«جۇمىسپەن قامتۋدىڭ جول كارتاسى-2020» مەملەكەتتىك باعدارلاماسىنىڭ ەكىنشى باعىتى بويىنشا وتكەن جىلى سىرىم اۋدانىنا 66 ميلليون تەڭگە قارجى ءبولىنىپ, اۋىلدا كاسىپكەرلىكتى دامىتۋ قارقىندى جۇرۋدە.
اۋداندىق جۇمىسپەن قامتۋ ورتالىعىنىڭ ديرەكتورى شىنار دۇيسەنعاليەۆانىڭ ايتۋىنشا, 12 اۋىلدىق وكرۋگ بويىنشا 38 ادامنىڭ جوبالارى ىرىكتەلىپ, حالىققا قىزمەت كورسەتۋ, ءوندىرىس ورىندارى, مال شارۋاشىلىعى سالاسى باعىتىنداعى نەسيە الۋشىلاردىڭ جۇمىستارى جاندانا تۇسكەن.
تۇرعىندار شاشتاراز, ناۋبايحانا, پلاستيك تەرەزەلەر جاساۋ, كولىك جوندەۋ, جولاۋشىلارعا قىزمەت كورسەتۋ سەكىلدى جۇمىستاردى قولعا الىپ وتىر.
سونداي-اق, وتكەن جىلى نەسيە الۋشىلار تاراپىنان 68 ءىرى قارا, 51 جىلقى, 246 قوي, ەشكى ساتىپ الىندى.
حالىقتى جۇمىسپەن قامتۋدىڭ تاعى ءبىر ءتۇرى – الەۋمەتتىك جۇمىس ورىندارى. بۇل باعىتتا وتكەن جىلدىڭ شەڭبەرىندە 13 شارۋا قوجالىعى, 6 جەكە كاسىپكەرمەن كەلىسىمشارت جاسالىپ, ناتيجەسىندە 122 ادام جۇمىسقا ورنالاستىرىلدى.
«جۇمىسپەن قامتۋدىڭ جول قارتاسى-2020» باعدارلاماسى اياسىندا مۇمكىندىگى شەكتەۋلى جانداردى الەۋمەتتىك قولداۋ, قوعامعا پايداسى تيەرلىك ىستەرگە جۇمىلدىرۋ باعىتىندا جۇمىستار قولعا الىنعان. اتالمىش باعدارلاما اياسىندا 10 مۇمكىندىگى شەكتەۋلى ادام جۇمىسپەن قامتىلسا ولاردىڭ اراسىندا نەسيەگە قول جەتكىزگەن 7 ادام بار.
نەسيە العان مۇمكىندىگى شەكتەۋلى جاندار بۇگىندە جولاۋشىلارعا قىزمەت كورسەتۋ, مال شارۋاشىلىعى, ۇستاحانا تسەحى, فوتوسالون, كومپيۋتەرلىك قىزمەت كورسەتۋ سەكىلدى جۇمىستاردى قولعا الىپ, باستاپ كەتتى.
مۇسىربەك ايتاشەۆ.
باتىس قازاقستان وبلىسى,
سىرىم اۋدانى.