«تازا قازاقستان» رەسپۋبليكالىق ەكولوگيالىق اكتسياسى اياسىندا اباي اۋدانىنىڭ ورتالىعى قاراۋىل اۋلىنداعى اباي ساياباعىندا سەنبىلىك ءوتتى. اۋدان ورتالىعىندا ۇيىمداستىرىلعان ءىس-شاراعا مەملەكەتتىك قىزمەتكەرلەردەن باستاپ, مادەنيەت جانە ونەر مەكەمەلەرىنىڭ ماماندارى, اۋىلدىڭ بەلسەندى جاستارىنان قۇرالعان 150-دەن اسا اۋىل تۇرعىنى قامتىلدى.
ساياباق اۋماعىن تازارتۋشىلار الدىمەن تۇرمىستىق قالدىقتار مەن قوقىستاردى تازارتىپ, اعاش بۇتاقتارىن جيناپ, جابايى شوپتەردى ج ۇلىپ, كوگالداندىرۋ جۇمىستارىن رەتكە كەلتىردى. ارنايى ءشوپ شاباتىن قۇرىلعىلارمەن شوپتەر وتالىپ, قاپقا سالىنعان قوقىس قالدىقتارى كولىك تەحنيكالارىمەن قوقىس پوليگونىنا جەتكىزىلىپ توگىلدى.
«رەسپۋبليكالىق تازالىق اكتسياسى اۋدان كولەمىندە سەنبىلىكتەرمەن قاتار ينفراقۇرىلىمدىق شارالار قارقىن الىپ جاتىر. ونىڭ ىشىندە اۋىلدىق وكرۋگتەردە كوشەنى جارىقتاندىرۋ ماقساتىندا شامدار ورناتىلىپ, بالالارعا ارنالعان ويىن الاڭدارى بوي كوتەردى. اۋدان ورتالىعى قاراۋىلدا باعدارشامدار اۋىستىرىلىپ, 50 دانا بەينەباقىلاۋ كامەراسى ورناتىلدى. سونداي-اق جول قاۋىپسىزدىگىن قامتاماسىز ەتۋ ماقساتىندا ارنايى جول بەلگىلەرى جوندەلىپ, ءبىلىم وردالارىنىڭ ماڭىنا ارنايى تاقتايشالارىن ورناتۋ جۇمىستارى ويداعىداي اتقارىلىپ جاتىر», دەيدى اتالعان ءىس-شاراعا باستاماشى بولعان اباي اۋدانى ءماسليحاتىنىڭ توراعاسى ماقسات نۇرسۇلتان ۇلى.
اۋدان ورتالىعى مەن اۋىلدارىن قامتىعان «تازا قازاقستان» رەسپۋبليكالىق ەكولوگيالىق اكتسياسىنا اۋدان تۇرعىندارى دا ءدان ريزا. وسىنداي يگى باستامالار مەن ۇيىمداسقان جۇمىستار ناتيجەسىندە تۋعان مەكەندەرى تۇلەپ, كۇن سايىن كوركەيىپ جاتقانى جۇرتشىلىقتى قۋانتاتىنىن اڭعاردىق.
«پرەزيدەنت باستاماسىمەن جۇزەگە اسىپ جاتقان ەكولوگيالىق اكتسيا اياسىندا ۇلىلار ەلى اباي ەلىندە جۇيەلى جۇمىستار قولعا الىندى. وزدەرىڭىزگە بەلگىلى, اباي ەلىنىڭ تاريحىمەن تانىسىپ, اۋاسىمەن تىنىستاپ, اباي, شاكارىم, مۇحتار دانالار ءجۇرىپ وتكەن سارا جولىن تانۋعا كەلەتىن تۋريستەر قاتارى جىل ساناپ كوبەيىپ كەلەدى. اۋداندى اباتتاندىرۋ, كوركەيتۋ, كوگالداندىرۋ ماقساتىندا ءتۇرلى اكتسيا, سەنبىلىك ءوتىپ جاتىر. مۇنداي ءىس-شاراعا ەڭكەيگەن قاريادان ەڭبەكتەگەن بالاعا دەيىن ءوز ۇلەسىن قوسىپ وتىرعانى – ۇلكەن قۋانىش. جاڭا قازاقستان قۇرۋ جولىنداعى جاقسى ىستەرىمىز جالعاسىپ, قارىشتاپ العا باسا بەرەيىك!» دەدى اباي اۋدانى ارداگەرلەر كەڭەسىنىڭ توراعاسى سەرىك مۇقاجان.
جاستارعا ونەگە ۇستەپ, تۇرعىنداردى بەرەكە-بىرلىككە ۇندەيتىن ءىس-شارادان جاستار جاعى دا قالىس قالماي بارىن سالىپ كەلەدى. بىرلىگى جاراسقان بەلسەندى جاستار ءوز قاتارلاستارى اراسىندا قانداي سىيلى بولسا, ۇلكەندەر الدىندا دا ءاردايىم جاقسى ىستەرىمەن تانىلىپ ءجۇر.
«جاسىل ەل» ەڭبەك جاساقتارىنىڭ ساربازدارى اۋداننىڭ تازالىق اكتسياسىنا بەلسەنە قاتىسىپ, كوركەيتۋ جۇمىستارىنا اتسالىسىپ وتىر. بۇگىندە اۋدانداعى كولەمى ۇلكەن ورتالىق ساياباقتى اجارلاندىرۋ ماقساتىندا تازالىق جۇمىستارىنا قاتىستىق. «اۋىل كوركى – ەل كوركى» دەگەندەي, اۋدانىمىز كوركەيە بەرسىن», دەيدى «جاسىل ەل» ساربازى سەرىكقىزى ەركەجان.
اباي وبلىسى