قوستاناي. 22 قاڭتار. قوستانايدا سكرينينگ باعدالاماسى ارقاسىندا قان اينالۋ جۇيەسى اۋرۋلارىنىڭ انىقتالۋى 7,6 پايىزعا ارتقان. بۇل تۋرالى egemen.kz ءتىلشىسى حابارلادى.
قوستانايدا اشىلعان ءباسپاسوز كلۋبىنىڭ قوناعى بۇل جولى وبلىستىق دەنساۋلىق ساقتاۋ باسقارماسىنىڭ باسشىسى ورال بەكماعانبەتوۆ بولدى. ول وزىمەن بىرگە ورىنباسارلارىن جانە وبلىس ورتالىعىنداعى ەمدەۋ ورىندارىنىڭ باس دارىگەرلەرىن ەرتە كەلىپتى.
الدىڭعى جىلمەن سالىستىرعاندا بىلتىر اۋرۋدان بولاتىن ءولىم-جىتىمدەر ازايعان. ونكولوگيالىق پاتولوگيادان بولاتىن ءولىم-ءجىتىم 6, قۇرت اۋرۋدان بولاتىن ءولىم 26, قان اينالىم جۇيەسىنەن بولاتىن ءولىم-ءجىتىم 24 پايىزعا تومەندەگەن. وبلىستا ءبىر انا ءولىمى تىركەلدى.
وبلىستا سكرينينگ 11 باعدارلاما بويىنشا جۇرگىزىلدى. وندا 12 387 ناۋقاس انىقتالعان. وبلىستىق دەنساۋلىق ساقتاۋ باسقارماسىنىن باسشىسى ورال بەكماعانبەتوۆتىڭ ايتۋىنشا, سكرينينگ شاراسىنىڭ ادام ومىرىنە قاتەرى اسا كوپ ونكولوگيالىق جانە قان اينالىم جۇيەسى اۋرۋلارىنىڭ العاشقى ساتىسىندا انىقتاۋعا ماڭىزى زور. قان اينالىم جۇيەسى اۋرۋىنان زارداپ شەگەتىندەر سانى 2013 جىلى 14-15 پايىزعا وسسە, 2014 جىلى سكرينينگتىڭ ارقاسىندا ولاردى ۋاقىتى انىقتاپ, ناقتى ەم قابىلداعاندار 4,5 پايىز بولدى.
بريفينگتە وبلىس بويىنشا دارىگەرلەردىڭ الدە دە جەتىمسىزدىگى اڭگىمە بولدى. وبلىستا بۇگىندە 1 880 دارىگەر قىزمەت ەتەدى. 280 دارىگەر جەتىسپەيدى. اسىرەسە, جانگەلدين, امانگەلدى سەكىلدى الىس اۋداندارعا جاس ماماندار بارمايدى. وسى ورايدا, ورال ايتباي ۇلى بيىل تۇلەكتەرمەن اڭگىمەلەسۋ ءۇشىن مەديتسينالىق جوعارى وقۋ ورىندارىنا باس دارىگەرلەردىڭ باراتىندىعىن ەسكە سالدى. وبلىستان مەديتسينا اكادەميالارىندا 160 ستۋدەنت وقيدى. بۇل وتە از. سونىمەن قاتار, وبلىسقا بىلىكتى دارىگەرلەردى رەسەيدەن جانە ۋكراينادان شاقىرۋدى دا ويلاستىرىپ وتىرعانىن ايتتى. ورال بەكماعانبەتوۆ: «ءبىزدىڭ دارىگەرلەردىڭ ورتاشا جالاقىسى 160 مىڭ تەڭگەنى قۇرايدى. بۇل از ەمەس. نەسى بار, رەسەيدەن, ۋكراينادان بىلىكتى دارىگەرلەر كەلسىن, بىزدەگى الەۋمەتتىك جاعداي دا, جالاقى دا ولارعا ۇنامايدى دەپ ويلامايمىن. ال بىزگە دارىگەر كەرەك», دەدى.
ءنازيرا جارىمبەتوۆا.
دەرەك, سۋرەت: egemen.kz.