پرەمەر-مينيستر ولجاس بەكتەنوۆ مەملەكەتتىك قولداۋ شارالارىنىڭ تيىمدىلىگىن ارتتىرۋ ارقىلى ەلىمىزدە ءومىر ءسۇرۋ ساپاسىن جاقسارتۋ جونىندە كەڭەس وتكىزدى. جيىندا «وتباسىنىڭ تسيفرلىق كارتاسىن» ودان ءارى جەتىلدىرۋ ماسەلەلەرى قارالدى, سونداي-اق «الەۋمەتتىك ءاميان», «مەكتەپكە دەيىنگى ۇيىمداردى ۆاۋچەرلىك قارجىلاندىرۋ» جوبالارى كورسەتىلدى.
ۇكىمەت باسشىسى تۇرعىنداردىڭ ءال-اۋقاتىن جاقسارتۋ كريتەريى بويىنشا اكىمدەردىڭ ناقتى جۇمىسىنا KPI ەنگىزۋدى تاپسىردى. ول ءۇشىن «وتباسىنىڭ تسيفرلىق كارتاسى» پلاتفورماسى نەگىزىندە شۇعىل جانە داعدارىس دەڭگەيىنەن قاناعاتتانارلىق جانە باقۋاتتى دەڭگەيگە دەيىنگى بەس سانات بويىنشا بارلىق وتباسىنىڭ ءال-اۋقاتىنا تۇراقتى مونيتورينگ پەن تالداۋ جۇرگىزىلەتىن بولادى. وتباسىلاردىڭ قاناعاتتانارلىقسىز ساناتتان جاقسارۋعا كوشۋ ديناميكاسىنا جانە كەرىسىنشە كورسەتكىشكە بايلانىستى جەرگىلىكتى اتقارۋشى ورگانداردىڭ جۇمىسى باعالانادى. «وتباسىنىڭ تسيفرلىق كارتاسىنىڭ» قازىرگى ناتيجەلەرىن بۇۇ مەن جەتەكشى حالىقارالىق ينستيتۋتتار وڭ باعالاپ وتىرعان كورىنەدى.
اكىمدەرگە بۇل قۇرالدى ورتا جانە ۇزاقمەرزىمدى شارالاردى جوسپارلاپ, ىسكە اسىرۋ ءۇشىن قاجەتتى نەگىزگى نۇسقاۋلىق رەتىندە پايدالانۋ تاپسىرىلدى. مۇقتاج وتباسىلاردىڭ ومىردە قيىن جاعدايعا تاپ بولۋ قاۋپىنىڭ الدىن الۋ ماقساتىندا, سونداي-اق كەدەيلىكتى, جۇمىسسىزدىقتى, حالىقتىڭ جاسىرىن جۇمىسپەن قامتىلۋىن ازايتۋ ءۇشىن ولاردى بەلسەندى تۇردە انىقتاۋ قاجەت. ۇكىمەت باسشىسى ءوڭىر اكىمدەرىنە ورتالىق مەملەكەتتىك ورگاندارمەن بىرلەسىپ ءار وتباسىمەن جەكە جۇمىس جۇرگىزۋدى ءارى «داعدارىس» جانە «شۇعىل» ساناتتارداعى وتباسىلاردى جىل سوڭىنا دەيىن 31,2 مىڭ وتباسىنا دەيىن قىسقارتۋدى قامتاماسىز ەتۋدى تاپسىردى.
«مەملەكەت باسشىسىنىڭ الدىمىزعا قويعان مىندەتى – ەلىمىزدەگى ءومىر ساپاسىن جاقسارتۋ. تەتىك بار, مەملەكەتتىك قولداۋ شارالارى جۇمىس ىستەيدى, مەملەكەت قاجەتتى قاراجاتتى بولەدى. ءبىز اكىمدەردىڭ حالىق ءال-اۋقاتىن جاقسارتۋعا قوسقان ۇلەسىن ناقتى باعالاۋ كريتەريىنە كوشەمىز. ينديكاتورلاردىڭ ورىندالۋ مونيتورينگى تۇراقتى بولادى. ونلاين رەجىمدە ديناميكانى كورىپ, قورىتىندى جاسايمىز», دەپ اتاپ ءوتتى ولجاس بەكتەنوۆ.
