يندەر اۋدانىنىڭ ورتالىعى يندەربور كەنتىنەن شىعىسقا قاراي 8 شاقىرىم قاشىقتىقتا «ديماش توبە» دەگەن دوڭەس بار.
اۋدان اكىمى دارىن شامۇراتوۆتىڭ ايتۋىنشا, 1978 جىلى قازاقستاننىڭ مەملەكەت جانە قوعام قايراتكەرى, سول كەزدەگى ءبىرىنشى حاتشى دىنمۇحامەد قوناەۆ ءدال وسى ءدوڭنىڭ ۇستىندە جەرگىلىكتى جۇرتشىلىقپەن كەزدەسكەن. سول كەزدە يندەر اۋدانىنىڭ اۋماعىنداعى قازبا بايلىقتىڭ مول قورى قويىلعان مۇراجاي دا ۇيىمداستىرىلىپتى. سودان بەرى يندەرلىك تۇرعىندار بۇل اراعا «ديماش توبە» اتاۋىن بەرگەن.
«وبلىس اكىمى سەرىك شاپكەنوۆتىڭ ۇسىنىسىمەن اتالعان تاريحي ورىندى قايتا جاڭعىرتىپ, اشىق اسپان استىنداعى مۇراجايعا اينالدىرۋدى كوزدەدىك. سول سەبەپتەن بۇل ورىندى وڭىرلىك تۋريستىك كارتاعا ەنگىزۋ ماقساتىندا جاڭا جوبا جاسالدى. جوباعا سايكەس اشىق اسپان استىنداعى مۇراجايعا كىرەر تۇستاعى ماڭدايشاعا «ديماش توبە» اتاۋى جازىلادى», دەيدى د.شامۇراتوۆ.
اكىمنىڭ ايتۋىنا قاراعاندا, مۇراجاي ماڭدايشاسىنىڭ سول جاق باعانىنا سول كەزدە تۇسىرىلگەن فوتونىڭ كوشىرمەسى تۇرادى. ال وڭ جاقتاعى باعاندا مۇراجاي جونىندە اقپارات بەرىلەدى. اشىق اسپان استىنداعى جاڭا مۇراجايدىڭ اۋماعىنا دەندەر كۇمبەزىندەگى قازبا بايلىق تۇرلەرى, ونىڭ ىشىندە مينەرال تاستار مەن رۋدالارى سالىنعان بىرنەشە تاس جاشىك قويىلادى. سونداي-اق ەكى ۇلكەن كۇمبەزدى كومپوزيتسيا ورناتىلادى.
اتىراۋ وبلىسى