كەشە مادەنيەت جانە سپورت مينيسترلىگىندە قىسقى جانە جازعى سپورت تۇرلەرى فەدەراتسيالارى جۇمىسىنىڭ قورىتىندىسى مەن فەدەراتسيالاردىڭ مينيسترلىكپەن ءوزارا ءارىپتەستىگىن ودان ءارى جەتىلدىرۋ ماسەلەسىنە ارنالعان جيىن ءوتتى. وعان پرەمەر-ءمينيستردىڭ ورىنباسارى بەردىبەك ساپارباەۆ قاتىستى.
جيىندا مادەنيەت جانە سپورت ءمينيسترى ارىستانبەك مۇحامەدي ۇلى وتكەن جىلدا اتقارىلعان جۇمىستار تۋرالى بايانداما جاسادى. ول سپورت فەدەراتسيالارىنىڭ جۇمىسى, سپورتشىلاردىڭ بىلتىرعى جەتىستىكتەرى, بۇقارالىق سپورتتى دامىتۋدا ىستەلىنگەن شارالار تۋرالى ايتىپ, مينيسترلىكتىڭ الداعى كەزگە جوسپارلانعان جۇمىستارىنا كەڭىنەن توقتالدى. وندا مينيستر 2016 جىلى ريو-دە-جانەيرودا وتەتىن وليمپيا ويىندارىنا قازاقستاندىق سپورتشىلار كەمىندە 115 ليتسەنزيا يەلەنۋى كەرەكتىگىن, وسى ماقساتتا سپورتشىلارىمىزدى جارىستارعا دايىنداۋ جۇمىسىنا باسا نازار اۋدارىلىپ جاتقانىن اتاپ ءوتتى.
ونىڭ ايتۋىنشا, وليمپياداعا سپورت تۇرلەرى بويىنشا ليتسەنزيالار يەلەنۋ جوسپارى بەكىتىلگەن. «وسىعان بايلانىستى ەلىمىزدىڭ ۇلتتىق قۇراما كوماندالارى لوندون وليمپياداسىنان كەم ليتسەنزيا يەلەنبەۋى كەرەك. بيىل سپورتشىلارىمىز وليمپيادا جولداماسى ساراپقا سالىناتىن جارىستارعا قاتىسادى. وسى سىنداردان ءسۇرىنبەي ءوتۋ ءۇشىن وتانداستارىمىز جارىستارعا تىڭعىلىقتى دايىندالۋى كەرەك», دەدى ول.
سونىمەن بىرگە, ا.مۇحامەدي ۇلى ۇلتتىق قۇراما كوماندالاردىڭ ساپالى دايىندىقتارىن قامتاماسىز ەتۋ ءۇشىن «سامۇرىق-قازىنا» قورى تاراپىنان قوسىمشا قارجىلاندىرۋ ماسەلەسى شەشىلسە دەگەن ۇسىنىسىن ايتتى. ودان كەيىن ۆەدومستۆو باسشىسى كونكي تەبۋشىلەردىڭ كاسىپقوي كلۋبىن اشۋ قاجەتتىگى تۋرالى ماسەلە كوتەردى. ونىڭ ايتۋىنشا, قازىرگى كەزدە قىسقى سپورت تۇرلەرىن دامىتۋ وزەكتى ماسەلەگە اينالىپ وتىر. بۇگىندە ەلىمىزدە قىسقى سپورتتىڭ 15 ءتۇرى بويىنشا 8 فەدەراتسيا مەن 2 قاۋىمداستىق قىزمەت ەتىپ كەلەدى. الايدا, ەلىمىزدىڭ قىسقى سپورتتاعى ناتيجەسى كوڭىل كونشىتەرلىك ەمەس. «سوندىقتان كونكي تەبۋشىلەردىڭ كاسىپقوي كلۋبى قۇرىلسا, سپورتشىلارىمىزدىڭ وليمپيادا, ازيادا سياقتى كەشەندى جارىستارعا دايىندىعى جاقسارار ەدى», دەدى ول. وسى جەردە مينيستر تاعى دا بۇل جوبانى «سامۇرىق-قازىنا» قورىنىڭ قولداۋىنسىز جۇزەگە اسىرۋ مۇمكىن ەمەستىگىن اتاپ ءوتتى. جالپى, ول قىسقى سپورت ماسەلەسىنە كەلگەندە سپورتشىلاردى سپورت نىساندارىمەن, جاتتىعاتىن جەرلەرمەن قامتاماسىز ەتۋ كەرەكتىگىن ايتتى.
