ەلوردانىڭ بايقوڭىر اۋدانىندا قالا تۇرعىندارىنىڭ دەمالۋى ءۇشىن بوس الاڭعا جاڭا قوعامدىق كەڭىستىك جايلاستىرىلدى, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
بايقوڭىر اۋدانىندا جاڭا قوعامدىق كەڭىستىك اشىلدى. ول تولستوي مەن ابىرالى كوشەلەرىنىڭ قيىلىسىنداعى بوس جەردە ورنالاسقان.
ويىن الاڭىنان بولەك مۇندا workout-ايماق جانە فۋتبول الاڭى جابدىقتالعان. ويىن كەشەنىنىڭ اۋماعىندا جاڭا اسفالت پەن تارتان جابىنى توسەلدى.
بالالارعا ارنالعان سالتاناتتى شارادا انيماتورلار مەن كاسىبي سپورتشىلار ونەر كورسەتتى.
«وسى ۋاقىتقا دەيىن بۇل جەردە بوس جەرلەر بولعان. اكىمدىككە حابارلاسقاننان كەيىن, ءبىر جارىم ايدان سوڭ بىزگە وسى الاڭ ۇسىنىلدى. اۋدان اكىمىنە جانە ونىڭ كومانداسىنا بالالارعا قۋانىش پەن كۇلكى سىيلاعانى ءۇشىن ۇلكەن العىس ايتقىم كەلەدى», دەدى جەرگىلىكتى تۇرعىن راۋشان يساكوۆا.
مۇندا بالالار اراسىندا فۋتبول بايقاۋى وتكىزىلىپ, ناتيجەسىندە قاتىسۋشىلار مەدالدارمەن جانە فۋتبول دوپتارىمەن ماراپاتتالدى. سونداي-اق تۇرعىندارعا ىڭعايلى بولۋ ءۇشىن جارىقتاندىرۋ جۇرگىزىلدى.
ەستەرىڭىزگە سالا كەتەيىك, بايقوڭىر اۋدانى بويىنشا جىل سوڭىنا دەيىن 117 (45 – جاڭا, 72 – جوندەۋ-قالپىنا كەلتىرۋ) اۋلا اۋماعىن اباتتاندىرۋ جوسپارلانىپ وتىر, قازىر ولاردىڭ 70-ءى تولىعىمەن اياقتالدى.