استانا قالاسىنىڭ ماسكەۋدەگى مادەنيەت كۇندەرىنىڭ جابىلۋ سالتاناتى ەل ونەرپازدارىنىڭ قاتىسۋىمەن وتكەن ۇلكەن ساحناداعى گالا-كونتسەرتپەن تۇيىندەلدى. ءۇش كۇنگە سوزىلعان ەلوردا مادەنيەتىنىڭ كۇندەرى اياسىندا بىرقاتار رەسمي كەزدەسۋ ءوتىپ, ءتۇرلى سالاداعى ءوزارا ىنتىماقتاستىق ماسەلەلەرى تالقىلاندى.
اتاپ ايتساق, ماسكەۋ قالالىق دۋماسىنىڭ توراعاسى الەكسەي شاپوشنيكوۆپەن جۇزدەسۋدە استانا قالاسى ءماسليحاتىنىڭ توراعاسى ەرلان كاناليموۆ جاس ەلوردامىزدىڭ تاريحى تاۋەلسىز ەلدىڭ جاڭا تاريحىنان اجىراعىسىز ەكەنىن ايتا كەلە, وسى جىلدار ىشىندە ەلىمىزدىڭ بارلىق وڭىرىنەن جۇزدەگەن مىڭ ادام ەلوردامىزدى سالۋعا جانە جاڭعىرتۋعا ەلەۋلى ۇلەس قوسقانىن اتاپ ءوتتى. استانا ءماسليحاتىنىڭ قۇرىلىمى, ونىڭ ماقساتتارى مەن مىندەتتەرى, ەلوردانىڭ قالاي دامىپ جاتقانى تۋرالى دا باياندادى.
«استانا مەن ماسكەۋ اراسىندا جاقسى ىنتىماقتاستىق تاجىريبە قالىپتاستى. ءبىز قالا قۇرىلىسى, مادەني مۇرانى ساقتاۋ, كرەاتيۆتى يندۋستريانى دامىتۋ سالاسىندا ءوزارا ءىس-قيمىل جاسايمىز», دەدى ەرلان كاناليموۆ.
سونداي-اق شىعارماشىلىق يندۋستريانى دامىتۋعا ارنالعان دوڭگەلەك ۇستەل وتىرىسىندا استانا ءماسليحاتىنىڭ توراعاسى ەرلان كاناليموۆ مەملەكەت باسشىسى قاسىم-جومارت توقاەۆ وسى سالانى اۋقىمدى دامىتۋ ءۇشىن بارلىق جاعدايدى جاساۋدى تاپسىرعانىن اتاپ ءوتتى. ماسكەۋ ۇكىمەتىنىڭ ءمينيسترى سەرگەي چەرەمين قاتىسقان جيىندا رەسەي استاناسى وسى سالادا كوش باستاپ تۇرعانى, استانانىڭ ماسكەۋدەن بۇل تاراپتا ۇيرەنەرى بارى تىلگە تيەك ەتىلدى.
«استانا – ەلوردا رەتىندە بۇگىندە وسى سالانى دامىتۋ بويىنشا ەلدەگى كوشباسشىلاردىڭ ءبىرى. شىعارماشىلىق يندۋستريا ينفراقۇرىلىمىنىڭ تىزبەسىنە كونتسەرتتىك قىزمەتتى دامىتۋ, كورمەلەر وتكىزۋ, مۇراجاي جانە تەاتر قىزمەتى, سونداي-اق تسيرك ونەرى جانە IT دامىتۋ سالالارىنداعى 26 نىسان كىرەدى», دەدى استانا ءماسليحاتىنىڭ توراعاسى.
«قىز جىبەك» وپەراسىنداعى «شاشۋ» جارقىن بيىمەن اشىلعان ماسكەۋ حالىقارالىق مۋزىكا ءۇيىنىڭ ساحناسىندا وتكەن گالا-كونتسەرتتە قازاقستاننىڭ حالىق ارتىستەرى روزا رىمباەۆا, نۇرجامال ۇسەنباەۆا, قازاقستاننىڭ ەڭبەك سىڭىرگەن قايراتكەرى سۇندەت بايعوجين, ە.راحماديەۆ اتىنداعى مەملەكەتتىك اكادەميالىق فيلارمونيانىڭ «سارىارقا» فولكلورلىق ءانسامبلى مەن كامەرالىق حورى, «Turan» ەتنو-فولكلورلىق ءانسامبلى, «Terra» بي تەاترى, حالىقارالىق بايقاۋلاردىڭ لاۋرەاتتارى ەرجان توقسابانوۆ, رايىمبەك تاريحوۆ, مەيرام ايتماعامبەتوۆ, ميحايل كانداۋروۆ, نازىم ساعىنتاي ونەر كورسەتتى. بالەت ارتىستەرى باقتيار ادامجان جانە ايگەرىم بەكەتاەۆا, «ۇلكەن وپەرا-2023» تەلەجوباسىنىڭ جەڭىمپازى دىنمۇحامەد كوشكىنباەۆ, «نوۆايا ۆولنا-2014» بالالار بايقاۋىنىڭ جۇلدەگەرى مۇحاممەدالي جۇگىنىسوۆ, «Junior Eurovision-2020» حالىقارالىق بايقاۋىنىڭ جۇلدەگەرى قاراقات باشانوۆا, ۆيرتۋوز-پيانيست تەمىرلان بەيسەنباي ونەرلەرىمەن ماسكەۋلىك ونەرسۇيەر جانداردى ءتانتى ەتتى.
