ەلىمىزدىڭ تىنىشتىعى مەن قاۋىپسىزدىگىن قورىعان تاعى ءبىر اسكەري كەمە تاۋەلسىز ەلىمىزدىڭ كوك بايراعىن سالتاناتتى جاعدايدا كوككە كوتەردى. ماڭىزدى شاراعا اقتاۋ گارنيزونىنا جۇمىس ساپارىمەن كەلگەن قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ قاتىستى.
ەلىمىزدىڭ قارۋلى كۇشتەرىنىڭ تاپسىرىسى بويىنشا ورالداعى «زەنيت» زاۋىتىندا قۇراستىرىلعان زىمىراندىق-ارتيللەريالىق «سارىارقا» اسكەري كەمەسى سۋعا وتكەن جىلى جىبەرىلگەن ەدى. سۋ ىعىستىرعىشتىعى 250 تونناعا جۋىق, ۇزىندىعى 42 مەتر شاماسىندا جانە ەڭ جوعارى جىلدامدىعى 25-30 ۋزەل, ءجۇزۋ قاشىقتىعى 1200 ءميلدى قۇرايتىن كەمە قازىرگى زامانعى زىمىراندىق-ارتيللەريالىق قارۋ-جاراقپەن, ناۆيگاتسيالىق قوندىرعىلارمەن جابدىقتالعان.
اقتاۋ حالىقارالىق تەڭىز-ساۋدا پورتىنىڭ 7-ءشى تۇراعىندا ساپ تۇزەگەن اسكەري-تەڭىز بازاسىنىڭ جەكە قۇرامى مەن جيىلعان جۇرتشىلىق الدىندا اسكەري-تەڭىز كۇشتەرىنىڭ تۋىن كەمە كومانديرى كاپيتان-لەيتەنانت ر.جۇنىسوۆكە تابىستاعان قورعانىس ءمينيسترى: «سارىارقا» كەمەسى – وتاندىق ءوندىرىستىڭ ءتول ءونىمى. ەگەمەندىك جىلدارى الەۋەتى ارتىپ, ەكونوميكاسى اسقاقتاعان, سول ارقىلى قورعانىسىن قامداپ, قاۋىپسىزدىگىن ارتتىرعان مەملەكەتىمىزدىڭ اقتالعان مەرەيى. كۇندىز-ءتۇنى تۋعان ەلىمىزدىڭ, ءار ءۇيىمىزدىڭ ءتۇزۋ ءتۇتىنى مەن كەڭ-بايتاق جەرىمىزدىڭ بۇتىندىگىن ويلاعان ەلباسىنىڭ سارابدال ساياساتىنىڭ جەمىسى. بۇل بەس قارۋىن اسىنىپ, بولاشاقتا وسىناۋ اسكەري كەمەنىڭ داڭقىن اسىراتىن تەڭىزشىلەرىمىز ءۇشىن زور مارتەبە عانا ەمەس, ۇلكەن جاۋاپكەرشىلىك. ەلباسى الدىنداعى ابىرويلى پارىز, ەل الدىنداعى قاسيەتتى بورىش! – دەپ تەڭىزشىلەردىڭ وزدەرىنە جۇكتەلگەن جاۋاپكەرشىلىكتى ابىرويمەن اتقاراتىنىنا سەنىم ءبىلدىردى.
ماڭعىستاۋ وبلىسىنىڭ اكىمى ا.ايدارباەۆ, ماڭعىستاۋ وبلىسى ۇلى وتان سوعىسى ارداگەرلەرى كەڭەسىنىڭ توراعاسى, ا.عۇماروۆ ءسوز سويلەپ, اسكەري كەمەگە كوتەرىلگەن تۋدىڭ ءمان-ماڭىزى مەن قادىر-قاسيەتى تۋرالى باياندادى. جاستاردى وتاندى سۇيۋگە, ونىڭ الدىنداعى مىندەتتەر مەن پارىزدارعا ادال بولۋعا شاقىردى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.