بۇگىن تۋريزم جانە سپورت ۆيتسە-ءمينيسترى ميراس تولەباەۆ ورتالىق كوممۋنيكاتسيالار قىزمەتىندە وتكەن بريفينگ بارىسىندا ويىن بيزنەسى جانە لوتەرەيا قىزمەتىن رەتتەۋ بويىنشا قابىلدانعان زاڭناماداعى نەگىزگى جاڭاشىلدىقتار تۋرالى تارقاتىپ ايتىپ بەردى, دەپ جازادى Egemen.kz.
ويىن بيزنەسى ماسەلەلەرى تۋرالى جاڭا زاڭعا سايكەس, جەكە تۇلعالاردى قۇمار ويىندار مەن ءباس تىگۋدەن ءوز بەتىنشە شەكتەۋدىڭ ەڭ ۇزاق مەرزىمى 10 جىلعا دەيىن ۇلعايتىلدى.
دەنساۋلىق ساقتاۋ مينيسترلىگىنىڭ مالىمەتىنشە, ەلدە 19 لۋدومان رەسمي تىركەلگەن. ميراس تولەباەۆ بۇل پراكتيكالىق تۇرعىدا ناقتى ساندى كورسەتپەيتىنىنە نازار اۋدارىپ, ولاردى ەمدەۋدىڭ جاڭا ءتارتىبى ەنگىزىلەتىنىن حابارلادى.
«لۋدوماندار مەملەكەتتىك كلينيكالاردان كومەك سۇرامايتىنى بەلگىلى. ەسەپكە الىنعان ازاماتتار جوو-عا تۇسە المايدى, اسكەردە قىزمەت ەتە المايدى جانە جۇمىسقا ورنالاسا المايدى. پاتسيەنتتەردىڭ كوبى وتە كوپ اقشا جۇمساپ, جەكە ۇيىمداردا وڭالتۋدان وتەدى. ەندى مەملەكەتتىك كلينيكالاردا دا انونيمدىلىك قامتاماسىز ەتىلەدى», دەدى ۆيتسە-مينيستر.
زاڭ كۇشىنە ەنگەننەن كەيىن ونلاين-كازينو ۇيىمداستىرۋشىلار قىلمىستىق كودەكستىڭ 307-بابى بويىنشا قىلمىستىق جاۋاپكەرشىلىككە تارتىلادى. ال ويىن بيزنەسىن زاڭدى ۇيىمداستىرۋشىلاردىڭ ءتىزىمى مينيسترلىكتىڭ سايتىندا جانە ە-ليتسەنزيالاۋ پورتالىندا جاريالانعان.
«لوتەرەيا تەرمينالدارى مەن تيراجدىق ەلەكتروندىق لوتەرەيالارعا تىيىم سالىندى. لوتەرەيا وپەراتورىنىڭ ەلەكتروندىق ونىمدەرى ونىڭ رەسمي ينتەرنەت-رەسۋرسىندا جانە ءموبيلدى قوسىمشاسىندا عانا بولادى», دەدى ميراس تولەباەۆ.