بالۋاندار بوزكىلەمگە شىقتى

ستەند اتۋدىڭ سكيت ءتۇرى بو­يىنشا ارالاس كومان­دالىق سايىستا ەدۋارد ەششەنكو مەن اسەم ورىنباي ىرىك­تەۋ تۋرنيرىندە نەبارى 140 ۇپاي جيىپ, 12-ورىندى قاناعات تۇتتى. بۇل كورسەتكىش جەرلەستەرىمىزگە فينال­عا شىعۋ ءۇشىن جەتكىلىكسىز ەدى. ولگا سافرونوۆا 200 مەترگە جۇگىرۋدە جۇبانىش باسەكەلەرىنە قاتىس­تى. بىراق ول دا سەنىمدى اقتامادى. بەس قارسىلاسىنىڭ بىردە-بىرەۋىنەن وزا الماعان سافرونوۆا ەڭ سوڭعى ورىن­دا قالىپ قويدى.

دۇيسەنبىدە بالۋانداردىڭ با­سەكەسى باستالدى. العاشقى بولىپ بوزكىلەمگە گرەك-ريم كۇرەسى شە­بەرلەرى شىقتى. 60 كگ سالماق دا­رەجەسىندە ونەر كورسەتكەن ايدوس سۇلتانعالي تۇساۋكەسەر كەزدە­سۋىن جولامان شارشەنبەكوۆكە قارسى وتكىزدى. سىر بويىنان كەلگەن سايىپقىراننىڭ الەم چەم­پيوناتىنىڭ التىنى مەن كۇمىسىن ەكى رەتتەن ولجالاپ, ازيا ويىن­دارىنىڭ جەڭىمپازى, ازيانىڭ ءۇش دۇركىن چەمپيونى جانە ەكى دۇركىن ءفيناليسى اتانعان 24 جاستاعى اتاقتى قىرعىز بالۋانىنا ءالى جەتپەدى. ول 3:6 ەسەبىمەن ەسە جىبەردى. سودان كە­يىن تەك قىرعىزدار عانا ەمەس, بارشا قازاق جانكۇيەرلەرى دە جولامان­نىڭ جولىنا ۇلكەن ۇمىتپەن قارادى. ويتكەنى ول اقتىق سىنعا دەيىن القىنباي جەتسە, ايدوسقا قولا مەدال ءۇشىن تالاسۋ مۇمكىندىگى تۋىندايدى. بىراق ۇكىلى ءۇمىت اقتالمادى. قىرعىزستاننىڭ ساڭلاعى شيرەك فينالدا رۋمىنيا سپورتشىسى رازۆان ارناۋتتى ايقىن باسىمدىقپەن (9:0) ۇتقانىمەن, جارتىلاي فينالدا جاپونيانىڭ جۇلدىزى كەنيتيرو فۋميتادان ايلاسىن اسىرا المادى – 3:4. ەندى شەشۋشى ايقاس فۋميتا مەن قىتايلىق ليگۋو تساو اراسىندا وتەدى. ال ءۇشىنشى ورىن ءۇشىن تالاساتىن شارشەنبەكوۆ پەن سولتۇستىككورەيالىق ري-سە-ءۋننىڭ قارسىلاستارى جۇبانىش بەلدەسۋلەرىنەن كەيىن انىقتالادى.

