استانا تۇرعىندارى اراسىندا ۆاكتسينامەن باسقارىلاتىن ينفەكتسيالاردى جۇقتىرۋ دەرەكتەرى كوبەيگەن. مۇنىڭ باستى سەبەبى - تۇرعىنداردىڭ بالالارعا ەكپە سالۋدان باس تارتۋى. بۇل تۋرالى ەلوردانىڭ باس سانيتارلىق دارىگەرى سارحات بەيسەنوۆا ورتالىق كوممۋنيكاتسيالار قىزمەتىندە وتكەن بريفينگ بارىسىندا مالىمدەدى, دەپ جازادى Egemen.kz.
سارحات بەيسەنوۆانىڭ مالىمەتىنشە, استانادا بيىلعى 6 اي ىشىندە 1 جاسقا دەيىنگى بالالاردى ديفتەرياعا, سىرەسپەگە, كوكجوتەلگە, گەموفيلدى ينفەكتسياعا, پوليوميەليتكە, پنەۆموكوككتى ينفەكتسياعا, 16-17 جاس ارالىعىنداعى جاسوسپىرىمدەردىڭ ديفتەرياسىنا جانە سىرەسپەگە قارسى ەكپەلەرمەن قامتۋ جوسپارلى جۇزەگە اسىرىلىپ جاتىر.
«ناتيجەسىندە بيىلعى جارتى جىلدا كوكجوتەلدىڭ 435 راستالعان جاعدايى تىركەلدى, 14 جاسقا دەيىنگى بالالار اراسىندا – 417 (كورسەتكىش – 100 مىڭ تۇرعىنعا شاققاندا 30,5), 2023 جىلى كوكجوتەلدىڭ 5 جاعدايى تىركەلدى, ءوسىم 82 ەسە. اۋرۋدىڭ نەگىزگى سەبەبى 54% نەمەسە 234 جاعدايدا اتا-انالاردىڭ كوكجوتەلگە قارسى پروفيلاكتيكالىق ەگۋدەن باس تارتۋى بولىپ سانالادى», دەدى ەلوردانىڭ باس سانيتارلىق دارىگەرى.
وعان قوسا استانالىقتار اراسىندا قىزىلشا جۇقتىرۋ دەرەگى دە ەداۋىر ارتقان.
«وتكەن جىلدىڭ ناۋرىز ايىنان باستاپ ەلوردادا قىزىلشامەن سىرقاتتانۋشىلىقتىڭ ءوسۋى بايقالدى. بيىلعى 6 ايدا قىزىلشانىڭ 1541 راستالعان جاعدايى تىركەلدى, ونىڭ ىشىندە 14 جاسقا دەيىنگى بالالار اراسىندا 1059 جاعداي, ءوسىم 12 ەسە, سىرقاتتانعانداردىڭ ىشىنەن قىزىلشاعا قارسى 1069 ادام ەگىلمەگەن», دەدى سارحات بەيسەنوۆا.
دەنساۋلىق ساقتاۋ دەپارتامەنتى الەۋمەتتىك جەلىدە ەكپەنىڭ اسەرى تۋرالى كورىنەۋ جالعان اقپاراتقا باقىلاۋ جۇرگىزىلەتىنىن دە حابارلادى. دەپارتامەنت تاراپىنان جۇرگىزىلگەن ءتۇسىندىرۋ جۇمىستارىنان كەيىن 2472 اتا-انا ۆاكتسيناتسيانىڭ ماڭىزدىلىعىن ءتۇسىنىپ, بالالارىن ەكتىرگەن, ونىڭ ىشىندە 623-ءى بۇرىن ۆاكتسيناتسيادان باس تارتقاندار. بۇل كورسەتكىش 2022 جىلمەن سالىستىرعاندا 7 ەسە جوعارى.