ءماجىلىس توراعاسىنىڭ ورىنباسارى داريعا نازارباەۆا گفر-دىڭ قازاقستانداعى توتەنشە جانە وكىلەتتى ەلشىسى گيدو حەرتسپەن كەزدەستى. ەلشىمەن اڭگىمە بارىسىندا ءماجىلىستىڭ پارلامەنتتىك دەلەگاتسياسىنىڭ جاقىن ۋاقىتتا گەرمانياعا جاسايتىن ساپارى جايى تالقىلاندى, دەپ حابارلادى وسى پالاتانىڭ ءباسپاسوز قىزمەتى.
ساپار ماقساتى – گەرمانيا فەدەرالدىق كانتسلەرى انگەلا مەركەلگە قازاقستان پرەزيدەنتى نۇرسۇلتان نازارباەۆتىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس ءمۇشەلىگىنە قازاقستاننىڭ كانديداتۋراسىن ىلگەرىلەتۋگە قاتىستى جولداۋىن تابىس ەتۋ.
ۆيتسە-سپيكەر الداعى ساپاردىڭ ماڭىزدىلىعىنا نازار اۋدارا كەلىپ, گەرمانيا مەن قازاقستاننىڭ جاقىن ءارى سەنىمدى ارىپتەستەر ەكەنىن اتاپ ءوتتى.
ءبىزدىڭ ەلدەرىمىزدىڭ ەكىجاقتى قارىم-قاتىناسى تۇراقتى ساياسي ۇنقاتىسۋ, ساۋدا-ەكونوميكالىق, مادەني-گۋمانيتارلىق بايلانىستاردى جۇيەلى كەڭەيتۋ جولىندا دامىپ كەلەدى. بۇۇ, ەقىۇ جانە باسقا دا ۇيىمدار شەڭبەرىندە ءوزارا ءىس-قيمىلدى ودان ءارى نىعايتۋ جايى دا نازاردان تىس قالعان ەمەس, دەي كەلە داريعا نازارباەۆا:
– عالامدىق قاۋىپسىزدىك ماسەلەلەرىندە, ارىپتەستىك, دوستىق قاتىناستا, الەۋمەتتىك, ەكونوميكالىق جانە مادەني سالالارداعى ءوزارا ءىس-قيمىلدى دامىتۋدا ءبىزدىڭ ەلدەرىمىزدىڭ كوزقاراسى ورتاق. ولاردىڭ بارلىعىن گەرمانياعا ساپارىمىز بارىسىندا جانە دەلەگاتسيا باعدارلاماسىندا بەلگىلەنگەن كەزدەسۋلەر كەزىندە تالقىلايتىن بولامىز, – دەدى.
ءوز كەزەگىندە ەلشى گەرمانيانىڭ قازاقستاننىڭ ماڭىزدى حالىقارالىق باستامالارىن قولدايتىنىن جانە ءبىزدىڭ ەلىمىزبەن ىقپالداستىقتى ودان ءارى دامىتۋعا مۇددەلى ەكەندىگىن العا تارتتى.
كەزدەسۋ يەلەرى ارىپتەستىك باسىمدىقتى ءسوز ەتىپ, ەكى ەل اراسىنداعى بايلانىستى, سونىڭ ىشىندە, پارلامەنتارالىق ديپلوماتيانى جاڭا بەلەسكە كوتەرۋ قاجەتتىلىگىن اتاپ ءوتتى.
كەزدەسۋگە ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ حاتشىسى ۆيكتور روگالەۆ قاتىستى.