ايتا كەتۋ كەرەك, رەسپۋبليكالىق بيۋدجەتتىڭ باسىم بولىگى الەۋمەتتىك مىندەتتەمەلەردى تولىق ىسكە اسىرۋعا, وڭىرلەردى دامىتۋعا باعىتتالعان. وسىعان بايلانىستى كەڭەستە ازاماتتارعا مەملەكەتتىك قولداۋ شارالارىنىڭ ۋاقتىلى كورسەتىلۋىن ءارى اشىقتىعىن قامتاماسىز ەتەتىن «الەۋمەتتىك ءاميان» جوباسى قارالدى. الەۋمەتتىك ءاميان ارقىلى تۇرعىندارعا پيلوتتىق رەجىمدە مەكتەپتەردە تەگىن جانە جەڭىلدىكپەن تاماقتانۋ, ءدارى-دارمەك ۇسىنىلادى. الەۋمەتتىك ماڭىزى بار ازىق-ت ۇلىك ونىمدەرىن ساتىپ الۋعا, مۇگەدەكتىگى بار ادامدار ءۇشىن وڭالتۋدىڭ تەحنيكالىق قۇرالدارىن ساتىپ الۋعا اتاۋلى كومەك كورسەتۋ جونىندەگى پيلوتتىق جوبانى, سونداي-اق جانار-جاعارمايمەن تاۋارلى گازعا باعانىڭ ءوسۋىن وتەۋ ماقساتىندا حالىقتىڭ الەۋمەتتىك وسال توپتارىنا ارنالعان ۆاۋچەرلەردى ىسكە قوسۋ قوسىمشا پىسىقتالىپ جاتىر.
ۇكىمەت باسشىسى مەملەكەتتىك ورگاندارعا الەۋمەتتىك اميانعا جانە تسيفرلىق كارتاعا تۇسەتىن دەرەكتەردىڭ ءوز سالاسى مەن باعىتى بويىنشا دالدىگى مەن دۇرىستىعىن قامتاماسىز ەتۋدى تاپسىردى. «الەۋمەتتىك ءاميان» جوباسىن كەڭەيتۋ, زاڭناماعا ءتيىستى وزگەرىستەر ەنگىزۋ ماسەلەلەرىن پىسىقتاۋ تاپسىرىلدى. بۇدان باسقا, قاراجاتتى ماقساتتى ەسەپتەۋدى, ونىڭ ىشىندە ەلەكتروندى اقشا مەن تسيفرلى تەڭگە پلاتفورمالارىن پايدالانا وتىرىپ پىسىقتاۋ قاجەتتىگى اتاپ ءوتىلدى.
سونداي-اق ءبىلىم بەرۋ قىزمەتتەرىن كورسەتۋ ساپاسىن ارتتىرۋعا باعىتتالعان «مەكتەپكە دەيىنگى ۇيىمداردى ۆاۋچەرلىك قارجىلاندىرۋ» جوباسى تانىستىرىلدى. «اقشا بالانىڭ سوڭىنان جۇرەدى» تۇجىرىمداماسى مەملەكەتتىك تاپسىرىس قاراجاتى اتا-انالاردىڭ تاڭداۋىنان كەيىن عانا مەكتەپكە دەيىنگى ۇيىمدارعا اۋدارىلاتىنىن بىلدىرەدى. بۇل بالاباقشالار اراسىندا بالا ءۇشىن باسەكەلەستىكتى ارتتىرۋعا جانە سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى. وقۋ-اعارتۋ مينيسترلىگىنە تاراز جانە شىمكەنت قالالارىندا ۆاۋچەرلىك قارجىلاندىرۋ بويىنشا پيلوتتىق جوبانى اياقتاۋ جانە ونى 2025 جىلعى 1 قاڭتاردان باستاپ بۇكىل ەل بويىنشا تاراتۋدى قامتاماسىز ەتۋ تاپسىرىلدى.