130 كگ سالماقتا ءالىمحان سىزدىقوۆ كۇرەستى. جارىستى ول ءساتتى باستادى. شىمكەنتتىك بالۋان العاشقى اينالىمدا الەم چەمپيوناتىنىڭ قولا جۇلدەگەرى, ەۋروپا چەمپيونى, رۋمىنيالىق الين چيرارۋدى 3:1 ەسەبىمەن باسىم ءتۇسىپ, جانكۇيەرلەردى ءبىر جەلپىندىرىپ تاستادى. ودان كەيىن ريو وليمپياداسىنىڭ قولا جۇلدەگەرى, الەم كۋبوگىنىڭ يەگەرى, ازيا ويىندارى مەن چەمپيوناتىنىڭ جۇلدەگەرى ساباح شارياتيمەن ايقاستى. بۇل تارتىس ازەربايجاننىڭ نامىسىن قورعاپ جۇرگەن 35 جاستاعى يراندىق لەگيونەردىڭ پايداسىنا شەشىلدى – 0:4. جارتىلاي فينالدا ساباح سان سوعىپ قالدى. وليمپيادانىڭ ءتورت دۇركىن چەمپيونى ميحاين لوپەس ونى ەش قينالماي-اق ەڭسەردى – 4:1. ازەربايجاندىق جەڭىلگەننەن كەيىن ءالىمحان ءۇشىن دە جارىس اياقتالدى.

ءبىر ايتا كەتەرلىگى, وليمپيادادا 3 (0 التىن+1 كۇمىس+2 قولا), الەم چەمپيوناتىندا 10 (5+3+2), ەۋروپا بىرىنشىلىگىندە 13 (11+2+0), الەم كۋبوگىندە 2 (1+1+0) رەتتەن جەڭىس تۇعىرىنا كوتەرىلىپ, ەۋروپا ويىن­دارى مەن دۇنيەجۇزىلىك ۋني­ۆەر­سيادادا توپ جارعان رىزا كايالپ بۇل جارىسقا قاتىسپادى. ءداپ سول تۇركيانىڭ تارلانى داڭقى جەر جارعان ميحاين لوپەستىڭ ءدۇبىرلى دودالارداعى بىتىسپەس قارسىلاسى ەدى. ەكەۋىنىڭ جولى ۇنەمى شەشۋشى تۇستا قيىساتىن. الايدا كۇنى كەشە عانا ايگىلى بالۋاننىڭ دوپينگ قولدانعانى انىقتالىپ, كايالپ بىرەر جىلعا ۇلكەن سپورتتان شەتتەتىلدى. سودان كەيىن جەر-جاھان جانكۇيەرلەرى بوستاندىق ارالىنان ات تەرلەتىپ كەلگەن ءاپايتوستى 2023 جىلعى الەم چەمپيونى جانە 2022 جىلعى سول جارىستىڭ كۇمىس جۇلدەگەرى, ازيادانىڭ جەڭىمپازى, 26 جاستا­عى يراندىق ءامين مىرزازادە توقتاتاتىن شىعار دەپ ويلادى. قانشا دەگەنمەن ول لوپەستەن با­قانداي 15 جاس كىشى. قازىر پارسى پەحلەۆانىنىڭ ناعىز جالىنداپ تۇرعان شاعى. ءبىراز ۋاقىتتان بەرى كوپتەگەن بايراقتى باسەكەدە ءاميننىڭ اسقان شەبەرلىگىنە ءتانتى بولىپ, زور الەۋەتىن بايقاعان ەدىك. الايدا پاريج تورىندە 41 جاستا­عى ازۋلى ارىستان جاس جولبارىس­قا الدىرمادى. بۇل باسەكەدە بوس­تان­دىق ارالىنىڭ بالۋانى اسىق­پاي-اپتىقپاي ءجۇرىپ-اق, ساۋاتتى تاكتيكاسى ارقىلى مىرزازادەنى جولىنان ىعىستىردى – 3:1. ءسويتىپ, فينالدا ميحاين لوپەس پەن چيليلىك ياسماني اكوستا كۇش سىناسادى. ال ساباح شارياتي مەن قىتايلىق لينچجە مەننىڭ قارسىلاستارى ءسال كەيىنىرەك بەلگىلى بولادى.

