سەنات دەپۋتاتى ايگۇل قاپباروۆا شىمكەنت قالاسىندا قولجەتىمدى تۇرعىن ءۇي قۇرىلىسىنىڭ بارىسىمەن تانىسىپ, تۇرعىن ءۇي جۇيەسىن جەتىلدىرۋ تەتىكتەرىن تۇرعىندارمەن بىرگە تالقىلادى. اقجايىق جانە بوزارىق شاعىن اۋداندارىندا 1 176 پاتەرى بار 35 تۇرعىن ءۇيدىڭ قۇرىلىسى اياقتالىپ كەلەدى.
«بۇل ۇيلەردى گازبەن, سۋمەن, ەلەكترمەن جانە كارىزبەن قامتاماسىز ەتۋ رەسپۋبليكالىق بيۋدجەتتەن تولىق قارجىلاندىرىلماعانى نەگىزگى ماسەلە بولىپ وتىر. ەگەر ينجەنەرلىك ىشكى جۇيەلەردىڭ قۇرىلىسى ۋاقىتىندا اياقتالماسا, بۇل تۇرعىن ءۇيدى كۇتىپ وتىرعان ازاماتتارعا پاتەرلەردى ءبولۋدىڭ كەشىگۋىنە, سونداي-اق جەرگىلىكتى بيۋدجەتكە ساتۋدان تۇسەتىن تۇسىمدەردىڭ بولماۋىنا اكەلۋى مۇمكىن», دەدى ا.قاپباروۆا.
شىمكەنتتە ازاماتتاردى تۇرعىن ۇيمەن قامتاماسىز ەتۋ اسا ماڭىزدى ماسەلە بولىپ وتىر. بۇگىنگى تاڭدا كەزەكتە 51 مىڭنان استام ادام تۇرادى, ولاردىڭ 30 مىڭعا جۋىعى – حالىقتىڭ الەۋمەتتىك وسال توپتارى مەن كوپبالالى وتباسىلار. سونىمەن قاتار «وتباسى بانكتە» الەۋمەتتىك تۇرعىن ءۇي الۋ ءۇشىن 175 مىڭنان استام جيناقتاۋشى شوت اشىلدى.
سەناتور جەرگىلىكتى تۇرعىندارمەن كەزدەسكەن كەزدە مەملەكەت باسشىسى وتكەن جىلى حالىقتىڭ الەۋمەتتىك وسال توپتارىن قامتاماسىز ەتۋ ءۇشىن قولجەتىمدى نەسيەگە بەرىلەتىن تۇرعىن ءۇي قۇرىلىسىن ۇلعايتۋدى تاپسىرعانىن اتاپ ءوتتى. كەزدەسۋدە سونىمەن قاتار مەكتەپ سالۋ جانە جەكە مەنشىكتەگى پايدالانىلماعان جەرلەردى قايتارۋ ماسەلەلەرى تالقىلاندى. سەناتور جەرگىلىكتى تۇرعىنداردىڭ وتىنىشتەرى مەن ۇسىنىستارىن تىڭداي كەلىپ, ايتىلعان بارلىق ماسەلەلەر قاراۋ جانە شارالار قابىلداۋ ءۇشىن ءتيىستى مەملەكەتتىك ورگاندارعا بەرىلەتىنىن اتاپ ءوتتى.