گرۋزيانىڭ كۋتايسي قالاسىندا وتكەن EuPhO-2024 ەۋروپالىق فيزيكا وليمپياداسىندا قازاقستان قۇراماسىنىڭ قورجىنى تاعى ءتورت مەدالمەن تولىقتى. جىل سايىن ءداستۇرلى تۇردە وتەتىن بۇل ءبىلىم بايگەسى بيىل سەگىزىنشى رەت ۇيىمداستىرىلىپ وتىر. حالىقارالىق فيزيكا سايىسىنا وسى جىلى 55 ەلدەن 256 وقۋشى قاتىسىپ, باق سىناعان. ەل نامىسىن قورعاعان وقۋشىلارىمىز ەكى كۇمىس, ەكى قولا مەدالعا قول جەتكىزىپ, اتالعان سايىسقا قاتىسقان 55 ەلدىڭ اراسىندا جالپىكوماندالىق توعىزىنشى ورىندى يەلەندى.
ەۋروپالىق فيزيكا وليمپياداسى جىل سايىن جوعارى سىنىپ وقۋشىلارى اراسىندا وتەدى. بىلتىر دا ءبىزدىڭ بالالار گەرمانيانىڭ گاننوۆەر قالاسىندا وتكەن وليمپيادادا ءتورت بىردەي جۇلدەنى جەڭىپ العان ەدى. بيىل ۇزدىك ناتيجە كورسەتكەن قازاقستان كومانداسىنىڭ قۇرامىندا الماتى قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى بەكاسىل ەلۋباي, استانا قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 10-سىنىپ وقۋشىسى التاير اقانوۆ, ن.نۇرماقوۆ اتىنداعى قاراعاندى وبلىستىق مامانداندىرىلعان مەكتەپ-ليتسەي-ينتەرناتىنىڭ 9-سىنىپ وقۋشىسى نۇرگۇل ەگەنبەرگەنوۆا, اتىراۋ قالاسىنىڭ № 1 ء«بىلىم-يننوۆاتسيا» مەكتەپ-ينتەرناتىنىڭ 10-سىنىپ وقۋشىسى نۇراسىل بارلىباەۆ بار.
«ەۋروپالىق فيزيكا وليمپياداسى – بۇل عىلىمعا, تانىمعا قىزىعۋشىلىق تانىتقان دارىندى وقۋشىلارعا ارنالعان حالىقارالىق ءبىلىم بايگەسى. اتالعان سايىس العاش رەت 2017 جىلى ەستونيادا ءوتتى. ال قازاقستان قۇراما كومانداسى ەۋروپالىق فيزيكا وليمپياداسىنا 2020 جىلى تۇڭعىش رەت قاتىسىپ, جوعارى ناتيجە كورسەتتى. ول كەزدە سايىس قاشىقتان وتكىزىلگەن ەدى. وليمپيادانىڭ قورىتىندىسى بويىنشا وقۋشىلارىمىز ءبىر التىن, ەكى كۇمىس, ءبىر قولا مەدالعا, سونداي-اق ءبىر قۇرمەت گراموتاسىنا يە بولدى», دەيدى دارىن رەسپۋبليكالىق عىلىمي-پراكتيكالىق ورتالىعى ديرەكتورىنىڭ ورىنباسارى نۇرلان جۇماگەلدى.
قۇراما كوماندانىڭ جەتەكشىسى گۇليا نۇرباقوۆانىڭ ايتۋىنشا, وليمپيادا تەوريالىق جانە ەكسپەريمەنتتىك ەكى كەزەڭنەن تۇرعان. ونىڭ ارقايسىسى 20 ۇپايعا باعالانعان. ياعني بارلىق سۇراققا دۇرىس جاۋاپ بەرگەن وقۋشى 40 ۇپايعا يە بولادى.
