2024-2025 وقۋ جىلىنا جەرگىلىكتى اتقارۋشى ورگانداردان كونكۋرستىق نەگىزدە مەملەكەتتىك ءبىلىم بەرۋ گرانتىنا وتىنىشتەردى قابىلداۋ باستالدى, دەپ حابارلايدى Egemen.kz ۇتو-نىڭ ءباسپاسوز قىزمەتىنە سىلتەمە جاساپ.
ايتا كەتەيىك, اكىمدىكتەر جىل سايىن باسىم ماماندىقتار بويىنشا نىسانالى دايارلىققا گرانتتار بولەدى. بيىل ەلىمىزدە جەرگىلىكتى اتقارۋشى ورگاندار 2475 ءبىلىم بەرۋ گرانتتارىن ءبولدى.
ء«بىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورىندارىنىڭ قابىلداۋ كوميسسياسىنا ءوتىنىش بەرۋ قاجەت. سونداي-اق جوو-عا ءبىلىمى تۋرالى قۇجات, ۇبت سەرتيفيكاتىن, جەكە باسىن كۋالاندىراتىن قۇجاتتىڭ كوشىرمەسىن, جەڭىلدىك ساناتىن راستايتىن قۇجاتتاردى (بار بولعان جاعدايدا) تاپسىرادى», دەلىنگەن حابارلامادا.
قۇجاتتاردى قابىلداۋ مەرزىمى تۋرالى اقپاراتتى اكىمدىكتەردەن, سونداي-اق جوعارى وقۋ ورىندارىنىڭ قابىلداۋ كوميسسيالارىنان الۋعا بولادى. گرانت بەرۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى.
ەسكە سالا كەتەيىك, جوعارى وقۋ ورىندارىنا قابىلداۋ 25 تامىزدا اياقتالادى.