اقتاۋ. 22 قاڭتار. اقتاۋدا كۇن ەنەرگياسىن پايدالانۋ زاۋىتى سالىنادى. بۇل تۋرالى egemen.kz ءتىلشىسى حابارلادى.
اقتاۋ قالاسىنىڭ اكىمى ە.ت.جاڭبىرشين, ماڭعىستاۋ وبلىستىق كاسىپكەرلەر پالاتاسىنىڭ ديرەكتورى س.ج.دوسپاەۆ جانە «يمپەريال رەنيۋبل ەنەردجي كازاحستان» كومپانياسىنىڭ ديرەكتورى ن.قوجامۇراتوۆ قۇنى 85,5 ملن اقش دوللارىن قۇرايتىن ينۆەستيتسيالىق جوبانى ىسكە اسىرۋ تۋرالى ۇشجاقتى مەموراندۋمعا قول قويدى.
بيىل قۇرىلىس باستالىپ, 140 گا. كولەمىندە جەر ۋچاسكەسىنە ورنالاساتىن زاۋىت كۇن ساۋلەسىن پايدالانۋ ارقىلى قۋاتى 50 مۆت ەلەكتر ەنەرگياسىن, تاۋلىگىنە 10 مىڭ تەكشە مەتر تۇششىتىلعان سۋ وندىرە الادى. قۇرىلىستى جۇرگىزەتىن ءباا-ءنىڭ «يمپەريال رەنيۋبل ەنەردجي كازاحستان» كومپانياسى زاۋىتتى 20 جىل باسقارىپ, سونان سوڭ اقىسىز مەملەكەت مەنشىگىنە وتكىزەدى. ال زاۋىتتىڭ جۇمىس ىستەۋ كەپىلدى مەرزىمى 25 جىل دەلىنەدى, الايدا جابدىقتارىن جاڭارتسا, ودان ءارى جۇمىس ىستەي بەرەتىن بولادى.
ينۆەستيتسيالىق قۇنى 85,5 اقش دوللارىن قۇرايتىن زاۋىتتا 150 ادام جۇمىسپەن قامتىلادى جانە ونىڭ 10-15-ءى عانا شەتەلدەن اكەلىنىپ, قالعاندارى جەرگىلىكتى تۇرعىنداردان قۇرالماق. سونداي-اق, مامانداردى دايىنداۋ ءۇشىن وڭىردەگى جوعارى وقۋ ورنىمەن كەلىسىم جۇرگىزىلىپ, ارنايى عىلىمي ورتالىق اشۋ جوسپارلانۋدا. بۇل تۋرالى ءباا-نەن كەلگەن Empereal كومپانياسىنىڭ نەگىزىن سالۋشى مانوج ديۆاكاران باياندادى.
اتالعان جوبانى جۇزەگە اسىرۋ ماقساتىندا جەر تەلىمىن بەلگىلەۋ, زاۋىت ورنىن انىقتاپ, ەگجەي-تەگجەيلى جوباسىن جاساقتاۋ جانە ءونىمدى پايدالانۋ كەلىسىمىن جاساۋ مىندەتتەمەلەرى بويىنشا قالا اكىمدىگى, وبلىستىق كاسىپكەرلەر پالاتاسى جانە «يمپەريال رەنيۋبل ەنەردجي كازاحستان» كومپانياسى اراسىندا ەنەرگيا رەسۋرستارىن جاڭعىرتۋ تۋرالى ۇشجاقتى مەموراندۋمعا قول قويىلىپ, نەگىزگى ماسەلەلەر تالقىلاندى.
«جوبا ەلباسى نۇرسۇلتان ءابىش ۇلى نازارباەۆتىڭ «جاسىل ەكونوميكانى» دامىتۋ, التەرناتيۆتى ەنەرگيا قۋاتىن ءتيىمدى پايدالانۋ سىندى تاپسىرمالارىن ىسكە اسىرۋعا, ەكسپو-2017 حالىقارالىق كورمەسىنىڭ ماقساتىنا ساي كەلەدى. ينۆەستورلاردىڭ ماڭعىستاۋعا كەلىپ, كۇن ەنەرگياسىن پايدالانۋ تەحنولوگياسىن سالۋى, بۇل – ەلىمىز ءۇشىن دە, ەنەرگەتيكا سالاسى مەن كوممۋنالدىق قىزمەت ءۇشىن دە زور جەتىستىك. بۇل جاڭا جۇمىس ورىندارىن اشۋمەن قاتار, يننوۆاتسيالىق تەحنولوگيانىڭ قورشاعان ورتانى لاستاۋدى بولدىرماۋىنا, تاريفتەردى تۇراقتى ۇستاۋعا, اقتاۋداعى جاڭا شاعىن اۋداندارىن دامىتۋعا ىقپال ەتەدى», دەدى اقتاۋ قالاسىنىڭ اكىمى ەدىل جاڭبىرشين.
گۇلايىم شىنتەمىرقىزى.
دەرەك, سۋرەت: egemen.kz.