كوز اشقالى تانىپ-بىلگەنىمىز – ەل ءىشىنىڭ ءومىرى. كەشە جۇمىسقا كىرىپ بارا جاتسام, شابىلعان كوك ءشوپتىڭ ءيىسى مۇرىنىمدى جارىپ بارادى. امالسىز بۇرىلىپ قاراسام, رەداكتسيانىڭ الدىنداعى ازعانتاي عانا ءشوپتى شاۋىپ تاستاعان ەكەن ءتيىستى كىسىلەر. كەۋدەمىزگە جاستاي ءسىڭىپ قالعان ءيىس اۋىلدا اكەم مەن اعاتايىما ەرىپ, ات شالعىمەن ءشوپ شابۋعا بارعان بالالىعىمدى ەسكە ءتۇسىردى.
ۇزىن جەتەگى بار قۇرىلعىعا پار ات جەگىپ, ءشوپ شابادى, تىرناۋىشقا تاعى ءبىر ات جەگىپ, شابىلعان ءشوپتى جينايدى, سوسىن كەشكىلىك كوپەندەپ قولمەن ۇيەتىن. كۇن قايتا اتتاردى شىدەرلەپ جىبەرەدى دە, تاڭ اتا ۇستاپ اكەلىپ, تاعى جۇمىسقا جەگەدى. كەيدە تۇندەلەتىپ قوستىڭ ۇستىنە اۋىلدىڭ كوپ جىلقىسى كەلىپ جايىلادى دا, اتتار تۇسامىس-شىدەرىن ءۇزىپ, كوپ جىلقىعا ىلەسىپ كەتەدى. ءبىر ات ۇنەمى ارقانداۋلى تۇرادى. الگىگە مىنە سالا جونەلگەن اعاتايىم كوپ جىلقىنىڭ ىشىنە كىرىپ, اتتاردى شالما تاستاپ ۇستايتىن. شالما تاستاۋ ماعان ۇيرەنشىكتى كورىنەتىن. كەيىن بىلسەم, ات ۇستىندە بۇعالىق سالۋ, شالما تاستاۋ دەگەن كادىمگىدەي ونەر ەكەن. سول كەزدىڭ وزىندە ەكى جىلقىشىنىڭ ءبىرى شالما تاستاي المايتىن, قازىر ءتىپتى سيرەك شىعار. قولىنداعى ارقاندى شيىرشىقتاپ الىپ, 5-7 مەتردەن كوزدەگەن جىلقىسىنا لاقتىرىپ قالعاندا, سارت ەتىپ باسىنا كيىلىپ, قىل مويىننان تۇزاقتاپ الادى. ال ەندى شالمانى جايىلىپ بوس جۇرگەن جىلقى تۇرماق, 7-8 مەتردەن قاعۋلى قازىققا ءتۇسىرۋدىڭ ءوزى قيىن.
كەيىن وسى شالما تاستاۋعا قاتىستى ءبىر اڭگىمە ەستىدىم. جاڭاارقا جاعىندا كوكتىڭكولى دەگەن اۋىلدا 96 جاسقا كەلىپ قايتقان احمەتجان اتتى اقساقال ءوتىپتى. جىلقىشى, ءانشى, دومبىراشى, ناعىز دالانىڭ قازاعى دەسەتىن. 96 جاسقا قاراعان شاعىندا كوكتەمدە جىلقى كەلگەندە, بۋىرلى اتىنا شالما تاستاسا ونىسى جالتارىپ, تاستاعان شالماسى تۇڭعىش رەت تۇسپەي قالسا كەرەك. ءومىر بويى جىلقى باققان اقساقال سوندا: «احمەتجاننىڭ وسى ولگەنى ولگەن ەكەن» – دەپ تەرىس اينالىپ كەتىپتى. ءبىر قىس قانا مىنبەي قويا بەرگەن بۋرىلىنا شالماسى تۇسپەگەن جىلقىشى ۇيىنە بارىپ جاتىپ قالىپتى. كوزى كورگەندەر «احمەتجان شالمانى ەكى تاستامايتىن» دەپ داعدارىپتى. كوپ ۇزاماي جىلقىشىنىڭ ءوزى دە دۇنيە سالىپتى.
قازاقتا شالما تاستاۋ – ۇلكەن ونەر. ۇلتتىق ويىن ءتۇرى. ويىنعا قاتىسۋشىلار الاڭ تاڭداپ, ون مەتر جەرگە قازىق قاعادى. ۇزىن ارقان الىپ, ءبىر جاعىن ىلمەكتەپ, شالما جاسايدى. جينالعاندار كەزەكتەسىپ الگى قاعىلعان قازىققا شالما تاستايدى. ويىنشى ارقاننىڭ ءبىر ۇشىن سول قولىنا ۇستايدى دا, ەكىنشى شالما جاعىن وڭ قولىنىڭ شىنتاعىنا وراپ, شەڭبەرلەپ الادى دا قازىققا نە تومارلى بۇتاققا لاقتىرادى. شالمانى نىساناعا كىم كوپ تۇسىرسە, سول جەڭەدى.