ون ءۇش جىل بويى قۇلدىقتا بولعان اناسى مەن ۇلىنا پاتەر سىيعا بەرىلدى, دەپ حابارلايدى Egemen.kz.
باسپاناعا قارجىنى بلوگەر گۇلميرا ابدراشەۆانىڭ وقىرماندارى جيناعان. بۇل تۋرالى ۆولونتەر, بلوگەر نازىم جانعازى حابارلادى.
- ءبىر اپتا بۇرىن تۇركىستان وبلىسىنداعى كريزيس ورتالىعىندا بولىپ, 13 جىل قۇلدىقتا بولعان 16 جاستاعى ناۋم (ەسىمى وزگەرتىلگەن) مەن اناسى تۋرالى ايتقان ەدىم. بۇگىن قۋانىشتى جاڭالىقتى بولىسكىم كەلىپ وتىر. ناۋم تۋرالى ايتقاننان كەيىن مەنىڭ قۇربىم گۇلميرا ابدراشەۆا مەن ونىڭ وقىرماندارى جينالىپ, 23 ساعاتتىڭ ىشىندە 25 ميلليون تەڭگە جيناپ بەرگەن. كەلەسى كۇنى ەرىكتىلەرمەن شىمكەنتكە باردىم. ول جەردە اناسى مەن بالاسىنىڭ تۇرعىلىقتى مەكەنجايىن اۋىستىرۋ تۋرالى شەشىم قابىلدادىق, – دەيدى نازىم جانعازى.
ۆولونتەر ول اقشاعا قۇلدىقتا بولعان اناسى مەن بالاسىنا ەكى بولمەلى پاتەر ساتىپ الىنعانىن مالىمدەدى.
- پاتەر تازا, جايلى, كورشىلەرى مەيىرىمدى. پاتەردى قاراپ شىققاننان كەيىن بىردەن قۇجاتتاردى راسىمدەۋگە باردىق. ول جەردە داعدارىس ورتالىعىنىڭ وكىلى دە بولدى. ازىرگە ولار تولىقتاي الەۋمەتتەنۋ جانە بەيىمدەلۋ ءۇشىن داعدارىس ورتالىعىندا قالىپ وتىر. كەيىن ولار جاڭا پاتەرىنە كوشىپ, ءارى قاراي داعدارىس ورتالىعى مەن ءبىزدىڭ باقىلاۋىمىزدا بولادى, – دەپ مالىمدەدى نازىم جانعازى.
ەندى اناسى مەن بالاسىنىڭ قۇجاتتارى رەتتەلىپ جاتىر.