ەلىمىزدە دەمالىس كۇندەرى اياز كۇشەيەدى

استانا. 21 قاڭتار. قازاقستاندا الداعى دەمالىس كۇندەرى ۇسكىرىك ايازدار كۇشەيەدى. بۇل تۋرالى «قازگيدرومەت» ورتالىعى حابارلادى. سينوپتيكتەردىڭ ايتۋىنشا, اركتيكالىق اۋا ماسسالارىندا قالىپتاسقان انتيتسيكلوننىڭ اسەرى باتىس ءسىبىر مەن ورالعا عانا ەمەس, قازاقستان اۋماعىنا دا تارالۋدا. «جاقىن اراداعى تاۋلىكتە كۇننىڭ سۋى رەسپۋبليكانىڭ باتىس جانە سولتۇستىك-باتىس اۋداندارىن قامتيدى, ودان سوڭ بارلىق اۋماققا تارالاتىن بولادى. انتيتسيكلوننىڭ كۇشەيۋىمەن تەمپەراتۋرا تومەندەيدى, ەلىمىز سولتۇستىگىنىڭ كەي جەرلەرىندە اۋا تەمپەراتۋراسى -33-38, كۇندىزدىڭ وزىندە -20-30 گرادۋس اياز بولادى دەپ بولجانادى», – دەلىنگەن ورتالىق حابارلاماسىندا. سونىمەن قاتار, وڭتۇستىك وبلىستاردا جاقىن اراداعى ءۇش تاۋلىك ىشىندە بۇلتتى, قارلى اۋا-رايى ساقتالىپ, 24 قاڭتار كۇنى تۇندە -18-23 گرادۋسقا دەيىن, كەي جەرلەردە -25-30 گرادۋس ايازعا دەيىن تومەندەيدى دەپ كۇتىلۋدە. ايدار ورىسباەۆ. دەرەك: kazhydromet.kz. سۋرەت: nur.kz.