«ەندى ءبىر قىزىعى, التىن مەدالعا 29,6 بالل جيناعان وقۋشى قول جەتكىزەدى. ال ءبىزدىڭ بەكاسىل ەلۋباي 29,5 ۇپاي جيناپ, ياعني ءبىرىنشى ورىنعا بار-جوعى 0,1 ۇپاي جەتپەگەندىكتەن, كۇمىس مەدالدى قاناعات تۇتتى. بىراق بۇل ناتيجە بەكاسىلدىڭ جىگەرىن جاسىتقان جوق, كەرىسىنشە نامىسىن قايراپ, كوزىندەگى وتىن ودان ءارى لاۋلاتا ءتۇستى. جالپى, قازاقستان قۇراما كومانداسى 4 وقۋشىدان قۇرالدى. ولاردى 2022-2023 وقۋ جىلىندا وتكەن رەسپۋبليكالىق وليمپياداداعى ناتيجەلەرىنە قاراپ, ىرىكتەپ الدىق. سودان بەرى جاس دارىندارىمىز دايىندىقتارىن شىڭداپ, ءال-فارابي اتىنداعى قازاق ۇلتتىق ۋنيۆەرسيتەتىنىڭ فيزيكا-تەحنيكالىق فاكۋلتەتى بازاسىندا ءۇش رەت وقۋ-جاتتىعۋ جيىندارىنان ءوتتى. مىنەكەي, وليمپيادا ناتيجەسىندە ءتورت وقۋشىمىزدىڭ تورتەۋى دە جۇلدەلى بولىپ, ناقتىراق ايتساق, 2 كۇمىس جانە 2 قولا مەدالعا قول جەتكىزىپ ەل ءۇمىتىن اقتادى. الداعى ۋاقىتتا وقۋشىلارىمىز بۇدان دا جاقسى ناتيجە كورسەتىپ, ەلىمىزدىڭ قورجىنىن التىن مەدالمەن دە تولىقتىراتىنىنا سەنىمىم مول», دەدى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيزيكا-تەحنيكالىق فاكۋلتەتى, تەوريالىق جانە يادرولىق فيزيكا كافەدراسىنىڭ دوتسەنتى گ.نۇرباقوۆا.
ادەتتە بۇل سايىسقا ەۋروپا ەلدەرىنەن وتىزعا جۋىق ەل قاتىساتىن. الايدا وسى جىلى جارىسقا تۇسۋشىلەر قاتارى كۇرت ءوسىپ, ەۋروپادان بولەك ازيا, امەريكا ەلدەرى قوسىلىپ, قاتىسۋشى ەلدەر سانى 55-كە جەتكەن. 256 وقۋشىنىڭ اراسىنان ەكىنشى ورىنعا يە بولعان بەكاسىل ەلۋبايدىڭ ايتۋىنشا, بۇل باسەكەدە ءوز-ءوزىن تەمىردەي تارتىپكە باعىندىرا العان بالالار عانا توپ جارادى.
«فيزيكا وليمپياداسىنا ءۇش جىل تىنباي دايىندالدىم. مىنە, بيىل سول ەڭبەكتىڭ جەمىسىن حالىقارالىق دودالاردا كورىپ وتىرمىز. ماسەلەن, ماۋسىم ايىندا وتكەن ازيا وليمپياداسىندا قولا مەدالدى ەنشىلەسەم, بۇگىن ەۋروپا وليمپياداسىندا كۇمىس مەدالعا قول جەتكىزدىم. وكىنىشكە قاراي, ءبىرىنشى ورىننىڭ تۇعىرىنان كورىنۋىمە 0,1 ۇپاي جەتپەي قالدى. وكىنىش وزەكتى ورتەسە دە, سول ءبىر قاتەلىگىمنەن ساباق الىپ, ءبىراز شىڭدالدىم. الداعى ۋاقىتتا وليمپياداعا دايىندىقتى ودان ءارى كۇشەيتىپ, ەلىمىزدىڭ قورجىنىنا التىن مەدال اكەلەمىن دەپ ويلايمىن جانە سوعان بەك سەنىمدىمىن», دەيدى ول.
ال وسى سايىستا ءۇشىنشى ورىن العان نۇرگۇل ەگەنبەرگەنوۆانىڭ ايتۋىنشا, تەوريالىق بىلىممەن قاتار پراكتيكالىق ءبىلىمنىڭ دە ماڭىزى زور.
«كۋتايسي حالىقارالىق ۋنيۆەرسيتەتىندە وتكەن وليمپيادادا ءبىز ءبىلىمىمىزدى شىڭداپ قانا قويماي, قالانىڭ تاريحي-مادەني ورىندارىمەن تانىستىق. ال سايىسقا كەلسەك, تەوريالىق كەزەڭنەن سۇرىنبەي وتسەم دە, ەكسپەريمەنتتىك كەزەڭدە ءبىرشاما قينالعانىم راس. بىراق سونىڭ ارقاسىندا الداعى ۋاقىتتا قالاي, قاي باعىتتا ىزدەنۋىم كەرەكتىگىمدى ءبىلدىم. ودان بولەك, وسى بەس كۇن ىشىندە شەتەلدەن كەلگەن ءبىلىم الۋشىلاردىڭ تاجىريبەسىنە قانىق بولدىق», دەيدى نۇرگۇل ەگەنبەرگەنوۆا.
وقۋشىلاردىڭ وسىناۋ جەتىستىگى بىرنەشە جىلعى ەڭبەگىنىڭ جەمىسى ەكەنى انىق. ءبىز دە جاس فيزيكتەردى جەڭىستەرىمەن قۇتتىقتايمىز ءارى حالىقارالىق دودالاردا تولاعاي تابىستارعا جەتىپ, توپ جارا بەرۋلەرىنە تىلەكتەسپىز!