وسىدان كەيىن مينيسترلىكتىڭ سپورت جانە دەنەشىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ, ۇلتتىق پاراليمپيادا كوميتەتىنىڭ پرەزيدەنتى دارحان قالەتاەۆ, اۋىر اتلەتيكا فەدەراتسياسىنىڭ پرەزيدەنتى جانات تۇسىپبەكوۆ, شاڭعى سپورتى تۇرلەرى قاۋىمداستىعىنىڭ ۆيتسە-پرەزيدەنتى ۆلاديمير سميرنوۆ, دزيۋدو فەدەراتسياسىنىڭ باس حاتشىسى اباي قايماقوۆ ءسوز سويلەپ, بىلتىرعى جىلى اتقارىلعان جۇمىستارى تۋرالى ايتىپ بەردى.
جيىن سوڭىندا ب.ساپارباەۆ سپورت فەدەراتسيالارىنىڭ جۇمىسى مەن سپورتشىلاردىڭ جارىسقا دايىندىعىن جاقسارتۋ ماسەلەسىنە قاتىستى ءوز ويىن ءبىلدىردى. ول الدىمەن فۋتبول فەدەراتسياسىنىڭ جۇمىسىن سىنعا الدى. ۇكىمەت باسشىسىنىڭ ورىنباسارى ءبىزدىڭ ەلدە كوبىنە سىرتتان كەلگەن فۋتبولشىلارعا جاعداي جاسالاتىنىن, ال بالالار مەن جاسوسپىرىمدەر فۋتبولىنا ءتيىستى دەڭگەيدە كوڭىل بولىنبەيتىنىن ەسكەرتتى. وندا ول ءوز ەلىنە قاجەتى بولماي قالعان كەلىمسەكتەرگە مىڭداعان دوللار اقشا تولەگەنشە, ءوز ەلىمىزدىڭ جەتكىنشەكتەرىنە جاعداي جاساپ, سپورت الاڭدارىن سالىپ بەرگەن الدەقايدا ماڭىزدىراق دەپ قاداپ ايتتى. دەگەنمەن, ول قازاقستان فۋتبول فەدەراتسياسىنىڭ جاڭا باسشىلىعى جاقسى ناتيجەلەر كورسەتۋگە تىرىسادى دەگەن سەنىم ءبىلدىردى. پرەمەر-ءمينيستردىڭ ورىنباسارى جاقسى ناتيجە كورسەتىپ جۇرگەن بوكس, اۋىر اتلەتيكا, تەننيس فەدەراتسيالارىنىڭ جۇمىسىن وڭ باعالادى. ال قىسقى سپورتقا كەلگەندە ب.ساپارباەۆ ششۋچەدە سالىنىپ جاتقان وليمپيادالىق بازانىڭ قۇرىلىسىن تەزدەتىپ, قىسقى سپورتقا ارنالعان سپورت نىساندارىن كوبەيتۋ كەرەكتىگىن اتاپ ءوتتى. وسىدان كەيىن ول سپورتپەن اينالىساتىن قازاقستان حالقىنىڭ ۇلەسى 30 پايىزدان كەم بولماۋى كەرەكتىگىن, بۇل – ەلباسىنىڭ جۇكتەگەن مىندەتى ەكەنىن ەسكە سالدى. ودان ءارى ب.ساپارباەۆ سپورت فەدەراتسيالارىنا جۇمىستى جاقسارتۋ ءۇشىن سپورت كوميتەتىمەن, جەرگىلىكتى بيلىك ورگاندارىمەن جانە دەمەۋشىلەرمەن جۇمىس ىستەۋدى تاپسىردى.
داستان كەنجالين,
«ەگەمەن قازاقستان».