وڭىردە مەملەكەت باسشىسىنىڭ تاپسىرماسىمەن تاسقىن سۋدان زارداپ شەككەن تۇرعىندارعا ارناپ 153 ءۇي سالۋ جوسپارلانعان. بۇگىندە قۇرىلىس جۇمىستارىنىڭ دەنى اياقتالىپ, باسپاناسىز قالعان تۇرعىنداردىڭ كوبى جاڭا ۇيلەرگە قونىستاندى.
ماسەلەن, جانگەلدين اۋدانىندا شىلدەنىڭ 31-ىنە دەيىن 41 تۇرعىن ءۇي سالىنىپ ءبىتۋ كەرەك. قازىر كولقامىس اۋىلىندا سالىنىپ جاتقان 19 ءۇي تاياۋ كۇندەرى تۇرعىندارعا تابىس ەتىلەدى دەپ جوسپارلانىپ وتىر. ال تاۋىشتەگى تۇرعىن ءۇي قۇرىلىسى تولىقتاي اياقتالىپ, 22 وتباسى جاڭا ۇيلەرگە قونىستاندى.
ارقالىق قالاسىندا سۋ تاسقىنىنان زارداپ شەككەن تۇرعىندار ءۇشىن 50 پاتەرلىك تۇرعىن ءۇي سالىنىپ جاتىر. بۇل ۇيگە جاۋاپتى مەردىگەر كومپانيانىڭ وكىلى انتون بوريسوۆتىڭ ايتۋىنشا, قۇرىلىس جۇمىستارى جوسپارعا ساي ءجۇرىپ جاتىر, قۇرىلىس قىركۇيەككە دەيىن تولىق اياقتالادى.
سۋ تاسقىنىنان زارداپ شەككەن قوستاناي قالاسىنىڭ تۇرعىندارى جاڭا ۇيلەرىنە الدەقاشان كىرىپ العان. تاياۋدا قوستاناي اۋدانىنا قاراستى التىنسارين اۋىلىندا 21 وتباسى جاڭا ۇيلەرىنىڭ كىلتىن الدى. قوناي شاعىن اۋدانى مەن التىنسارين اۋىلىنىڭ تۇرعىندارى مەملەكەت سالىپ بەرگەن جاڭا ۇيلەردە تۇرىپ جاتىر.
قازىر وڭىردە 46 جەكە تۇرعىن ءۇيدىڭ, سونداي-اق 1 كوپپاتەرلى ءۇيدىڭ قۇرىلىسى ءجۇرىپ جاتىر. بۇگىنگە دەيىن تاسقىن سۋدان زارداپ شەككەندەر ءۇشىن 315 پاتەر ساتىپ الىنىپ, 815 ءۇي جوندەۋدەن ءوتتى.
«مەملەكەت باسشىسىنىڭ تاپسىرماسىنا سايكەس سۋ تاسقىنىنان زارداپ شەككەندەرگە جان-جاقتى قولداۋ كورسەتىلىپ جاتىر. بيلىكتىڭ, بيزنەستىڭ جانە جەرگىلىكتى تۇرعىنداردىڭ ۇيلەسىمدى جۇمىسىنىڭ ناتيجەسىندە سۋ تاسقىنىنىڭ سالدارى قىسقا مەرزىمدە جويىلادى», دەدى وبلىس اكىمى قۇمار اقساقالوۆ.
قوستاناي وبلىسى