قىستىڭ كوزى قىراۋدا دەپ ايتۋعا ۇيات. ويتكەنى, بيىلعى قىستىڭ كوكتەم مەن كۇزدەن ءسال عانا ايىرماسى بولىپ تۇر. كۇن جىلى. داريا دا تولىق قاتپادى. سونىڭ سالدارىنان سىردىڭ بويىن قايتا-قايتا تۇمان باسىپ قالىپ جاتىر. كەيدە ءوزىمىزدى لوندوندا ءومىر ءسۇرىپ جاتقانداي سەزىنىپ تە كەتەمىز. بۇرىنعىداي جۇلقىنىپ سوعاتىن جەل دە جوق. ايتەۋىر, بيىلعى قىس قاھارىنا مىنە الماعان كۇيى ورنىن كوكتەمگە بوساتىپ بەرەتىن شىعار.
دەگەنمەن, قىس قولايلى ەكەن دەپ جىلۋ ماۋسىمى توقتاپ قالمايدى. جالعاسا بەرەدى. وسى تۇستا قىزىلوردالىق تۇرعىندارعا جاعىمدى جاڭالىقتى جەتكىزگىمىز كەلەدى. بيىلعى قاڭتار ايىنان باستاپ «قىزىلوردا جىلۋ ەلەكتر ورتالىعى» مكك جىلۋ ءتاريفىنىڭ 3,6 پايىزعا تومەندەگەنىن ءمالىم قىلدى. بۇعان دەيىن تۇتىنۋشىلار جىلۋ ءۇشىن قوسىمشا قۇن سالىعىن ەسەپتەگەندە 85,1 تەڭگە تولەپ كەلگەن. الداعى ۋاقىتتا بۇل سوما 82,03 تەڭگە بولماق.
قىزىلوردادا تەك جىلۋ باعاسى عانا باقىلاۋدا ەمەس. تۇرعىندار ءۇشىن قاجەتتى وزگە تاۋارلاردىڭ دا باعاسى شارىقتاپ كەتپەۋى قاتاڭ نازاردا ۇستالادى. ماسەلەن, ايماقتاعى ازىق-ت ۇلىك باعاسىن قاداعالاۋ ماقساتىندا تۇراقتاندىرۋ قورىن باسقارۋ كوميسسياسى, شتاب جانە جۇمىس توبى جۇمىس ىستەيدى. وبلىستىق اۋىلشارۋاشىلىق باسقارماسىنىڭ باسشىسى داۋىربەك ءابۋوۆتىڭ ايتۋىنشا, «بايقوڭىر» الەۋمەتتىك-كاسىپكەرلىك كورپوراتسياسى» ۇلتتىق كومپانياسى» اق-تىڭ ەنشىلەس «قىزىلوردا قارجى كومپانياسى» سەرىكتەستىگى مەن «ميراس» ساۋدا ورتالىعىنىڭ اراسىندا ارنايى كەلىسىم جاسالعان. اتالعان ارىپتەستىك كەلىسىمگە سايكەس كوكونىس ونىمدەرى بازار باعاسىنان 15-20 پايىز ارزانعا ساتىلىپ جاتىر. سونداي-اق, جاڭا جىل قارساڭىندا «تومەن باعا» لوگوتيپى ىلىنگەن 4 ساۋدا ورىندارى اشىلعان.
– وتكەن جىلى وبلىس تۇرعىندارىن ساپالى ءارى ارزان كوكونىسپەن, اۋىلشارۋاشىلىق ونىمدەرىمەن قامتاماسىز ەتۋ ماقساتىندا 60 جارمەڭكە وتكىزىلىپ, 266 ميلليون تەڭگەنىڭ ءونىمى نارىقتاعىدان 15-20 پايىز تومەن باعامەن ساتىلدى,– دەيدى داۋىربەك كەڭەس ۇلى.
وبلىسقا قاراستى اۋداندار مەن قالادا ورنالاسقان ساۋدا-ساتتىق دۇكەندەرىمەن الەۋمەتتىك ماڭىزى بار تاۋارلارعا نەگىزسىز ۇستەمە قوسپاۋ ماسەلەسى جونىندە ءتۇسىندىرۋ جۇمىستارى جۇرگىزىلىپ, ساۋدا ورىندارىنىڭ يەلەرىمەن ىنتىماقتاستىق مەموراندۋمعا قول قويىلعان.
مامانداردىڭ ايتۋىنشا, بۇگىنگى كۇنى وبلىستىڭ ازىق-ت ۇلىك نارىعىنداعى جاعداي تۇراقتى, سۇرانىسقا يە تاۋارلاردىڭ جەتىسپەۋشىلىگى بايقالمايدى.
قىسقاسى, قىزىلوردا وبلىسىندا باعا شارىقتاپ, حالىق ارتىق شىعىنعا باتىپ جاتقان جاعداي جوق. ەكى يىنىنەن دەمالىپ داعدارىس كەپ قالسا دا, باعانى قالىپتى جاعدايدا ۇستاپ وتىر.
ەرجان بايتىلەس,
«ەگەمەن قازاقستان».
قىزىلوردا.