مادەنيەت جانە اقپارات ءمينيسترى ايدا بالاەۆا يسلام ىنتىماقتاستىق ۇيىمى ايەلدەردى دامىتۋ ۇيىمىنىڭ اتقارۋشى ديرەكتورى, دوكتور افنان ءال-شۋايبيمەن كەزدەستى. كەزدەسۋدە گەندەرلىك تەڭدىك ماسەلەلەرى تالقىلانىپ, وتباسىلىق جانە گەندەرلىك ساياسات سالاسىندا تاجىريبە الماسۋ ماسەلەلەرى ءسوز بولدى.
مينيستر ءبىزدىڭ ەل كوپ ەتنوستى ءارى كوپكونفەسسيالى مەملەكەت بولعاندىقتان, بەيبىتشىلىك, تولەرانتتىلىق جانە كەمسىتۋشىلىككە جول بەرمەۋ ساياساتىن ۇستاناتىنىن اتاپ ءوتتى.
– پرەزيدەنت مەملەكەتتىك ساياساتتىڭ باسىمدىقتارىنىڭ ءبىرى سانالاتىن گەندەرلىك تەڭدىككە قول جەتكىزۋگە باعىتتالعان جۇمىستارعا ۇدايى قولداۋ كورسەتەدى جانە وعان كوپ كوڭىل بولەدى. بۇعان ماڭىزدى دالەل رەتىندە گەندەرلىك الشاقتىق يندەكسى بويىنشا حالىقارالىق رەيتينگتە قازاقستان 2023 جىلى 146 ەلدىڭ اراسىندا 62 ورىنعا يە بولعانىن اتاپ وتۋگە بولادى, – دەدى ايدا بالاەۆا.
ايدا عالىمقىزى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قىزمەتىنە, سونداي-اق وتباسىلىق جانە گەندەرلىك ساياساتتى زەرتتەۋ ورتالىعىنىڭ جۇمىسىنا توقتالدى. گەندەرلىك ساياسات ماسەلەلەرىمەن اينالىساتىن 500-دەن استام ۇەۇ جانە 70-كە جۋىق ۇەۇ-نى بىرىكتىرەتىن ايەلدەر كوشباسشىلىعى مەكتەپتەرىنىڭ ۇلتتىق جەلىسى ماڭىزدى ءرول اتقارادى. ەلىمىزدىڭ بارلىق وڭىرىندە «ايەل ساياساتكەرلەر كلۋبى» جانە ايەلدەر كاسىپكەرلىگىن دامىتۋ ورتالىقتارى جۇمىس ىستەيدى.
دوكتور افنان ءال-شۋايبي ەلىمىزدىڭ وتباسىلىق-تۇرمىستىق زورلىق-زومبىلىققا قارسى كۇرەستەگى جەتىستىكتەرىنە ەرەكشە توقتالىپ, ورتالىق ازيا ەلدەرى اراسىندا قازاقستان وسى سالادا كوشباسشى ورىنعا يە ەكەنىن اتاپ ءوتتى.
تاراپتار سونداي-اق حالىقارالىق الاڭداردى دا قوسا العاندا, قازاقستان مەن يىۇ ايەلدەر ۇيىمىنىڭ ءوزارا بايلانىس پەرسپەكتيۆالارىن تالقىلادى. كەزدەسۋ سوڭىندا قاتىسۋشىلار ايەلدەر قۇقىعىن قورعاۋدىڭ نەگىزگى ماسەلەلەرى بويىنشا ىنتىماقتاستىقتى تەرەڭدەتۋگە جانە پىكىر الماسۋعا نيەت ءبىلدىردى.