بۇگىن جەرگىلىكتى ۋاقىتپەن تاڭەرتەڭگىلىك ساعات 10:00 شاماسىندا «شىمكەنت-سامارا» تاسجولىنىڭ بويىندا حرومتاۋ قالاسىنىڭ جانىندا جول-كولىك وقيعاسى بولىپ, 8 ادام قايتىس بولدى. ونىڭ ۇشەۋى - ەرەسەك ادام جانە بەسەۋى - بالا, دەپ جازادى Egemen.kz.
ولار ماڭعىستاۋ وبلىسىندا جەكە قايىرىمدىلىق قورى ۇيىمداستىرعان بالالار اراسىنداعى فۋتبول تۋرنيرىنە بارا جاتقان ايتەكە بي اۋدانى قاراشاتاۋ ەلدى مەكەنىنىڭ تۇرعىندارى. ولار تاڭەرتەڭگىلىك ساعات 8:00 شاماسىندا «تويوتا- يپسۋم» كولىگىمەن شىعىپ, حرومتاۋ قالاسىنىڭ جانىندا قاراما-قارسى كەلە جاتقان اۋىر جۇك كولىگىنە سوقتىعىسقان.
اقتوبە وبلىستىق پوليتسيا دەپارتامەنتىنىڭ مالىمەتىنە قاراعاندا, بالالار مىنگەن كولىكتى جولدا تاسىمالداۋ جونىندە مالىمەت تۇسپەگەن. قايتىس بولعانداردىڭ اراسىندا ءبىر ءۇيدىڭ ەكى بالاسى مەن ولاردىڭ اكەسى بار. قىلمىستىق كودەكستىڭ 341-بابى بويىنشا قىلمىستىق ءىس قوزعالدى.