اپتا باسىندا عىلىم جانە جوعارى ءبىلىم ءمينيسترى ساياسات نۇربەك, استانا قالاسىنىڭ اكىمى جەڭىس قاسىمبەك, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ەلورداداعى م.جۇماباەۆ, ك.ازىرباەۆ كوشەلەرىنىڭ بويىندا سالىنىپ جاتقان ستۋدەنتتەر ۇيلەرىنىڭ قۇرىلىسىمەن تانىسىپ, مەردىگەر كومپانيالاردىڭ باسشىلارىمەن كەزدەستى.
ء«بىزدىڭ مينيسترلىك 2022 جىلدان باستاپ جاتاقحانا ماسەلەسىن قولعا الدى. جىل سايىن ون مىڭنان استام توسەكتىك ورىنعا ارنالعان جاتاقحانا قۇرىلىسىن باستاپ جاتىرمىز. بىلتىر 10 343 توسەكتىك ورىنعا ارنالعان 43 نىسان تاپسىرىلسا, بيىل جىل سوڭىنا دەيىن 27 نىسان وتكىزىلەدى. 10 500 اسا توسەكتىك ورىنعا نەگىزگى تاپشىلىق – استانا مەن الماتى قالاسىندا. بىراق كەلەسى جىلى ەلوردادا بۇل ماسەلە تولىق شەشىلەدى دەپ وتىرمىز. مىنە, ەۋرازيا ۇلتتىق ۋنيۆەرسيتەتىنىڭ 2700 توسەكتىك ورىنعا ارنالعان جاتاقحاناسى تاپسىرىلىپ جاتىر. ونىڭ 300 جانە 400 ورىنعا ارنالعان جاتاقحانا قۇرىلىسىن بىردەن باستاپ كەتتىك. مىڭ ورىنعا ارنالعان جاتاقحانا قۇرىلىسى كەلەسى جىلى ەنگىزىلەدى. سوندىقتان بۇل ماسەلە – مينيسترلىكتىڭ ۇدايى باقىلاۋىندا», دەدى ساياسات نۇربەك.
سونداي-اق عىلىم جانە جوعارى ءبىلىم ءمينيسترى بىلتىر سۋبسيديالىق نورماتيۆتەر وزگەرتىلگەنىن ايتتى.
ء«بىزدىڭ قارجى ورتالىعى ارقىلى جەكەمەنشىك مەردىگەرلەر جاتاقحانانى سالعاننان كەيىن التى جىلدىڭ ىشىندە اقشانى قايتارىپ بەرەتىن ارنايى مەحانيزم بار. بيىل ونىڭ ۇستىنە قايتا جابدىقتاۋعا سۋبسيديالىق نورماتيۆتەردى وزگەرتەتىن بولامىز, ياعني بۇرىننان سالىنعان قوناقۇي, حوستەل نەمەسە بيزنەس ورتالىقتارىن ۇكىمەتتىڭ كومەگىمەن ولاردى جاتاقحاناعا اينالدىرۋعا مۇمكىندىك بەرەمىز. سوندىقتان استانا, الماتى جانە ەلىمىزدەگى وزگە دە ءىرى قالالاردىڭ كاسىپكەرلەرىنە ۇندەۋ تاستاعىم كەلەدى. بۇل مەملەكەتكە دە, ستۋدەنتتەرگە دە, وزدەرىنە دە پايدالى ءارى ۇلكەن كومەك», دەدى ول.
جاڭا وقۋ جىلى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ستۋدەنتتەرى ءۇشىن قۋانىشپەن باستالماق. اتالعان جوعارى وقۋ ورنى ولاردى جاتاقحانامەن تولىق قامتاماسىز ەتۋدى جوسپارلاپ وتىر. جاڭادان سالىنىپ جاتقان 4 Cتۋدەنتتەر ءۇيىنىڭ قۇرىلىسىنا جەكە ينۆەستيتسيا تارتىلعان. سونىڭ ءبىرى بيىل پايدالانۋعا بەرىلەدى. ۋنيۆەرسيتەت ەكى جىل ىشىندە ستۋدەنتتەر ءۇيىنىڭ سانىن كوبەيتىپ, 5 مىڭنان اسا ورىندى پايدالانۋعا بەرمەك. بيىل ماعجان جۇماباەۆ كوشەسىندە بوي كوتەرىپ جاتقان زاماناۋي جاتاقحانا ستۋدەنتتەرگە ەسىگىن ايقارا اشادى.
