق ازيا تەلەارناسى مەن وڭىرلىك مەديا-پلاتفورما قۇرۋ مۇمكىندىگىن قاراستىرۋعا كەلىستى. فەيكپەن كۇرەس جۇمىسىندا بىرىككەن جوسپار قۇرۋ ماسەلەسى دە ءسوز بولدى. اقپارات سالاسىنداعى ۋاكىلەتتى ورگانداردىڭ وكىلدەرى ءوز ەلدەرىنىڭ مەديا سالاداعى ينتەگ­را­تسيالىق ۇدەرىستەرگە بەلسەن­دى قاتىسۋعا دايىن ەكەندەرىن تانىتتى.

جيىن قورىتىندىسىندا تاراپتار ورتالىق ازيا ەلدەرىنىڭ جالپى وڭىرلىك مەديا قۇرىلىمداردى قۇرۋ مەن دامىتۋداعى بىرلەسكەن كۇش-جىگەرى ءوڭىر ەلدەرى اراسىنداعى دوستىق پەن ىنتىماقتاستىقتى نىعايتۋعا ەلەۋلى ۇلەس بولاتىنىنا سەنىم ءبىلدىردى.