سەنات دەپۋتاتى اينۇر ارعىنبەكوۆا سەمەي قالاسىنداعى مەديتسينالىق جەدەل جاردەم اۋرۋحاناسىنىڭ دارىگەرلەر قاۋىمىمەن كەزدەستى. مەكەمەنىڭ وزەكتى ماسەلەلەرى مەن مۇقتاجىن تالقىلاۋ – كەزدەسۋدىڭ باستى ماقساتى بولدى. مۇندا اۋرۋحاناعا كۇردەلى جوندەۋ جۇرگىزۋ قاجەتتىگى – كەزەك كۇتتىرمەيتىن ماسەلە.
مەديتسينا قىزمەتكەرلەرى كەزدەسۋ بارىسىندا اۋرۋحانانىڭ ينجەنەرلىك-كوممۋنيكاتسيالىق ينفراقۇرىلىمىنىڭ جارامسىز جاعدايىنا الاڭداۋشىلىق ءبىلدىردى. اتاپ ايتقاندا, جەرتولە سۋ استىندا قالىپ, عيماراتتىڭ ىرگەتاسىنا وراسان زور زاقىم كەلگەن بولاتىن. سونداي-اق اۋرۋحانا اۋماعىن اباتتاندىرۋ جۇمىسىنىڭ ساپاسىز جاسالعانى مەن قىزمەتكەرلەردى كولىكپەن قامتاماسىز ەتۋدىڭ جوقتىعى تۋرالى پروبلەمالار ايتىلدى.
اينۇر ارعىنبەكوۆا دەنساۋلىق ساقتاۋ ىسىندە كوپتەگەن پروبلەمالىق ماسەلە بار ەكەنىن جانە ولار شۇعىل شەشۋدى تالاپ ەتەتىنىن اتاپ ءوتتى.
«دەنساۋلىق ساقتاۋ سالاسىندا كوپتەگەن پروبلەمالىق ماسەلە بار, ولاردى دەرەۋ شەشۋ قاجەت. بۇل ماسەلەلەردى باقىلاۋعا الىپ وتىرمىن. ماسەلەنى سەنات پەن وبلىس اكىمدىگى بىرلەسىپ قولعا الاتىن بولادى», دەپ اتاپ ءوتتى دەپۋتات.
سەناتور مەديتسينالىق پەرسونالدىڭ جۇمىسىنا قولايلى جاعدايدى قامتاماسىز ەتۋ جانە پاتسيەنتتەردى قاۋىپسىز ەمدەۋ ماقساتىندا ايتىلعان ماسەلەلەردى جەدەل شەشۋگە بار كۇش-جىگەرىن ارنايتىنىن اتاپ ءوتتى.