«قازىرگى تاڭدا مەملەكەتتىك قولداۋدىڭ ارقاسىندا ينۆەستورلار ستۋدەنتتەر ءۇيىنىڭ قۇرىلىسىنا ايرىقشا قىزىعۋشىلىق تانىتىپ وتىر. وقۋ جىلىنىڭ الدىندا جاڭا ستۋدەنتتەر ءۇيى پايدالانۋعا بەرىلەدى. بۇگىن ءبىز وسى باعىتتا تاعى دا ءۇش ستۋدەنتتەر ءۇيىنىڭ قۇرىلىسىن سالۋعا بەلسەندى جۇمىس ىستەپ جاتىرمىز», دەدى ۋنيۆەرسيتەت رەكتورى ەرلان سىدىقوۆ.
ەۋرازيا ۇلتتىق ۋنيۆەرسيتەتىنىڭ جاڭا ستۋدەنتتەر ءۇيىن «AEK Munai» جشس سالىپ جاتىر. قازىر 2 بلوك, 6 قاباتتان تۇراتىن عيمارات قۇرىلىسى قارقىن العان. جاتاقحانانىڭ جالپى اۋدانى 4,5 مىڭ شارشى مەتردەن اسادى.
«بيىل ءبىزدىڭ كومپانيا ءوز قاراجاتىنا ستۋدەنتتەر جاتاقحاناسىن سالۋدى شەشتى. ءبىزدىڭ العاشقى جوبامىز – ەۋرازيا ۇلتتىق ۋنيۆەرسيتەتىنىڭ ستۋدەنتتەر ءۇيى. التى قاباتتى عيماراتتا 170 بولمە, 400 ورىن قاراستىرىلعان. قۇرىلىس جۇمىسى جىل باسىندا باستالدى. ەندى 7 ايدا اياقتاعالى وتىرمىز. جاتاقحانا جايلى ءارى زاماناۋي. ءبىرىنشى قاباتتا ستۋدەنتتەر ءۇشىن كوۆوركينگ ايماق ورنالاسادى. ءبىزدىڭ كومپانيا بۇعان دەيىن استانا قالاسىندا «ايسافي», «ارۋجان», «شىڭعىس-1», «شىڭعىس-2» تۇرعىن ءۇي كەشەنىن سالدى», دەدى «Bastau Damu KZ» جشس ديرەكتورى ارمان حالەلوۆ.
ايتا كەتەيىك, بىلتىر مەملەكەت باسشىسىنىڭ تاپسىرماسى اياسىندا استانادا ستۋدەنتتەر جاتاقحانا قۇرىلىسىنىڭ جوبالىق كەڭسەسى قۇرىلدى. وسى باعىتتا عىلىم جانە جوعارى ءبىلىم مينيسترلىگى, استانا قالاسى اكىمدىگى, «قارجى ورتالىعى» اق جانە ينۆەستورلار مەن جوعارى وقۋ ورىندارى اراسىندا ىنتىماقتاستىق تۋرالى مەموراندۋم جاسالدى.
قۇرىلىس جۇمىسىن جۇرگىزىپ جاتقانداردىڭ ىشىندە «Integra» كومپانياسى دا بار. ولار ءۇش بلوك, بەس قاباتتان تۇراتىن 2 656 ورىندىق ستۋدەنتتەر ءۇيىن سالىپ جاتىر.
«قازىر قۇرىلىس جۇمىسى قارقىندى جۇرگىزىلىپ جاتىر. ستۋدەنتتەرگە جىلى ءارى جايلى بولۋ ءۇشىن بار كۇشىمىزدى سالامىز. قۇرىلىستا 450 ادام ىستەيدى. ءبىز سالىپ جاتقان ستۋدەنتتەر ۇيىندە وقۋ زالى, كوۆوركينگ ايماق, كومپيۋتەرلىك سىنىپ سەكىلدى جاستارعا قاجەتتى بارلىق دۇنيە قامتىلادى», دەيدى «Integra» كومپانياسىنىڭ باس ديرەكتورى دانيار راحىمتاەۆ.