سالتاناتتى جيىندا ءسوز العان ماسكەۋ ۇكىمەتىنىڭ ءمينيسترى سەرگەي چەرەمين استانا مادەنيەت كۇندەرىنىڭ ماسكەۋ فەستيۆالدارى مەن حالىقارالىق مەرەكەلەر تىزبەگىندەگى ماڭىزدى وقيعا ەكەنىن جانە ەكى ەل اراسىنداعى دوستىقتى ايقىندايتىنىن ايتتى.
ال قازاقستاننىڭ رەسەيدەگى ەلشىسى داۋرەن اباەۆ ەكى ەلدىڭ مادەنيەت كۇندەرىن وتكىزۋ ءوزارا رۋحاني بايلانىستى نىعايتىپ, دوستىق پەن وداقتاستىقتى كۇشەيتەتىن ماڭىزدى ءداستۇر ەكەنىن اتاپ ءوتتى. ونىڭ ايتۋىنشا, بۇل – مادەني ديپلوماتيالىق كوپىر سالۋدىڭ ەڭ ءتيىمدى جولى.
استانا قالاسىنىڭ دەلەگاتسياسى ماسكەۋ قالاسىنا رەسمي ساپارى اياسىندا حالقىمىزدىڭ ءبىرتۋار پەرزەنتتەرى, ۇلتتىق مۇددە جولىندا ايانباي ەڭبەك ەتكەن ءاليحان بوكەيحان مەن جۇسىپبەك ايماۋىت ۇلىنىڭ باسىنا بارىپ, زيارات ەتتى.
«حح عاسىر باسىندا ءاليحان اتامىز باستاعان قازاق زيالىلارى ۇلتتىق مۇددە جولىندا ايانباي ەڭبەك ەتىپ, مەملەكەتشىلدىكتىڭ وزىق ۇلگىسىن كورسەتتى. ول اعارتۋ ىسىنەن باستاپ ەل, ۇلت تاعدىرىنا قاتىستى ماسەلەلەردىڭ بارىمەن اينالىستى. تالانتتى شىعارمالار قالىپتاستىردى, تاريح پەن ەتنولوگيا سالاسىندا ايتۋلى تۋىندىلارىن جازدى, قازاق ۇلتتىق ءباسپاسوزىنىڭ ءداستۇرىن ءتۇزدى, ادەبيەت سالاسىندا ەلەۋلى ءىز قالدىردى. جۇسىپبەك ايماۋىت ۇلى – شىن مانىندە, قازاققا بەرىلگەن, ۇلتى ءۇشىن جانىن قيعان, ۋاقىت وتكەن سايىن بيىكتەي تۇسەتىن ءبىرتۋار تۇلعا. جۇسىپبەك اتامىز – كورنەكتى جازۋشى عانا ەمەس, سول ەڭبەكتەرىمەن حالىق ازاتتىعىن مۇڭ ەتكەن, ەلىنىڭ ەرتەڭىن ويلاپ, ەڭىرەگەن ۇلتىنىڭ بولاشاعىن ويلاپ ەمىرەنگەن ازامات. الاش ۇستانىمى – ۇلت مۇراتى. قازاقتىڭ ماڭدايىنا بىتكەن اردا ازاماتتاردىڭ ەرلىگىن ارداقتاپ, جاستاردىڭ بويىنا ءسىڭىرۋ – ازامات رەتىندە مىندەتىمىز دەپ سانايمىن», دەدى ەرلان ەرمەك ۇلى.
جالپى, بىرلەسكەن ەكونوميكالىق جانە ساياسي جوبالار ورتاق مۇددەلەردى جاقىنداستىرسا, مادەنيەت ىزگىلىك پەن سۇلۋلىققا ۇمتىلعان جانداردى ۇندەستىرەتىنى ءسوزسىز. ماسكەۋدە وتكەن استانا مادەنيەتىنىڭ كۇندەرى دە وسى ءبىر ۇلتارالىق رۋحاني جاقىندىقتى ايقىنداي تۇسەتىندەي.