تاريحقا كوز جۇگىرتسەك, الماتى تەمىرجولىنىڭ ەلەكترلەندىرىلۋى 1984 جىلى مويىنتى – شۋ باعىتىندا باستالعان ەكەن. شۋ تەمىرجول بولىمشەسىنىڭ العاشقى ەلەكترلەندىرىلگەن مويىنتى – سارىشاعان ۋچاسكەسى 1985 جىلى, شىعاناق ۋچاسكەسى 1986 جىلى پايدالانۋعا بەرىلىپتى. 1988 جىلدىڭ قاراشاسىندا شۋ توراپتى ستانساسىنا العاش رەت ەلەكتروۆوز كەلەدى.
ال 1995 جىلى 4 قاڭتاردا ترانسقازاقستان تەمىرجول ماگيسترالىنىڭ لۋگوۆوي – شۋ تەلىمىن ەلەكترلەندىرۋ جۇمىسى اياقتالىپ, ونىڭ سالتاناتتى ىسكە قوسىلۋىنا قاتىسقان ەلباسى نۇرسۇلتان نازارباەۆ بۇل جەلىنىڭ ەلىمىزگە, حالقىمىزدىڭ بولاشاق ومىرىنە تيگىزەتىن پايداسى وتە زور ەكەنىن ايتا كەلىپ, « ۇلى جىبەك جولى بولات ماگيسترالى ارقىلى قايتا جاڭعىرىپ, وسى ارقىلى قازاقستان تىنىق مۇحيتتا ەۋروپا ەلدەرىنە جەتەتىن ترانسكونتينەنتتىك تەمىرجول جەلىسىنە قوسىلىپ وتىر», دەگەن بولاتىن. مىنە, وبلىس ءۇشىن عانا ەمەس, بۇكىل ەلىمىز ءۇشىن ماڭىزى زور بولعان شۋ – لۋگوۆوي تەمىرجول بولىگىن ەلەكترلەندىرۋدىڭ 20 جىلدىعىنا ارنالىپ مەموريالدى بەلگى قويىلدى.
شىنىندا, تاۋەلسىزدىگىمىزدىڭ العاشقى جىلدارىندا بۇل تەمىرجول بولىگى ءوڭىردىڭ عانا ەمەس, بۇكىل رەسپۋبليكامىزدىڭ تەمىرجول تاسىمالىن ارتتىرۋعا ۇلكەن ۇلەس قوستى. ەلەكترلەندىرىلگەن تەمىرجولدار تمد مەن قازاقستاننىڭ كولىك جۇيەسىندە بۇگىندە نەگىزگى كۇش بولىپ, جۇك جانە جولاۋشى تاسىمالىنىڭ دەنىن اتقارىپ كەلەدى. بۇگىندە قازاقستان تەمىرجولى ءىرى تاسىمالداۋشى عانا ەمەس, جامبىل وبلىسىنىڭ يندۋسترياسىن دامىتۋدا كوشباستاۋشى ۇلتتىق كومپانيا بولىپ تابىلادى.
– ەل مەن ەلدى, قالا مەن اۋىلدى بايلانىستىرىپ وتىرعان جول قاتىناسىنىڭ ەل ەكونوميكاسى ءۇشىن قاشاندا ماڭىزى زور. ال وسى قاتىناستىڭ باسىم بولىگىن قامتىپ, اۋىر جۇگىن ارقالاپ وتىرعان تەمىرجول سالاسى ەكەنى بارشاعا بەلگىلى. سوناۋ 60-شى جىلدارى پاراۆوزدىڭ ورنىن الماستىرعان تەپلوۆوزدارعا تاڭ-تاماشا قاراساق, بۇگىندەرى جۇيىتكىگەن ەلەكتر پويىزدارعا قول جەتكىزىپ وتىرمىز. شۋ قالاسىنىڭ ءاربىر تۇرعىنى تەمىرجولدىڭ ءدۇرسىلىن جورگەگىندە ەستىپ وسسە, حالىقتىڭ 70 پايىزىنىڭ ەڭبەك جولى وسى تەمىرجول سالاسىمەن بايلانىستى. اۋليەاتا ءوڭىرى تىرشىلىگىنىڭ «كۇرە تامىرى» بولعان ەلەكترلەندىرىلگەن بولات جولىنىڭ بەرەكەسى كىرىپ, داڭقى ارتا ءتۇستى, – دەيدى جامبىل وبلىسىنىڭ اكىمى كارىم كوكىرەكباەۆ.
جيىن سوڭىندا بىرقاتار تەمىرجولشىلارعا قۇرمەت گراموتاسى مەن العىس حاتتار تاپسىرىلدى.
ورالحان ءداۋىت,
«ەگەمەن قازاقستان».
جامبىل وبلىسى,
شۋ اۋدانى.
سۋرەتتى تۇسىرگەن
اقادىل رىسماحان.