استانا. 26 ءساۋىر. ورتالىق سايلاۋ كوميسسياسىنىڭ حاتشىسى باقىت مەلدەشوۆ رەسپۋبليكامىزداعى بارلىق سايلاۋ ۋچاسكەلەرىندە داۋىس بەرۋ پروتسەسى اياقتالعانىن رەسمي تۇردە ءمالىم ەتتى. بۇل تۋرالى egemen.kz ءتىلشىسى حابارلادى.
ب.مەلدەشوۆ: «ەل وڭىرلەرىندە پرەزيدەنت سايلاۋىندا داۋىس بەرۋ پروتسەسى سوڭىنا جەتتى. قازىر ۋچاسكەلىك سايلاۋ كوميسسيالارىنىڭ مۇشەلەرى سايلاۋشىلاردىڭ داۋىستارىن ساناۋ ۇستىندە. «سايلاۋ تۋرالى» كونستيتۋتسيالىق زاڭنىڭ 3-بابى, 3-تارماعىنا سايكەس, داۋىستاردى ساناۋ ءاربىر كانديدات بويىنشا جەكە جۇرگىزىلەدى», دەدى.
سونداي-اق, ول شەتەلدەردە قۇرىلعان سايلاۋ ۋچاسكەلەرىندە داۋىس بەرۋ ۋاقىت ايىرماشىلىعىنا بايلانىستى ءالى اياقتالماعانىن جەتكىزدى. دالىرەگى, سىرت مەملەكەتتەردە قۇرىلعان 65 سايلاۋ ۋچاسكەسىنىڭ 47-سىندە داۋىس بەرۋ جالعاسۋدا.
جولدىباي بازار.
دەرەك, سۋرەت: egemen.kz.