بۇعان دەيىن اۋىر جاراقات العان قازاقستان ازاماتى ىستىقكول قالاسىنداعى اۋداندىق اۋرۋحانادا جان تاپسىردى, دەپ حابارلايدى Egemen.kz 24.kg سايتىنا سىلتەمە جاساپ.
15 شىلدەدە اۋداندىق اۋرۋحانا وكىلدەرى پوليتسياعا حابارلاما جولداپ, 42 جاستاعى قازاقستان ازاماتى قارا وي اۋىلىنداعى دەمالىس ورتالىقتارىنىڭ بىرىندە اۋىر جاراقات العانىن جەتكىزدى. ەر ادامدى قايىق سوعىپ كەتكەن.
فاكت تىركەلىپ, تەرگەۋگە دەيىنگى ءىس-ءشارالار جۇرىپ جاتىر. قايىقتىڭ يەسى - 32 جاستاعى جەرگىلىكتى تۇرعىن, بىراق وقيعا بولعان ساتتە سۋ كولىگىن 18 جاستاعى جىگىت تىزگىندەگەنى انىقتالدى.
16 شىلدە كۇنى جابىرلەنۋشى العان جاراقاتتارىنان قايتىس بولعانى انىقتالدى. ءتيىستى سوت-مەديتسينالىق ساراپتاما تاعايىندالدى.
ايتا كەتەيىك, قىرعىز رەسپۋبليكاسى قىلمىستىق كودەكسىنىڭ 127-بابى «ابايسىزدا ادام ولىمىنە اكەپ سوعۋ» جانە 311-بابى «جول قوزعالىسى جانە تەمىر جول, اۋە نەمەسە سۋ كولىگىن پايدالانۋ قاۋىپسىزدىگى ەرەجەلەرىن بۇزۋ» بويىنشا قىلمىستىق ءىس قوزعالدى. قۇزىرلى ورگان وكىلدەرى تەرگەۋ امالدارىن جۇرگىزىپ جاتىر.