قوستاناي وبلىسىنداعى سەلوعا كوگىلدىر وتىن كەلدى

قوستاناي. 22 قاڭتار. قوستاناي وبلىسى التىنسارين اۋدانىنداعى «كراسنىي كوردون» سەلوسىنا كوگىلدىر وتىن كەلدى. بۇل تۋرالى egemen.kz ءتىلشىسى حابارلادى. «كراسنىي كوردون» سەلوسىنىڭ تۇرعىندارى گازدى كوپتەن كۇتكەن بولاتىن. قازىر قىستىڭ قاقاعان ايازىندا سەلولىقتاردىڭ ۇيىنە كوگىلدىر وتىن كىرىپ, ونىڭ راحاتىن سەزىنىپ وتىر. سەلودا 270 قوجالىق جانە كوپ قاباتتى ۇيلەردە تاعى 70 پاتەر بىرتىندەپ گاز قۇبىرىنا جالعانىپ جاتىر. بۇگىنگە دەيىن 74 ۇيگە كوگىلدىر وتىن كىردى. الداعى ۋاقىتتا سەلو تۇرعىندارىنىڭ بارلىعى دا وركەنيەت جەمىسىنىڭ يگىلىگىن كورەتىن بولادى. ەڭ باستىسى گاز قۇبىرى اۋىلعا كەلدى. «كراسنىي كوردونعا» كوگىلدىر وتىن كەلۋىنىڭ تۇساۋكەسەرىندە اۋدان اكىمى باتىربەك احمەتوۆ اۋىل تۇرعىندارىن قۋانىشتارىمەن قۇتتىقتادى. التىنسارين اۋدانىنىڭ اكىمى باتىربەك احمەتوۆ: «كراسنىي كوردون» سەلوسى تۇرعىندارىنىڭ تۇرمىسى بۇرىنعىدان دا جاقسارۋى ءۇشىن بيۋدجەتتەن 204 ميلليون تەڭگە ءبولىندى. مىنە, وسى قارجىعا 18,6 شاقىرىم گاز قۇبىرى تارتىلىپ, ءار ۇيگە كوگىلدىر وتىن كىرىپ تۇر. ەندى الداعى ۋاقىتتا اۋىز سۋ قۇبىرى تارتىلادى. وعان دا رەسپۋبليكالىق بيۋدجەتتەن قارجى ءبولىنىپ, «اق بۇلاق» باعدارلاماسى بويىنشا جۇمىس ىستەلىنىپ جاتىر», دەدى. اۋىلعا گاز قۇبىرى التى ايدىڭ ىشىندە جەتكىزىلدى. اكىم وسى سەلوعا كەلەتىن گاز قۇبىرىنىڭ سمەتالىق-جوبالىق قۇجاتتارىن جاساۋدىڭ قارجىسىن تولەگەن وسى سەلونىڭ تۇرعىنى, وسىنداعى «كوحان» جاۋاپكەرشىلىگى شەكتەۋلى سەرىكتەستىگىنىڭ ديرەكتورى پاۆەل ۋربانوۆيچكە جانە قۇبىردى تارتقان «سترويگازەكسپەرتيزا» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ەركىن اسادوۆقا راحمەت ايتتى. ءنازيرا جارىمبەتوۆا. دەرەك, سۋرەت: egemen.kz.