سول كۇنى ايەلدەر كۇرەسى شەبەر­لەرى دە ءوز ونەرىن ورتاعا سالدى. ولار 68 كگ سالماق دارەجەسىنىڭ جۇلدەلەرى ءۇشىن تارتىستى باستادى. باستاپقى باسەكەلەردە بارلىق قارسىلاسىن سىپىرا ۇتقان مەيىرىم جۇمانازا­رو­ۆا مەن ەميت ەلور جارتىلاي في­نالدا دا جەڭىسكە جەتتى. قىرعىز ­قى­زى ءۇشىن جەڭىس وڭايلىقپەن كەلگەن ­جوق. ول توكيو وليمپياداسىنىڭ كۇ­مىس جۇلدەگەرى, افريكانىڭ 13 دۇر­كىن چەمپيونى, نيگەريالىق بلەس­سينگ وبورۋدۋدۋدانى اۋپىرىمدەپ ءجۇرىپ ازەر ۇتتى. ال اقش-تىڭ ارۋى سولتۇستىككورەيالىق پاك سول-گۋمدى جىعىپ الدى دا, اياعىنان مىقتاپ ۇستاپ, بوزكىلەمدە شىر اينالدىردى. ءسويتىپ, ەسەپ 10:0-گە جەتكەندە بارىپ قانا توقتادى. ءدال وسى ءتاسىلدى ەلور وسىدان ەكى جىل بۇرىن بەلگرادتاعى الەم چەمپيوناتىنىڭ فينالىندا ءبىزدىڭ ءجاميلا باقبەرگەنوۆاعا قار­سى ءساتتى قولدانعان ەدى. سول كەزدە ­18 جاس­تاعى بويجەتكەن الەم چەمپيونى اتانسا, كەلەسى جىلى سول ناتيجەسىن قايتالادى. مىنە, ەندى 20 جاسىندا وليمپيادانىڭ التىن تۇعىرىنا كوتەرىلۋگە شاق قالدى. ول ءۇشىن ەميت ەلور توكيوداعى ويىنداردىڭ ­قولا جۇلدەگەرى, الەم چەمپيونى مەيى­رىم جۇمانازاروۆانى جەڭۋى كەرەك. بىراق الاتاۋدىڭ بوكتەرىنەن كەل­گەن بۇرىمدىنىڭ دا وڭايلىقپەن بەرى­لە قويمايتىنى انىق. سول سەبەپتى دە الدا كورەرمەندى كەسكىلەسكەن اي­قاس كۇتىپ تۇر دەپ ايتۋعا تولىق نەگىز بار.

بۇل كۇندەرى ءدۇيىم جۇرت بوكس­شىلاردىڭ باسەكەلەرىن دە تاعات­سىزدانا كۇتىپ جۇرگەنى راس. قازىردىڭ وزىندە كەيبىر سالماق دارەجەسىندە باس جۇلدە ءۇشىن ايقاساتىن ارلان­دار مەن تارلاندار انىقتالىپ تا قوي­دى. تارقاتىپ ايتساق, 51 كگ سالماق­تا حاسانبوي دۋسماتوۆ (وزبەكستان) پەن ءبىلال بەنناما (فرانتسيا), 63,5 كگ سالماقتا سوفيان ۋميا (فران­تسيا) مەن ەريسلاندي الۆارەس (كۋبا), 80 كگ سالماقتا نۇربەك ورال­باي (قازاقستان) مەن الەكساندر حيج­­­نياك (ۋكراينا) جانە 92 كگ سالماقتا ­لو­رەن الفونسو دومينگەس (ازەرباي­جان) پەن لازيزبەك مۋللاجونوۆ (وزبەكستان) جۇدىرىقتاسادى. تاعى ءۇش جۇپ الداعى كۇندەرى انىقتا­لا­دى. سول سەكىلدى ايەلدەر دە شارشى الاڭعا شىعادى. بۇل باسەكەلەردە كۇللى قازاق جانكۇيەرلەرى نازىم قىزايبايعا ۇلكەن ءۇمىت ارتىپ وتىر. اسا جەڭىل سالماقتاعى قازاق قىزى قىتاي بوكسشىسى ۋ يۋمەن قولعاپ تۇيىستىرەدى.