قوستاناي. 26 ءساۋىر. تاڭەرتەڭنەن جاۋعان جاۋىن ءتۇس اۋا سىركىرەپ باسىلعان جوق. قولشاتىرىن كوكتەمنىڭ جەلىنە قالقالاي ۇستاعان قوستانايلىقتار سايلاۋ ۋچاسكەلەرىنە قاراي جىلدامداتا باسىپ, داۋىس بەرۋگە اسىقتى. داۋىس بەرۋ تۇۇستەن كەيىن دە تولاستاعان جوق. ساعات 16. 00 كەزىندە وبلىس تۇرعىندارىنىڭ 80 پايىزى داۋىس بەرىپ ۇلگەردى. بۇل تۋرالى egemen.kz ءتىلشىسى حابارلادى.
ۇلى وتان سوعىسىنىڭ ارداگەرى, قازاقستاننىڭ ەڭبەك سىڭىرگەن كولىك قىزمەتكەرى, كسرو –نىڭ قۇرمەتتى تەمىرجولشىسى, قوستاناي وبلىسىنىڭ قۇرمەتتى ازاماتى بەرتران رۋبينشتەين №21 سايلاۋ ۋچاسكەسىنە كەلدى. قوستانايداعى كوپتى كورگەن, قۇيماقۇلاق اقساقالداردىڭ ءبىرى بەرتران ءيوسيفوۆيچتى دە سوڭعى جىلدارى كارىلىك باسىنا باستادى. 93-كە قاراعان قاريا قازىر قىزى, فيلولوگيا عىلىمدارىنىڭ دوكتورى ەلەنا يوسيفوۆنانىڭ سۇيەمەلدەۋىمەن جۇرەدى. ول بيۋللەتەنىن الىپ, ءوز تاڭداۋىن جاسادى.
ۇلى وتان سوعىسىنىڭ ارداگەرى بەرتران رۋبينشتەين:«جاسىم توقساننان استى. ءومىردى قيىن كۇندەرمەن باستادىق. ۇلى وتان سوعىسىنا قاتىستىق, امان ەلگە كەلگەن سوڭ ەڭبەككە ارالاستىق. كەۋدەمدە جانىم باردا ەلدىڭ تىنىشتىعى, باقىتى ءۇشىن قالاي ءۇنسىز وتىرامىن؟ ءوز داۋىسىمدى بەرىپ, ازاماتتىق ۇستانىمىمدى تانىتتىم. اينالاداعى وتتى كورىپ وتىرعان قازاقستاندىقتار قازىر تەك تىنىشتىقتى تىلەيدى. مەن دە سونىڭ ءبىرىمىن» دەدى.
№31 سايلاۋ ۋچاسكەسىنە ەڭبەك ەرى, اتاقتى مەحانيزاتور كامشات دونەنباەۆا داۋىس بەرۋگە كەلدى. ءبىرازدان بەرى دەنساۋلىعى سىر بەرىپ جۇرگەن كامشات بايعازىقىزىن ۇلى اسقار مەن نەمەرەسى التىناي الىپ كەلدى.
كامشات اپا: «بۇگىن ەلىمىزدە ەرەكشە كۇن دەپ ايتۋعا بولادى. مەملەكەتىمىزدىڭ باسشىسىن تاڭداپ, سايلاپ الامىز. ەلىمىز دامۋى جانە بالالاردىڭ بولاشاعى داڭعىل, ەلدە تىنىشتىق بولۋى ءۇشىن دە مەملەكەت باسشىسىن سايلاۋعا جۇرتشىلىق اسا جاۋاپكەرشىلىكپەن قاراۋى ءتيىس. مەن دەنساۋلىعىما بايلانىستى تۇستەن كەيىن كەلدىم, سونىڭ وزىندە سايلاۋ ۋچاسكەسىنە اعىلعان ادامدا ەسەپ جوق. شۇكىرشىلىك, ءبارى دە ەلدىڭ بىرلىگىنىڭ ارقاسى» دەدى.
№ 60-شى سايلاۋ ۋچاسكەسىنە داۋىس بەرۋگە كەلگەن قالا تۇرعىندارى ءوز تاڭداۋىن جاساعاننان كەيىن دەرەۋ كەتىپ قالعان جوق. پەداگوگيكا كوللەدجىنىڭ ۇجىمى سايلاۋشىلار ءۇشىن ستۋدەنتتەردىڭ قولونەر كورمەسىن جاساپ قويىپتى. ونى قىزىقتاماعان سايلاۋشىلار كەمدە-كەم. ستۋدەنتتەر سايلاۋ ۋچسكەسىنىڭ اۋلاسىندا فلەش-موب بيلەدى. ول وسى سايلاۋ ۋچاسكەسىندە بولعان شەتەلدىك بايقاۋشىلارعا دا ۇناپتى.
تمد بايقاۋشىلار ميسسياسىنىڭ مۇشەسى لاپاتينسكايا گالينا:تاڭەرتەڭنەن بەرى بىرنەشە سايلاۋ ۋچاسكەسىنە باردىق. ادامداردىڭ بەلسەندىلىگىنە تاڭعالعانىمىزدى جاسىرا المايمىز. ەشقانداي ەرەجە بۇزۋ, كەمشىلىك بايقالمادى, بارلىعى دا مەرەكەدەگىدەي كوڭىلدى» دەدى.
تۇستەن كەيىنگى ساعات 16.00 شاماسىندا وبلىستىق سايلاۋشىلار كوميسسياسى وبلىس سايلاۋشىلارىنىڭ 80 پايىزدان استامى داۋىس بەرگەنىن مالىمدەدى.
ءنازيرا جارىمبەتوۆا.
دەرەك, سۋرەت: egemen.kz