اتىراۋ وبلىسىمەن ىسكەرلىك بايلانىستى ورناتۋعا قۇشتارلىق تانىتۋشىلار قاتارىندا رەسەي قۇرامىنداعى باشقۇرتستان رەسپۋبليكاسى دا بار. سوڭعى كەزدە اتىراۋلىق ستۋدەنتتەر وسى ەلدىڭ جوعارى وقۋ ورنىندا مۇنايشىلىق كاسىپتى يگەرۋدە. مۇنايلى ءوڭىر مەن باشقۇرتستان اراسىندا ءوزارا ىنتىماقتاستىق تۋرالى مەموراندۋمعا دا قول قويىلعان. وسى مەموراندۋم اياسىنداعى ىسكەرلىك بايلانىستى بۇرىنعىدان دا كەڭەيتە تۇسۋگە تاعى ءبىر وڭ قادام جاسالىپ وتىر.
وسى ماقساتتى كوزدەگەن باشقۇرتستانداعى «يمپۋلس» عىلىمي-وندىرىستىك كاسىپورنىنىڭ عىلىمي جەتەكشىسى, حيميا عىلىمدارىنىڭ دوكتورى ولەگ پتاشكو اتىراۋعا ەركىن كەلىپ, ءوڭىر باسشىلىعىمەن كەزدەستى. ونىڭ ايتۋىنشا, اتىراۋداعى ارنايى ەكونوميكالىق ايماقتا بىرلەسكەن كاسىپورىن قۇرۋدىڭ مول مۇمكىندىگى بار. «ءبىز مۇناي-گاز سالاسىنا قاجەتتى حيميالىق رەاگەنتتەر شىعاراتىن ءوندىرىس ورنىن اشۋدى, سونىمەن بىرگە, بيزنەستى قۇرىلىس ماتەريالدارى مەن وسىمدىكتىڭ ءوسۋىن رەتتەۋشى رەتىندە ازىرلەۋگە ءارتاراپتاندىرۋدى جوسپارلاپ وتىرمىز. بۇل جوسپارىمىزدى بارلىق تالاپتار مەن ەكولوگيالىق نورمالاردى ساقتاپ, ەكى-ءۇش جىلدا ىسكە اسىرعىمىز كەلەدى. ءبىزدىڭ كاسىپورنىمىزدىڭ عىلىمي الەۋەتى جوعارى دەي الامىز. سونىڭ مىسالى رەتىندە 1996 جىلدان بەرى حيميالىق رەاگەنتتەر شىعاراتىنىمىزدى ايتۋعا بولادى. ءوزىمىزدىڭ ارنايى ەكى زەرتحانامىز جۇمىس ىستەيدى. رەسەيدەگى جانە باشقۇرتستانداعى عىلىم اكادەميالارمەن تىعىز بايلانىس ورناتتىق. ەندى ءبىز اتىراۋدا دا سوڭعى تەحنولوگيالار نەگىزىندە حيميالىق رەاگەنتتەر شىعارۋمەن بىرگە, قۇرىلىس, اۋىل شارۋاشىلىعى سالالارىندا دا ەكى جاققا ءتيىمدى جوبالاردى ىسكە اسىرۋعا نيەتتىمىز», دەيدى «يمپۋلس» عىلىمي-وندىرىستىك كاسىپورنىنىڭ عىلىمي جەتەكشىسى ولەگ پتاشكو.
وبلىس اكىمى باقتىقوجا ىزمۇحامبەتوۆتىڭ ايتۋىنشا, اتىراۋدا رەسەيلىكتەرمەن بىرلەسكەن جوبالاردى ىسكە اسىرۋعا ابدەن بولادى. بۇل ءبىر جاعىنان كورشىلەس ەلدەر اراسىنداعى ىسكەرلىك قارىم-قاتىناستىڭ اياسىن كەڭەيتەتىن بولسا, ەكىنشىدەن, مۇنداي جوبالار ەكى ەلدىڭ ەكونوميكاسىن وركەندەتۋگە سەرپىن بەرەدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.