اباي وبلىسى اۋماعىندا تاريحى تەرەڭ ونەركاسىپ ورىندارى بارشىلىق. كەڭەس زامانىندا جەڭىل جانە توقىما ونەركاسىبى كاسىپورىندارىنىڭ ۇشتەن ءبىر بولىگىن قامتىپ تۇردى. اسىرەسە, وتكەن عاسىردىڭ 60-80 جىلدارىندا قورعانىس ونەركاسىبى قارىشتاپ دامىدى. ارينە, توقسانىنشى جىلدارداعى توقىراۋ زوبالاڭى بۇل وڭىرگە دە ءتيدى. ۇزاق ۋاقىت ەڭسە تىكتەپ, ەس جيا الماي وتىردى. دەگەنمەن بۇگىندە سەرپىلىس بار. وڭىرلىك كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ ۇسىنعان دەرەگىنە سۇيەنسەك, بۇگىندە اباي وبلىسى بويىنشا 478 كاسىپورىن 13 مىڭنان استام ادامعا جۇمىس بەرىپ وتىر.
ونىڭ ىشىندە 359 كاسىپورىن وڭدەۋ وندىرىسىمەن اينالىسادى. ايماقتا نەگىزىنەن ماشينا جاساۋ, جەڭىل ونەركاسىپ, مەتاللۋرگيا, ازىق-ت ۇلىك ءوندىرۋ جانە مەتالل ەمەس ونىمدەردى ءوندىرۋ سالالارى قارقىندى دامىپ كەلەدى. وسى ورايدا وبلىس ورتالىعى سەمەي قالاسىندا ورنالاسقان «Kondiz» كونديتەرلىك فابريكاسىن ايىرىقشالاپ ايتۋعا بولادى. 2013 جىلى اشىلعان فابريكا ايماقتاعى جەتەكشى كونديتەرلىك وندىرۋشىلەردىڭ بىرىنە بالانادى. كاسىپورىندا 200-گە تارتا قىزمەتكەر جۇمىس ىستەيدى. زاماناۋي قوندىرعىلارمەن جاساقتالعان ءوندىرىس وشاعىنان جىلىنا 22 000 توننا ءونىم شىعارىلادى. ونىمدەر ىشكى نارىققا جىبەرىلەدى, سونىمەن قاتار تمد ەلدەرىنە, اتاپ ايتقاندا گرۋزيا, قىرعىزستان, وزبەكستان, رەسەيگە جانە قىتايعا ەكسپورتتالادى. وسى باستاما ۇننان جاسالعان كونديتەرلىك ونىمدەردى وندىرۋشىلەر اراسىندا «Kondiz» فابريكاسىنىڭ جەتەكشى ورىنعا شىعۋعا مۇمكىندىك بەرىپ, ءوندىرىستىڭ وركەندەۋىنە جاعداي تۋعىزىپ جاتىر.
ءوندىرىس ورنىندا ورناتىلعان نەمىس كومپانياسىنىڭ «Werner & Pfeiderer» تەحنولوگيالىق جابدىقتارىنىڭ كومەگىمەن قازىرگى ۋاقىتتا 100-دەن استام ءتۇرلى پەچەنە شىعارىلادى. ءار ءونىم كاسىپورىن زەرتحاناسىندا مۇقيات باقىلاۋدان وتەدى.
ء«بىز ءۇشىن قىزمەتكەرلەردىڭ كاسىبي جانە جەكە دامۋى, ارقايسىسىنىڭ ەڭبەك ۇلەسىن ءادىل باعالاۋ جانە باسەكەگە قابىلەتتى ەڭبەكاقى تولەۋ, پىكىرلەستەر كومانداسىن قالىپتاستىرۋ, ساقتاۋ ماڭىزدى. ءوز توبىمىزدى دارىندى ماماندارمەن تولىقتىرۋعا ءاردايىم دايىنبىز. بىزگە جاڭا جاعدايلارعا بەيىمدەلە الاتىن, ماقساتقا ۇمتىلاتىن جانە جاۋاپتى, جۇمىس پەن جەكە ءومىر اراسىندا اقىلعا قونىمدى ىمىرا تابا الاتىن قىزمەتكەرلەر قاجەت», دەيدى «Kondiz» كونديتەرلىك فابريكاسىنىڭ ديرەكتورى ميراس ءشارىپوۆ.
فابريكادا قىزمەتكەرلەردىڭ بىلىكتىلىگىن ارتتىرۋ, قاۋىپسىزدىك تەحنيكاسى جانە ەڭبەكتى قورعاۋ بويىنشا وقىتۋ ترەنينگتەرى مەن سەمينارلار ءجيى ۇيىمداستىرىلادى. مۇنداي يگى ءىس-شارالار ۇيىمشىل ۇجىمنىڭ قالىپتاسۋىنا سەپتىگىن تيگىزىپ وتىر دەيدى ميراس جاناربەك ۇلى.
جىل سايىن جاڭا ءورىس تاۋىپ, تىڭ يدەيالاردى قۇپتايتىن جۇمىس ورنىندا قىزمەتكەرلەرگە بارلىق الەۋمەتتىك جاعداي جاسالعان. قىزمەتتىك كولىكپەن قامتاماسىز ەتىلگەن. سونىمەن بىرگە ءوز ونىمدەرىن ساتىپ العان جاعدايدا جەڭىلدىكتەر دە قاراستىرىلعان.
اباي وبلىسى